ᐅᑉᐱᕆᔭᕗᑦ
ᐅᑉᐱᕆᔭᕗᑦ ᓇᓗᓇᐃᖅᓯᓯᒪᔪᑦ ᖃᓄᖅ ᐊᑐᐃᓐᓇᐅᑎᑕᐅᓂᐊᕐᒪᖔᑕ ᐃᑲᔫᑎᔅᓴᐃᑦ ᑲᔪᓯᑦᑎᐊᖁᓂᐊᖅᑐᒋᑦ ᐱᓕᕆᐊᑦᑎᓐᓂ ᐅᕙᑦᑎᓐᓄᑦ ᓯᕗᓂᑦᑎᓄᓪᓗ.
- ᑲᑐᔾᔨᓪᓗᑎᒃ ᐸᕐᓇᓯᒪᕗᖅ ᐊᐅᓚᑦᑎᓂᐊᖅᑐᑎᓪᓗ. ᓄᓇᕗᒻᒥ ᐅᑭᐅᖅᑕᖅᑐᒥ ᒥᕐᖑᐃᖅᓯᕐᕖᑦ ᓄᓇᑦᑎᐊᕙᐃᓪᓗ ᐸᕐᓇᓐᓂᐊᖅᑐᑦ ᐊᐅᓚᑦᑎᖃᑎᖃᕐᓂᐊᖅᑐᑦ ᐃᑲᔪᖅᑐᖅᑕᐅᓗᑎᒃ ᐃᓄᖏᓐᓂ ᓄᓇᓕᓐᓂᓪᓗ. ᐃᓕᓴᖅᓯᓯᒪᕗᒍᑦ ᐃᓄᐃᑦ ᐱᔪᓐᓇᐅᑎᖏᓐᓂ, ᓄᓇᓂᓪᓗ ᐊᑐᖅᑕᐅᔪᓐᓇᖅᑐᓂᓪᓗ ᒪᓕᑦᑎᐊᕐᓗᑕᓗ ᓄᓇᕗᑦ ᓄᓇᑖᕈᑎᐅᑉ ᐊᖏᕈᑎᖓᓐᓂ ᐊᒻᒪᓗ ᐃᓄᐃᑦ ᐊᑦᑐᖅᑕᐅᓂᐊᕐᓂᖓᓐᓂ ᐱᕚᓪᓕᕈᑎᔅᓴᖏᑕᓗ ᐊᖏᕈᑎᖓᓐᓂ.
- ᐱᖃᑕᐅᓂᖅ. ᑲᒪᒋᓐᓇᕐᓂᐊᕐᓗᒋᑦ ᐱᔭᕆᐊᖃᖅᑕᖏᑦ ᓄᓇᕗᒻᒥᐅᑦ ᐳᓚᕋᖅᑏᓪᓗ, ᐃᓕᓴᕇᓐᓇᕐᓗᒋᑦ ᓄᓇᒥᑦ ᐱᕈᖅᑐᐃᑦ, ᐃᓅᖃᑎᒌᑦ, ᐱᖅᑯᓯᖏᑦ ᒪᑭᒪᔾᔪᑎᔅᓴᐃᓪᓗ ᐃᓱᒪᒌᓐᓇᕐᓗᒋᑦ; ᖃᐅᔨᒪᑦᑎᐊᕋᓱᐊᖏᓐᓇᕐᓂᐊᖅᑐᒋᑦ ᐊᒻᒪᓗ ᐊᔭᐅᖅᑐᐃᓗᑕ ᑐᑭᖃᑦᑎᐊᖅᑐᓂᒃ ᐱᖃᑕᐅᑎᑦᑏᓐᓇᕐᓗᑎᓪᓗ ᒥᕐᖑᐃᖅᓯᕐᕕᓕᕆᔪᓕᒫᓂᑦ.
