ᑲᖏᖅᑐᒑᐱᒃ
ᑲᖏᖅᑐᒑᐱᒃ ᑲᖏᖅᑐᕈᓗᒻᒦᑦᑐᖅ ᑲᓇᓐᓇᖓᓐᓂ ᕿᑭᖅᑖᓘᑉ ᓄᓇᕗᒻᒥ. ᑲᖏᖅᑐᒑᐱᒻᒥᑦ ᐱᕚᓪᓕᕈᑎᖃᕈᓐᓇᑦᑎᐊᓕᖅᑐᑦ ᐳᓚᕋᖅᑎᓂᒃ ᓄᓇᕗᓕᐊᖅᑐᓂᒃ ᓄᓇᖓᓐᓂ ᐊᑐᕐᓗᑎᒃ ᐱᖅᑯᓯᖏᓐᓂᓪᓗ ᐊᑐᐃᓐᓇᐅᑎᑦᑎᑦᑎᐊᕐᓗᑎᑦ. ᖁᓕᓂᑦ ᑲᖏᖅᑐᕈᓗᖃᖅᑐᖅ 100-ᑭᓚᒦᑕᓂᑦ ᑕᑭᓂᖃᖅᑐᓂ ᑲᖏᖅᑐᒑᐱ, ᑖᒃᑯᐊᓗ ᓵᒻ ᐳᐊᑦ ᑲᖏᖅᑐᖓᓐᓂ, ᓯᓚᕐᔪᐊᒥᐅᓂᑦ ᖃᐅᔨᒪᔭᐅᑦᑎᐊᖅᑐᖅ ᖃᖅᑲᓯᐅᕐᕕᒃ ᓴᖅᑭᔮᖅᓯᒪᓪᓗᑎᓪᓗ ᐅᖃᓕᒫᒐᕐᓂᑦ ᐊᒻᒪᓗ ᔮᓐᓄᐊᕆ 1999-ᒥ ᑲᓇᑕᒥ ᓄᓇᓕᕆᔨᒃᑯᑦ ᑕᑯᔅᓴᐅᑎᑦᑎᓚᐅᖅᓯᒪᒻᒥᔪᑦ ᑎᑎᕋᖅᓯᒪᓪᓗᑎᒃ “ᐊᑭᓐᓇᕐᒦᓐᓂᖏᑦ”. ᖃᓂᒋᔭᖏᓐᓂ ᑕᑯᒥᓇᑦᑎᐊᕐᒥᔪᖅ ᑲᖏᖅᑐᒑᐱᒻᒥ ᑲᖏᖅᓱᖃᖅᑐᑎᑦ, ᐊᐅᓱᐃᑦᑐᓂᑦ, ᑰᓐᓂᑦ, ᑲᖏᖅᓱᐊᓗᓐᓂᑦ, ᓯᕐᒥᓕᓐᓂᑦ, ᐱᖃᓗᔭᓂᒃ ᖃᖅᑲᓂᓪᓗ. ᓂᕐᔪᑎᖃᐅᖅᑐᑎᑦ ᓄᓇᖏᓐᓂ, ᒪᑯᓂᖓ ᓇᓄᕐᓂᑦ, ᓇᑦᑎᕐᓂᑦ, ᑑᒑᓕᓐᓂᑦ, ᐊᕐᕕᓐᓂᑦ, ᑐᑦᑐᓂᒃ, ᐅᑲᓕᕐᓂᑦ, ᑎᕆᒐᓂᐊᕐᓂᑦ ᐊᔾᔨᒌᓐᖏᑦᑐᓂᓪᓗ ᑎᒻᒥᐊᓂᑦ.
ᖃᐅᔨᓴᖅᓯᒪᓕᖅᑐᑦ ᐊᑐᖅᑕᐅᔪᓐᓇᕋᔭᕐᒪᖔᑕ ᐅᑭᐅᖅᑕᖅᑐᒥ ᒥᕐᖑᐃᖅᓯᕐᕕᔅᓴᒥᑦ ᑲᔪᖏᖅᓴᐃᔾᔪᑎᓂᓪᓗ ᑲᖏᖅᑐᒑᐱᐅᑉ ᖃᓂᒋᔭᖏᓐᓄᑦ, ᕿᒥᕐᕈᔭᐅᓪᓗᑎᓪᓗ ᐊᒥᓱᕈᖅᐹᓪᓕᓐᓂᐊᖅᑐᒋᔭᐅᓪᓗᑎᒃ ᐳᓚᕋᖅᐸᑦᑐᑦ ᑲᖏᖅᑐᒑᐱᒻᒧᑦ ᐊᒻᒪᓗ ᓄᓇᖏᓐᓄᑦ ᐱᖅᑯᓯᑐᖃᖏᓐᓂᓪᓗ ᐊᑐᕐᓗᑎᑦ. ᖃᐅᔨᓵᖏᓐᓂ ᓇᓗᓇᕈᓐᓃᕋᔭᖅᑐᑦ ᓇᒦᓐᓂᐊᕐᓂᖏᓐᓂ ᑲᔪᓯᖅᓴᐃᕕᒋᓂᐊᖅᑕᖏᓐᓂ, ᖃᓄᑦᑐᓂᓪᓗ ᑲᔪᖏᖅᓴᐃᔾᔪᑎᓕᐅᕐᓂᐊᕐᒪᖔᑕ, ᐃᓪᓗᑦᑕᖃᕆᐊᖃᕐᒪᖔᓪᓗ ᑲᔪᖏᖅᓴᐃᔾᔪᑎᔅᓴᓂᒃ ᑲᒪᑎᓪᓗᒋᑦ, ᐊᒻᒪᓗ ᓇᓗᓇᐃᖅᓯᒐᔭᕐᒥᔪᑦ ᖃᓄᖅ ᐱᕚᓪᓕᕈᑕᐅᓂᐊᕐᒪᖔᑕ ᐳᓚᕋᖅᑐᓕᕆᓂᕐᒧᑦ ᑲᔪᓯᖅᓴᐃᓗᑎᑦ ᑲᖏᖅᑐᒑᐱᒻᒧᑦ.
