ᐊᕐᕕᐊᑦ
ᓄᓇᕗᒻᒥ ᒥᕐᖑᐃᖅᓯᕐᕕᖕᓄᑦ ᐱᓕᕆᐊᖅ ᐱᕙᓪᓕᐊᑎᑕᐅᓂᖓᓄᑦ, ᐊᕙᑎᓕᕆᔨᒃᑯᑦ, ᒥᕐᖑᐃᖅᓯᕕᓕᕆᔨᒃᑯᖏᑦ ᓴᐳᒻᒥᔭᖅᑕᐅᕕᓕᕈᔩᖏᓪᓗ ᖃᐅᔨᓴᖅᑐᑦ ᐊᕐᕕᐊᓂ ᓴᓇᔭᐅᓪᓗᐊᕐᒪᖔᑦ ᐅᐸᒃᑕᐅᔪᒪᓇᔭᖃᑦᑕᖅᑐᒥᒃ ᑕᐅᑐᒃᑕᑐᐊᕆᔭᐅᓗᓂ ᓴᐳᒻᒥᓂᕐᒧᑦ ᐱᐅᖅᓱᐊᕐᓂᕐᒧᓪᓗ ᐊᕙᑎᐊᑕ ᐃᓕᖅᑲᓯᒃᑯᑦ ᐱᖅᑯᓯᕆᖃᑦᑕᖅᓯᒪᓂᕆᔭᖓ, ᐱᕕᒃᓴᖃᖅᐹᓪᓕᖅᑎᑦᑎᓂᕐᒧᓪᓗ ᐱᙳᐊᖅᑐᓕᕆᓂᕐᒥᒃ, ᐳᓚᕋᖅᑐᓕᕆᓂᕐᒥᒃ, ᑮᓇᐅᔭᓕᐅᕈᑎᒃᓴᒃᑲᓐᓃᑦ ᐱᕚᓪᓕᖅᐸᓪᓕᐊᑎᑕᐅᓂᖏᓐᓂᒡᓗ.
ᐊᕐᕕᐊᑦ ᓄᓇᓕᖕᓂᑦ ᓄᓇᕗᒻᒥ ᓂᒋᖅᐸᓯᖕᒦᓛᖑᔫᑉ ᑐᖏᓕᕆᔭᐅᕗᖅ ᑭᕙᓪᓕᕐᒦᖦᖢᓂ ᖃᓂᒋᔮᓂ 260 ᑭᓛᒥᑕᑦ ᑰᒡᔪᐊᕌᓗᖕᒥᑦ ᒫᓂᑑᐸᐅᑉ ᐅᐊᖕᓇᖅᐸᓯᐊᓂ ᖃᓂᒋᔮᓂ 100 ᑭᓛᒥᑕᑦ ᓇᐹᖅᑐᑦ ᑭᒡᓕᐊᓂᑦ. ᐊᕐᕕᐊᑦ ᖃᓂᑦᑐᖅ ᒪᑳᓅᑉ ᑎᖕᒥᐊᓂᒃ ᒪᓐᓂᖏᓐᓂᒡᓗ ᐱᕝᕕᐅᑦᑕᐃᓕᒪᕝᕕᖓᓄᑦ ᐊᒻᒪ ᐊᕐᕕᐊ’ᔪᐊᕐᒧᑦ ᕿᑭᖅᑖᕐᔪᖕᒧᓪᓗ ᑲᓇᑕᒥ ᐃᑦᑕᕐᓂᓴᕐᓂᒃ ᑕᑯᔭᒐᖃᕐᕕᖕᓄᑦ ᖃᓂᒋᔮᓂᓗ ᑰᒃᑕᖃᐅᖅᖢᓂ ᓇᐅᒃᑯᕈᓘᔭᖅ. ᓴᖑᐃᖓᐅᖅᑐᓂᒃ.
ᐊᕐᕕᐊᑦ ᓯᓚᑖᓂ ᒥᕐᖑᐃᖅᓯᕐᕕᐅᔪᓐᓇᕋᔭᖅᑐᑦ ᓇᓗᓇᐃᖅᑕᐅᓯᒪᔪᑦ, ᑭᒡᓕᒋᔭᐅᙱᖦᖢᑎᒃ, ᒪᑳᓄ ᑰᕌᕐᔫᑉ ᖁᕐᓗᖅᑐᖏᓐᓄᑦ ᑲᔾᔮᕐᓇᕐᓂᖓᓄᑦ ᐆᒪᔪᖏᓐᓄᓪᓗ - ᓇᓕᒧᒋᑦᑎᐊᕋᔭᖅᖢᓂᐅᒃ ᑎᖕᒥᐊᓂᒃ ᒪᓐᓂᖏᓐᓂᒡᓗ ᐱᕝᕕᐅᑦᑕᐃᓕᔪᒥᒃ ᐊᐅᓚᑕᐅᔪᒥᒃ ᑲᓇᑕᒥ ᐆᒪᔪᓕᕆᓂᕐᒧᑦ ᐱᔨᑦᑎᕋᖅᑎᒃᑯᓐᓄᑦ; ᐹᓪᓕᖅ ᑭᖓᕐᒥ ᑕᓯᕐᒥ ᐃᑦᑕᕐᓂᓴᓕᕆᓂᕐᒧᑦ, ᖃᓄᐃᓕᐅᖅᑕᐅᖃᑦᑕᕐᓂᑰᓚᐅᖅᑐᓄᑦ, ᐆᒪᔪᓕᕆᓂᕐᒧᓪᓗ ᐱᒻᒪᕆᐅᓂᖓᓄᑦ; ᒪᒍᔅ ᑰᒃ ᐊᒻᒪ ᑐᐱᕐᕕᒃ ᐊᕐᕕᐊᑉ ᐅᐊᖕᓇᖅᐸᓯᐊᓂ ᖃᓄᐃᓕᐅᖅᑕᐅᖃᑦᑕᕐᓂᑰᓚᐅᖅᑐᓄᑦ ᐱᒻᒪᕆᐅᓂᖓᓄᑦ; ᐊᒻᒪ ᐊᑦᕼᐊᓐ ᑕᓯᐊ ᐊᕐᕕᐊᑉ ᓂᒋᖅᐸᓯᐊᑕ ᐱᖓᖕᓇᖅᐸᓯᐊᓂ ᐃᑦᑕᕐᓂᓴᓕᕆᓂᕐᒧᑦ, ᑲᔾᔮᕐᓇᕐᓂᖓᓄᑦ, ᐆᒪᔪᓕᕆᓂᕐᒧᓪᓗ ᐱᒻᒪᕆᐅᓂᖓᓄᑦ.
