ᐋᖅᑭᑦᑕᐅᓂᖏᑦ
ᒥᓂᔅᑕᒧᑦ ᐊᖏᖅᑕᐅᓯᒪᓕᕈᑎᑦ, ᐊᕙᑎᓕᕆᔨᒃᑯᓐᓄᑦ; ᒥᕐᖑᐃᖅᓯᕐᕕᓂᑦ ᓇᓗᓇᐃᒃᑯᑎᓂᒃ ᑲᒪᔪᑦ ᐱᔭᕇᖅᑕᐅᒋᐊᖃᓕᕋᔭᕐᒥᔪᑦ ᒪᓕᓪᓗᑎᒃ ᐃᓱᒪᓕᐊᖑᔪᓂᑦ ᑖᒃᑯᓇᓐᖓᑦ ᓄᓇᓕᓐᓂ ᑲᑐᔾᔨᔪᑦ ᐊᐅᓚᑦᑎᓂᕐᒥᑦ ᑲᒪᓂᕐᒥᓪᓗ ᑲᑎᒪᔨᕋᓛᖏᓐᓂ ᐸᕐᓇᐅᑎᒃᑯᑦ ᐊᐅᓚᑦᑎᓂᕐᒥᓪᓗ ᓇᓗᓇᐃᖅᑕᐅᖅᑲᐅᔪᒥᑦ ᐅᐊᑦᑎᐊᕈ.
ᐊᐅᓪᓛᖅᑕᐅᓂᖏᑦ ᒥᕐᖑᐃᖅᓯᕐᕖᑦ ᓄᓇᖓ ᓄᓇᕗᑦ ᒐᕙᒪᒃᑯᖏᓐᓄᑦ, ᒥᓂᔅᑕ, ᐊᕙᑎᓕᕆᔨᒃᑯᓐᓄᑦ ᑐᔅᓯᕋᕆᐊᖃᖅᑐᖅ ᑲᓇᑕᒥ ᓴᓂᕐᕙᖅᑕᐅᖁᔭᐅᓗᓂ ᐊᖏᖅᑕᐅᓯᒪᔪᖅ ᒥᕐᖑᐃᖅᓯᕐᕕᔅᓴᖅ ‘ᒐᕙᒪᑐᖃᒃᑯᑦ ᓄᓇᖁᑎᖏᓐᓂ’ ᐊᐅᓚᑕᐅᒻᒪᑕ ᑲᓇᑕᒥ, ᐊᒻᒪᓗ ᐊᐅᓪᓛᕐᓗᒋᑦ ᑲᒪᒋᔭᐅᒋᐊᖃᕐᓂᖏᑦ ᑖᒃᑯᐊ ᓄᓇᐃᑦ ‘ᑲᒥᓴᓇᒧᑦ’ ᓄᓇᕗᑦ ᒐᕙᒪᒃᑯᖏᑦᑎᒍᑦ ᐊᐅᓚᑕᒐᔭᕐᖓᑕ ᐅᑭᐅᖅᑕᖅᑐᒥ ᒥᕐᖑᐃᖅᓯᕐᕖᑦ ᐱᖁᔭᖏᓐᓄᑦ. ᐃᓚᖏᑦ ᒥᕐᖑᐃᖅᓯᕐᕕᐅᑉ ᓄᓇᖏᑦ ᑎᒍᒥᐊᖅᑕᐅᒌᖅᑐᑦ ‘ᑲᒥᓴᓇᐅᑉ ᓄᓇᖏᓐᓂ’ ᓄᓇᓕᐅᑉ ᒐᕙᒪᒃᑯᖏᑕ ᓄᓇᖏᓐᓂ ᐊᒻᒪᓗ ᐊᐅᓪᓛᖅᑕᐅᒋᐊᑭᒃᑲᔭᖅᑐᑦ ᓄᓇᕗᑦ ᒐᕙᒪᒃᑯᖏᓐᓄᑦ. ᑕᐃᒫᔅᓴᐃᓐᓇᐸᓗᑦᑕᐅ, ᐃᓚᖏᑦ ᓇᓗᓇᐃᖅᑕᐅᓯᒪᔪᑦ ᒥᕐᖑᐃᖅᓯᕐᕕᒻᒥ ᓄᓇᖏᓐᓂ ᐱᖃᓯᐅᔾᔨᓯᒪᑐᐃᓐᓇᕆᐊᖃᕐᖓᑕ ᐃᓄᐃᑦ ᓄᓇᖁᑎᖏᓐᓂ, ᐊᐅᓚᑕᐅᖃᓯᐅᑎᓪᓗᑎᑦ ᑐᓐᖓᕕᒃᑯᓐᓂ ᐊᒻᒪᓗ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐊᕕᑦᑐᖅᓯᒪᔪᓃᕝᕕᖓᓐᓄᑦ. ᒫᓐᓇᓕ ᐊᑐᐊᒐᓪᓚᕆᓐᓂᑦ ᐱᑕᖃᓐᖏᑦᑐᖅ ᒥᕐᖑᐃᖅᓯᕐᕖᑦ ᓄᓇᖏᓐᓄᑦ ᐃᓄᐃᑦ ᓄᓇᖁᑎᖏᓐᓂ, ᓄᓇᐃᑦ ᐊᐅᓚᑕᐅᖃᓯᐅᑎᔪᑦ ᒥᕐᖑᐃᖅᓯᕐᕖᑦ ᐊᐅᓚᑦᑎᔾᔪᑎᔅᓴᖏᑕ ᐸᕐᓇᐅᑎᖏᓐᓄᑦ, ᓴᒃᑯᖅᑕᐅᒍᓐᓇᖅᑐᑦ ᑐᓂᔭᐅᓗᑎᒃ ᓄᓇᕗᑦ ᒐᕙᒪᒃᑯᖏᓐᓄᑦ ᒥᕐᖑᐃᖅᓯᕐᕕᐅᓂᐊᖅᑎᓪᓗᒍ, ᐅᕝᕙᓘᓐᓃᑦ ᐊᔾᔨᐸᓗᖏᓐᓂ ᐋᖅᑭᔅᓯᒍᓐᓇᕐᒥᔪᑦ.
ᓄᓇᐃᑦ ᐊᐅᓪᓛᖅᑕᐅᓂᐊᕈᑎᒃ ᐸᕐᓇᒋᐊᖃᕋᔭᕐᒥᔪᑦ ᐊᕙᑎᖓᓐᓂ ᕿᒥᕐᕈᓗᑎᑦ ᑖᒃᑯᓄᖓ ᓄᓇᕗᑦ ᐊᑦᑐᖅᑕᐅᓂᐊᕐᓂᖏᓐᓄᑦ ᕿᒥᕐᕈᔨᖏᓐᓄᑦ ᐸᖅᑭᔭᐅᑦᑎᐊᖁᓪᓗᒋᑦ ᐅᕝᕙᓘᓐᓃᑦ ᐊᐅᓚᑕᐅᑦᑎᐊᖁᓪᓗᒋᑦ, ᐱᕙᓪᓕᐊᓂᕐᒥᑦ ᐊᐅᓚᑦᑎᓂᕐᒥᓪᓗ ᐱᑕᖃᕆᐊᖃᕐᓂᖏᓐᓄᑦ, ᐳᓚᕋᖅᑎᓄᑦ ᐊᑐᖅᑕᐅᔪᓐᓇᕐᓗᑎᑦ, ᐃᓄᐃᓪᓗᑦ ᐱᖅᑯᓯᖏᓐᓂ ᐃᓱᒪᒋᐊᖃᕐᓂᖏᓐᓂ, ᐊᑐᖅᑕᐅᔪᕐᓇᓂᖏᓐᓂᓪᓗ ᒪᓕᒋᐊᖃᕐᓂᖏᓐᓄᑦ ᓄᓇᕗᑦ ᐊᕙᑎᓕᕆᓂᕐᒥᑦ ᕿᒥᕐᕈᒋᐊᖃᕐᓂᖏᓐᓂ ᐊᒻᒪᓗ ᓄᓇᕗᑦ ᓄᓇᑖᕈᑎᐅᑉ ᐊᖏᕈᑎᖏᓐᓂ. ᒥᕐᖑᐃᖅᓯᕐᕖᑦ ᓄᓇᖏᑦ ᕿᒥᕐᕈᔭᐅᒐᔭᕐᒥᔪᑦ ᓄᓇᕗᑦ ᐸᕐᓇᑦᑎᖏᓐᓄᑦ ᒪᓕᑦᑎᐊᖁᓪᓗᒋᑦ ᐊᕕᑦᑐᖅᓯᒪᔪᓂᑦ ᓄᓇᓂᑦ ᐊᑐᖅᑕᐅᓂᐊᕐᓂᖏᓐᓄᑦ ᐸᕐᓇᐅᑎᓂᒃ.
