Nanuit Aniktailigiyiit

Autlaaguvit Nunavumi, nanuit nunainiitutit. Nanuit angitkiyauyut umayut nunakyuami. Hakugiktut, kayumiktut ovalo ayongitut hikumi, nunani ovalo imani. Nakuutkiyak takungitkuni.

Nanuit Nunat Atugutait

Nanuit takulaakatut hikumi ovalo hinaani Ukiuktaktut Tagiungani ovalo Ukiuktaktut kikiktainit Hudson Baymut. Umaut hikumi ovaluniit nunami haniani hinaanit. Auyami, nanuit autlaakpaktut hinaani atukhutik naunaiyautainik nunait ovalo kangikhuinik atukhugit. Autlaakpaktut nunat iluani ovalo takuyauvakatut 150mi km hinaanit.

Nanuit Nigiviit Nunait

Ukiakhami, ukiumi ovalo upingaami, nanuit natikhiulikpaktut hikuilgutainik tagiut, angmaumayumik imani ovalo hikut hinaanungakhimayut anugimit. Natikhiukpaktut nani hikukalunagitumi, ilangit ainiini hikukaviani hinaanit.

Upingaami aknait nanuit ivakaktut natikhiulikpaktut putuinik natiit ovalo aniani hikut hinaaniitut, ilaa kangikhuini.

Auyami nanuit hinaanungakpaktut hikuigaagat. Nigivaktut tingmianik, maniinik ovalo mikiyut umayunik hinaani tagiut, hinaani ovalo kikiktaini. Nigilikpaktutlu hunavalunik umayut ukpatainit igihimayainik Inuit.

Nanuit Ivaviit Nunait

Ukiakhami, ukiumi ovalo upingaami ivaviit apotimiitut kingiktumi. Hingaihimayut ivaviit nalvaakpaktut kingiktumi nunaini nani apotigiaktut ovalo hikugaalumi. Ivaviit takukhautiangitut kihimi tumiit takukhauyut apotimi ovalo anikhaagutait putuit takukhaulaakatut ivaviit.

Ukiumi atuktait ivaviit ovalo utakiviit apotini ovaluniit nuutitihimayut hikuit. Hapkoa atukpaktut unaguikvikviit ovaluniit utakiviit hilatiagutikhaini ilaani tatkikhiutini.

Auyami angmaumatitlugit imait ivaviit kaanganiitut apotimut ovaluniit nunat kikumayuit. Ivaviit kingiktumiilaaktut apotini, hikugaaluni ovaluniit nunait ataani ivavianut, nani unakpalaangituk.

Takuhaktailigutait

Kungianginalutit. Autlaakatikalutit hitaminik Inunik ovalo autlaakatigiilutik aniktailigiagani. Akhut nipikalutik haniani nanuit nunaini tuhaktiyaangani talvaniitutit. Autlaakpalutik ubluini ovalo nalungilutik naniitut. Nanuit takuhalaitut ilaani. Kimutikut kinikhiavalutik. Atungilugit atulaitait nunait takukhautiangitut, nuutitihimayut hikuit tagiumit, uyagagaaluit, napaaktut ovaluniit nunauyait. Kungialutit tumiinik, anainik ovalo pualgiyakhimayainik.

Kaliktailugit nanuit. Nanuit munaginiaktut atuktainik nunami ihumaaluligumik. Nigipkaktailugit nanuit ovaluniit aalat umayut. Nanuit takukataktut Inunik nikikaktunik ayokhalaaktut. Hanianungalaitut tukuhimayunik umayunik. Nanuit hanianiilaamata. Kimaklugit kilamik.

Nanuit Takuhaktailigutait

Takulaaktut nanunik inminik ovaluniit tuhagamik huliyanik. Nanuit takuyumavaktut ovalo ihivgiulutik ilitagingitainik hunavalunik, naiyaanik ovaluniit nipigutainik. Kimaangilutit ovalo ihivgiuklugit kanugitaakhait. Tamamik takulaaktut nanunik nutaanguyuk. Ihumalutit nakuuyumik, ihumatiagutait ovalo nalungitainik nanuit pivaktainik ikpinaktut.