- ᖃᐅᔨᒪᓂᖅ. ᓄᓇᕗᑦ ᐅᑭᐅᖅᑕᖅᑐᒥ ᒥᕐᖑᐃᖅᓯᕐᕖᑦ ᓄᓇᑦᑎᐊᕙᐃᓪᓗ ᐋᖅᑭᔅᓯᒪᓂᐊᖅᑐᖅ ᐊᐅᓚᓂᖃᑦᑎᐊᕐᓗᑎᒃ ᐊᑐᕈᓐᓇᑦᑎᐊᕐᓗᑎ ᑐᓴᕈᑎᓂᒃ ᐅᑉᐱᕆᔭᐅᑦᑎᐊᕐᓗᑎᓪᓗ ᐃᓄᐃᑦ ᖃᐅᔨᒪᔭᑐᖃᖏᑦ, ᓄᓇᓕᓐᓂᒃ ᐊᒻᒪᓗ ᖃᐅᔨᓴᖅᑎᒻᒪᕇᑦ ᖃᐅᔨᒪᓂᖏᓐᓂ. ᖃᐅᔨᒪᓂᖅᑖᖅᐸᓪᓕᐊᖏᓐᓇᕐᓗᑕ ᐃᑲᔪᖅᑐᐃᓂᖅᑎᒍᑦ ᖃᐅᔨᓴᕐᓂᕐᒥᑦ, ᒫᓐᓇᒧᓪᓗ ᐃᓚᐅᖃᑕᐃᓐᓇᕐᓗᑕ ᖃᓄᐃᓘᕐᓂᐅᔪᓂᒃ ᐱᐅᓯᕚᓪᓕᖁᐃᓐᓇᖅᑐᒋᓪᓗ ᑕᒪᒃᑯᐊ. ᐊᑐᖃᑦᑕᕐᓂᐊᖅᑕᕗᑦ ᑐᓴᕈᑏᑦ ᐊᑐᐃᓐᓇᐅᔪᑦ ᐊᑐᐊᒐᕆᓪᓗᑎᒍ ᐃᓱᒪᓕᐅᕐᓂᕐᒥᑦ ᐊᒻᒪᓗ ᐱᐅᓯᕚᓪᓕᖁᔩᓐᓇᖅᑐᑕᓗ ᐊᑐᖅᑕᐅᑦᑎᐊᖏᓐᓇᖃᑦᑕᕐᓗᑎᓪᓗ ᑕᒪᒃᑯᐊ.
- ᓱᓕᑦᑎᐊᕐᓂᖅ. ᑕᒪᒃᑯᐊ ᑲᒪᒋᓂᐊᖅᑕᕗᑦ ᒪᑐᐃᖓᑎᑦᑎᐊᖅᑲᕗᑦ ᑐᑭᓯᒋᐊᕈᑎᓕᒫᓪᓗ ᐊᑐᐃᓐᓇᐅᑎᑦᑎᐊᕐᓗᒋᑦ ᑐᓴᒪᐅᑦᑎᐊᕐᓗᑎᑦ ᐃᓱᒪᓕᐅᖃᑦᑕᕐᓂᐊᕐᖓᑕ ᑕᐃᒪᐃᓪᓗᐊᖅᑎᑕᐅᑦᑎᐊᕐᓗᑎᑦ ᓈᒻᒪᓈᑦᑎᐊᖁᓪᓗᒋᓪᓗ.
- ᑕᐃᒪᐃᓪᓗᐊᖅᑎᑦᑎᓂᖅ. ᒥᕐᖑᐃᖅᓯᕐᕖᑦ ᓄᓇᑦᑎᐊᕙᓂᓪᓗ ᑲᒪᔪᑦ ᐃᑲᔫᑎᖃᖅᓯᒪᕗᑦ ᓄᓇᕗᑦ ᒪᑭᒪᔾᔪᑎᖏᓐᓂ ᐳᓚᕋᖅᑐᓕᕆᓂᒃᑯᑦ ᐱᕙᓪᓕᐊᔪᓕᕆᓂᕐᒨᖓᔪᑎᒍᓪᓗ ᐊᑦᑐᐃᓂᖃᑲᒻᒪᒐᓱᐊᕋᑎᑦ ᐸᖅᑭᑦᑎᓂᑦᑎᓐᓂ ᐱᖅᑯᓯᑦᑎᓐᓂ ᓄᓇᑦᑎᓂᓪᓗ.
- ᐱᓕᕆᖃᑎᖃᕐᓂᖅ. ᐱᓕᕆᖃᑎᖃᐃᓐᓇᕐᓂᐊᖅᑐᒍᑦ ᐊᐅᓚᑦᑎᓂᕐᒥᑦ ᓄᓇᑦᑎᓐᓂ ᐱᖅᑯᓯᖏᓐᓂᓪᓗ ᓄᓇᐃᓪᓗ ᐊᑐᖅᑕᐅᔪᓐᓇᖅᑐᑦ, ᑲᔪᓯᒋᐊᖃᓪᓚᕆᑦᑐᑎᓪᓗ ᒥᕐᖑᐃᖅᓯᕐᕕᑎᓐᓂ ᓄᓇᑦᑎᐊᕙᑦᑎᓂᓪᓗ ᑲᔪᓯᖁᓪᓗᒋᑦ ᐃᑲᔫᑎᖃᖁᓪᓗᒋᑦ ᓄᓇᕗᑦ ᑐᕌᒐᖏᓐᓂ ᐊᑐᓕᖅᑭᑦᑕᐅᔪᓐᓇᖅᑐᓂᒃ, ᐃᓕᓐᓂᐊᑎᑦᑎᓂᕐᒥᑦ, ᐳᓚᕋᖅᑐᓕᕆᓂᕐᒥᑦ ᐋᓐᓂᐊᖅᑕᐃᓕᒪᓂᕐᒥᓪᓗ; ᐱᓗᐊᖅᑐᒥᓪᓗ ᐱᐅᖅᓱᐊᕐᓂᕐᒥᑦ ᑐᕌᒐᖏᓪᓗ ᑕᐃᒪᐃᓪᓗᐊᖅᑎᑕᐅᖏᓐᓇᕋᓱᐊᕐᓗᑎᑦ.