ᐅᑭᐅᖅᑕᖅᑐᒥ ᒥᕐᖑᐃᖅᓯᕐᕖᑦ, ᑖᒃᑯᐊ ᓄᓇᐃᑦ ᖃᐅᔨᓴᖅᑕᐅᒐᔭᖅᑐᑦ ᐊᒻᒪᓗ ᓴᓂᕐᕙᑦᑕᐅᓗᑎᑦ ᒪᓕᓪᓗᑎᒃ ᐅᑭᐅᖅᑕᖅᑐᒥ ᒥᕐᖑᐃᖅᓯᕐᕖᑦ ᐱᖁᔭᖏᓐᓂ ᐊᔾᔨᒌᓐᖏᑦᑑᑎᐅᓗᑎᒃ ᐋᖅᑭᓱᖅᓯᒪᒐᔭᕐᖓᑕ ᐅᑭᐅᖅᑕᖅᑐᒥ ᒥᕐᖑᐃᓯᕐᕖᑦ ᐱᕕᖃᖅᑎᑕᐅᒋᐊᖃᕐᖓᑕ ᒪᓕᒐᕐᔪᐊᖅᑎᒍᑦ, ᓲᕐᓗ ᐊᕙᑎᑦᑎᓐᓂ ᒥᕐᖑᐃᖅᓯᕐᕖᑦ, ᓯᓚᒥ ᒥᕐᖑᐃᖅᓯᕐᓂᖅ, ᐱᑐᖃᕐᓂᓪᓘᓐᓃᑦ ᐃᓗᓕᖃᖅᑲᑦ ᒥᕐᖑᐃᖅᓯᕐᕕᒃ. ᐃᓚᒋᖃᓯᐅᑎᓗᒋᑦ ᒥᕐᖑᐃᖅᓯᕐᕖᑦ ᓄᓇᑦᑎᐊᕙᐃᓪᓗ, ᐅᑭᐅᖅᑕᖅᑐᒥ ᒥᕐᖑᐃᖅᓯᕐᕖᑦ ᐱᖁᔭᖏᑦ ᓇᓗᓇᐃᖅᓯᓯᒪᕗᑦ ᐱᔾᔪᑎᖏᓐᓂ ᒥᕐᖑᐃᖅᓯᕐᕕᐅᓂᐊᕐᓂᖏᓐᓂ, ᒪᓕᒐᖃᕐᓗᑎᑦ ᐊᐅᓚᓂᔅᓴᖏᓐᓂ ᐊᑎᖅᑕᐅᓂᐊᕐᓂᖏᓐᓂᓪᓗ; ᓇᓗᓇᐃᖅᓯᒪᑦᑎᐊᕐᓗᒋᓪᓗ ᐊᑦᑐᐊᓂᖃᖅᑐᓂᑦ ᐅᑭᐅᖅᑕᖅᑐᒥ ᒥᕐᖑᐃᖅᓯᕐᕕᖏᓐᓂ, ᐅᑭᐅᖅᑕᖅᑐᒥ ᓄᓇᐃᑦ ᐸᖅᑭᔭᐅᒋᐊᖃᕐᓂᖏᑦ, ᐊᓯᖏᓪᓗ ᓄᓇᑦᑎᐊᕙᐃᑦ ᓲᕐᓗ ᑰᑐᖃᐃᑦ. ᐱᖁᔭᖓᓐᓂ ᒪᓕᒋᐊᖃᕐᒥᔪᖅ ᒥᕐᖑᐃᖅᓯᕐᕕᓐᓂᑦ ᑲᑐᔾᔨᖃᑎᖃᕐᓗᑎᑦ ᓄᓇᓕᓐᓂ ᑲᒪᓗᑎᑦ ᐊᒻᒪᓗ ᓄᓇᓖᑦ ᐱᕚᓪᓕᕈᑎᖃᕐᓗᑎᒃ ᒥᕐᖑᐃᖅᓯᕐᕕᕈᖅᑕᐅᓂᖓᓐᓄᑦ ᓄᓇ.