Kinikhiayut Nanuit – Nanuit nalungitpata hanianiitutit ovalo takupkaiyut kinikhiakafuktut nuutitikhutik kayumiitumik, nagipakhutik kanaanganut kinguanik ovalo naikataktut hilamik, takukhauplutik hiutait hivumut ovalo hanianut, nuutitikatakhutik niakuit ovaluniit nainahuaktut pihukhutik ovalo pihugaagata kinguvanit, akpalailutit. Kinguvaalutit kayumiitumik. Ikayuklugit nanuit Inuuyutit ukaklutit nipaitumik. Nuutitiklutit hivuanut nanuit naiyaangani. Kimakpaklugit kimaavikhakalugit nanuit. Akpangilutit.
Kukluihimayut Nanuit – Nanuit kukluktaukpata hanianiitut ovaluniit takukhauyut ikhitaaktuk ovaluniit ikhiyuk anikhaalikhutik, nipikalikhutik, igiagani nipikaklikhutik, mugualikhutik, kigutait aktukatakhugit, itiganik ingutaalikhutik, kungiaginalikhutik Inunik ovaluniit niakuni taunungautilugit, akpatailutit. Kinguvaalutit kayumiitumik. Nipikangilutit ovaluniit nuutitihuilutit kayumiktumik. Kungiangilugit iigit. Ikhitaaktailugit. Paknaiyakhimayutit nutkatugikhainik. Akpatailutit.
Nikikhakhiuktut Nanuit – Nanuit takukhaukpata kinikhiayut ovaluniit umayukhiuktuk ilinik, maliklutit ovaluniit kaimaluaktaatit, kaiyuk ilinut, ikhingitumik, utikatainakat kimaagutigalualugit ovaluniit anikhimayutut ilihimakpat, utukak ovaluniit kapakhimayut, akpaktailutit. Ilaukatigiilutik ovalo nipikalutit akhut. Paknaiyakimalutit nutkaktigutikhainik. Paknaiyakhimalutit ugiaktauguvit. Akpatailutit.
Nanuit nanuuyautait – Kitkanuuktailutit nanuit ovalo nanuuyautait. Takuguvit nanumik nanuuyautainik, akpaktailutit. Ilaukatigiilutik ovalo kimaklugit nunait kilamik. Paknaiyakhimalutit ugiaktauguvit.

Nanumit ugiaktauguvit atuklutit pikaktainik kimaatjutikhainik, ilangit, uyakat, hikut, haviit, skis ovalo napuutait.

Hiniktagutait Aniktailigiyumik

Hiniktaguilutik hinaani. Nanuit pihulikpanmata hinaanut malikhutik nuvuanut kinikhiaplutik. Hiniktaguilutik nunat ataani ovalo avataagutainik. Tahapkoa atukpaktait nanuit ikaagutainik nuvuit ovalo nuutitikatakhutik. Hiniktakpalutit nunat iluani, kiniktumi, nani takulaagiani ungahiktumut. Kinikpaklutit nanuit tumiinik hiniktaktinatit. Nuutitjavutit nanukakat nunait.

Hiniktakviit halumahimavalugit. Igatjutait, halumaklugit, tutkuklugit nikitit, inikviit, katait ovalo tamamik igatjutait ilaulugit aangugaatit igatjutihimayatit ovalo ikakuukviit, nikit ovaluniit nailaaktut hanalgutit 100m metres hiniktakvinit ungahianit ovalo imailgumi. Ilivaklugit ikuutit ovalo aknait atugutait puuklugit igitakhanut. Ililugit tamamik igitakhait ilaulugit nikit ovalo puungit. Ikualaangilugit puungit, ilaa nailaamata ikualaaktunik nanunik. Ilivaklugit kuvihimayut igahimayait ovalo halumaktiklugit nunait. Ililugit hiniktakviit, igaviit, tutkuktuiviit ovalo anait ungahiktumut kimaalaagiagani nanumik takukpat.

Hiniguilutit tupiitumik. Tigumiangilutit hakugiktunik nailaaktumik nikinik ovaluniit nailaaktumik hunvalunik. Igahuilutit, tutkuktuihuilutit nikinik ovaluniit nailaaktunik hunavalunik tupini.

