ᓴᓪᓕᖅ
ᐱᕙᓪᓕᐊᓕᖅᑎᓪᓗᒋᑦ ᓄᓇᕗᑦ ᒥᕐᖑᐃᖅᓯᕐᕕᓕᕆᔨᒃᑯᑦ, ᐊᕙᑎᓕᕆᔨᒃᑯᑦ, ᒥᕐᖑᐃᖅᓯᕐᕖᑦ ᓄᓇᑦᑎᐊᕙᓂᓪᓗ ᑲᒪᔪᑦ ᖃᐅᔨᓴᖅᑐᑦ ᒪᓂᒪᔾᔪᑎᔅᓴᓕᐅᕐᓂᕐᒥᑦ ᓴᓪᓕᕐᒥ ᐸᖅᑭᔭᐅᖁᓪᓗᒋᑦ ᐱᐅᖅᓱᐊᖅᑕᐅᓗᑎᓪᓗ ᓄᓇᖏᑦ ᐱᖅᑯᓯᑐᖃᖏᓪᓗ, ᑲᔪᖏᖅᓴᐅᑎᓂᓪᓗ ᐱᓐᖑᐊᕐᓂᕐᒧᑦ, ᐳᓚᕋᖅᑐᓕᕆᓂᕐᒧᑦ ᐱᕙᓪᓕᐊᔪᓕᕆᓂᕐᒧᓪᓗ.
ᓴᓪᓕᖅ ᖃᐅᔨᒪᔭᐅᑦᑎᐊᖅᑐᖅ ᐊᖅᑯᑕᐅᓂᖓᓐᓂ ᓂᕐᔪᑎᖃᑦᑎᐊᕐᓂᖏᓐᓄᑦ ᓴᓪᓖᓂᑦ, ᐱᖓᓐᓇᖓᓃᑦᑐᓂ ᑲᖏᖅᓱᐊᓘᑉ ᐃᒪᖓᓐᓂ; ᒪᑯᓂᖓ ᐊᐃᕕᕐᓂᑦ, ᕿᓚᓗᒐᕐᓂᑦ, ᓇᑦᑎᕐᓂᑦ, ᓇᓄᕐᓂᑦ ᑎᒻᒥᐊᓂᓪᓗ. ᓴᓪᓕᖅ ᐊᑦᑎᖅᑕᐅᓚᐅᖅᓯᒪᔪᖅ ᓴᐅᓂᒥᓂᖅᑕᖃᕐᓂᖏᓐᓂᑦ ᓯᔾᔭᖏᓐᓂ ᐊᒻᒪᓗ ᓴᐅᓂᒥᓂᖅᑕᓕᖓᓐᓂ ᑰᒐᓛᖓᓐᓂ. ᐱᑕᖃᑦᑎᐊᕐᒥᔪᖅ ᓴᓇᓐᖑᐊᒐᔅᓴᓂᒃ ᒪᑯᓂᖓ - ᑑᒑᕐᓂᑦ, ᓴᖅᐱᓖᑦ ᓴᐅᓂᖏᓐᓂ, ᓇᑦᑎᓂᓪᓗ. ᓴᓪᓕᖅ ᖃᓂᒋᔭᖓᓂ ᑎᒻᒥᐊᕐᓄᑦ ᐃᓂᒋᔭᖏᓐᓂ, ᑲᓇᓐᓇᖓᓐᓂ ᑎᒻᒥᐊᖃᕐᕕᒻᒥᑦ (70-ᑭᓚᒦᑕᓂᑦ ᑲᓇᓐᓇᖓᓄᑦ) ᐊᒻᒪᓗ ᕼᐊᐅᕆ ᒋᐸᓐᔅ ᑎᒻᒥᐊᖃᕐᕕᖓ (140-ᑭᓚᒦᑕᓂᒃ ᓂᒋᖅᐸᓯᐊᓃᑦᑐᓂ ᓄᓇᓕᖓᑦᑕ), ᑎᒻᒥᐊᓯᐅᕐᕕᔅᓴᐅᔪᖅ ᐊᑉᐸᑑᕐᔪᐊᒥᑦ (130-ᑭᓚᒦᑕᓂᑦ ᓂᒋᐊᓃᑦᑐᖅ ᓴᓪᓕᐅᑉ).