Ihumagiyakhait – Tamamik ilaukatauyut nalungitukhat kanuk munagivaktait nanuit takugaagata aalatkiitunik. Tuhaktitlutit nanunik ihumagiyakhainik ovalo nutkaktigutikhainik. Nalungilutit kanuk ovalo kakugu atulaaktut nutkaktigutikhait autlaaktinatit. Ihumalutit tigumialugit ovalo ilitiklugit nanunik naalagutikhainik hanianungakata hiniktakvinut.
Nutkaktigutait – pilaaktut niuviklugit nanuit nutkaktigutikhainik ilangit; nipiliugutit, maahat ovalo hikuktiutit ovalo titigagutit “nanuit kimaatigutait” keelinikatut ukiuktaktumi. Amigaitut nutkaktigutait niuvilaaktut aalanit ovalo akyalaaktut aninaktumik niuvigutainik. Kimaatigutit nanunut ilaani havalaaktut kihimi ihiivgiuktakhait. Nalungilutit kimaatigutit ilaani havalaitut kaayunakat ovaluniit kinihimakpata.
Hikuktiutit – Takulugit Nunavumi Pulaaktiligiyit havaktiit kanuk atulaaktut hikuktiutit.
Kingmiit – Autlaakpaklutit kingminik nalungitunik nanunik. Pihimavalugit kingmiit. Anugiit mikhaanut ilivaklugit hiniktakviinit. Halumakpalugit kingmiit nigihimayainik.

Ayokhahakuvit

Kinikhiayut pilaaktakhait keelinikatut, nunanit, hilamit ovalo atulaaktumik tingmiamik. Keelinikatut tingmiat Nunavumi. Tingmiat ovalo halikaptat ilaani mikiyumi nunamiingitut. Tingialigutait kinguvalaaktut, ilaani ublunik amigaitunik, hilat nakuungitpata ovaluniit anukhivalaakata, hilat kanugitjutait ovalo anugit akhuuktut. Tingmia milaaktut nunami naamaktumik.

Tigumialutit ovalo nalungilutit atugutikhainik ayokhahaktut tuhagutikhainik, ilangit foniit naalautikut. Ilangit foniit atulaaktut Nunavumi kihimi atuklutit nunanit. Nalungilutit nunani ilaani ovalo hilat kanugitjuati keelinigialaaktait naalagiagani. Tigumialutit GPSmik naluhuigiagani naniitutit ayokhahakuvit. Nalungilutit atugutikhainik hanalgutit autlaaktinatit. Patuliit ilaani kaayunaktumi atukhaalaitut, unakutilugit ovalo atuklugit ayokhahakuvit talvatuak

Tamamik kinikhiayut akiit munagiyait pulaaktut.

Pilutik Tuhagutikhainik

Ihumalutit havaktikalutit nunamit ikayuktinik naluguvit kanuk munailaaktut nanuit. Ilihaklutit ilinik mikhaanut nunait autlaaniaktutit. Takulugit Nunavumi Munagiyit Hilakyualigiyit Pulaaktiligiyit ovalo Minguiktikviit Nunait ovaluniit Umayuligiyit tuhafaagumaguvit. Tuhanahualutit nani ovalo kanga nanuit takuyauvaktut ovalo talvungalauhuilutit. Nalungilutit kanugitumik nunainik atukpaktait ukiuni ilaani. Pilutit tuhagutikhainik nanuit nigivigilikpaktait nunait ovalo ivaviit takungiyaangani. Paknaiyaklutit, ihuakhailutit ovalo nalungilutit hulilaaktut nanunik takuhakumik. Tuhaktitilugit tamamik takuhimayait, pihuktut takuhimayait, tumiit ovalo aalat nanuit takuhimayainik Nunavumi Pulaaktiligiyit Havaktiit ovaluniit Nunaini Umayuligiyit kilamik.

Tuhafaagumaguvit Nanunik, takulugit hapkoa pitkuhimayut kungiagutikhait ovalo taiguagutikhait.