ᓇᓗᓇᐃᖅᑕᐅᓯᒪᒻᒥᔪᑦ ᒥᕐᖑᐃᖅᓯᕐᕕᔅᓴᐅᒋᐊᖓ ᓴᓪᓕᕐᒥ ᑰᑦᓴᐳᒥᑦ (15-ᑭᓚᒦᑕᒥᑦ ᐅᐊᓐᓇᖓᓂ) ᑲᔾᔮᓇᑦᑎᐊᖅᑐᖅ ᓂᕐᔪᑎᖃᐅᖅᑐᓂᓗ - ᒪᑯᓂᖓ ᑎᕆᒐᓂᐊᕐᓂᑦ, ᑐᑦᑐᓂᒃ ᐅᑉᐱᔾᔪᐊᕐᓂᓪᓗ; ᐱᖓᓐᓇᖓᓂ ᐊᑉᐸᑑᕐᔪᐊᒥ (150-ᑭᓚᒦᑕᓂᒃ ᓂᒋᐊᓄᑦ) ᓂᕐᔪᑎᖃᐅᖅᑐᖅ, ᑕᑯᒥᓇᖅᑐᖅ, ᐃᑦᑕᕐᓂᓴᓂᓪᓗ; ᐊᒻᒪᓗ ᓄᐊᑉ ᐳᐃᑦᖓᓐᓂ (65-ᑭᓚᒦᑕᓂᑦ ᓂᒋᖅᐸᓯᐊᓃᑦᑐᖅ), ᐃᑦᑕᕐᓂᓴᖅᑕᖃᖅᑐᓂ ᑕᐃᔭᐅᕙᑦᑐᖅ “ᔭᒐᓯᒪᔪᖅ ᓄᓇᓕᕐᔪᐊᒥᓂᖅ ᐅᑭᐅᖅᑕᖅᑐᒥ’ ᐊᑯᓂᐊᓗᒃ ᐃᓄᓐᓄᑦ ᐃᓅᓇᓱᐊᕐᕕᐅᓯᒪᓚᐅᖅᓯᒪᒻᒪᑦ 1960-ᖏᓐᓂ. ᖃᒻᒪᒥᓂᖅᑕᖃᐅᖅᑐᓂ ᓴᓪᓕᕐᒥᐅᓂᑦ ᐃᓂᒋᔭᒥᓂᕐᓂᑦ ᕿᑭᖅᑕᒥ. ᑕᕆᐅᑉ ᐊᑭᐊᓃᓐᖔᖅᓯᒪᔪᑦ ᒥᐊᓕᒐᐃᓪᓗ ᐊᕐᕕᓂᐊᖅᑎᒥᓃ ᓴᓪᓖᓐᖃᑦᑕᖅᓯᒪᔪᒥᓃ 1800-ᖏᓐᓂ ᑲᑎᓯᓚᐅᖅᓯᒪᔪᑦ ᓴᓪᓕᕐᒥᐅᓂᑦ. ᖃᓂᒪᓐᓈᓚᐅᖅᓯᒪᔪᖅ ᓴᓪᓕᕐᒥᐅᓄᑦ ᓄᖑᑦᑎᐊᖅᑐᑎᑦ 1903-ᖑᑎᓪᓗᒍ, ᑭᓯᐊᓂᓕ ᑐᐱᕐᕕᒥᓂᑐᐃᓐᓇᐅᓕᖅᑐᑦ ᓇᐃᑎᑉ ᐳᐃᑦᖓᓂ ᐅᓪᓗᒥᒧᓪᓗ ᑕᑯᔅᓴᐅᓪᓗᑎᑦ ᐱᖅᑯᓯᑐᖃᒥᓂᖏᑦ. 1924-ᖑᑎᓪᓗᒍ, ᐊᓯᕙᖅᑎ ᓴᖅᑮᖃᑕᐅᓚᐅᖅᓯᒪᔪᖅ ᓂᐅᕕᖅᑎᒃᑯᓐᓂ ᓴᓪᓖᓂᑦ ᒫᓐᓇᐅᓕᖅᑐᖅ ᓴᓪᓕᐅᓂᕋᖅᑕᐅᓕᖅᑐᓂ. ᓂᐅᕕᖅᑎᒃᑯᑦ ᐅᐸᑦᑕᐅᖃᑦᑕᓕᖅᑐᑎᑦ ᐃᓄᓐᓄᑦ ᑕᒫᓂ ᑲᖏᖅᓱᐊᓘᑉ ᐃᒪᖓᓐᓂ ᓄᓇᑖᓕᖅᑐᑎᓪᓗ ᑕᒫᓂᕈᔪᒃ. ᒥᐊᓕᒐᐃᑦ ᐅᓇᓖᑦ ᓴᖅᑭᖅᑕᓕᕆᕗᑦ ᑕᕆᐅᑉ ᐊᑭᐊᓃᓐᖔᖅᑐᓂᒃ ᖃᖓᑕᓲᕐᓂᑦ ᐅᐊᑦᑎᕙᑦᑐᑎᑦ ᐅᓇᑕᕕᔾᔪᐊᖅᑐᖃᖅᑎᓪᓗᒍ ᐊᐃᑉᐸᖓᓐᓂ, ᓇᔪᖅᑕᐅᖃᑦᑕᑦᑕᓕᖅᑯᖅ ᐅᓇᓕᖃᕐᕕᐅᓪᓗᓂ ᑕᕐᕋᖅᑑᑎᖃᕐᕕᒥᓂᐊᓘᓪᓗᓂ ᐅᑭᐅᖅᑕᖅᑐᒥ.
