ᖃᐅᔨᓴᖅᑕᐅᓂᖏᑦ
ᓯᕗᓪᓕᖅᐹᒥᓕ ᐱᒋᐊᕋᔭᖅᑐᑦ ᒥᕐᖑᐃᖅᓯᕐᕕᒻᒥ ᓇᓗᓇᐃᖅᑕᐅᓗᑎᒃ ᐊᑐᖅᑕᐅᒍᒪᒐᔭᖅᑐᑦ ᓄᓇᐃᑦ. ᑕᐃᒪᓕᖓ, ᒥᕐᖑᐃᖅᓯᕐᕕᕈᖅᑎᑕᐅᒍᒪᔪᖅ ᓇᓗᓇᐃᖅᑕᐅᑦᑕᖅᑯᖅ ᒥᕐᖑᐃᖅᓯᕐᕕᓂᒃ ᐸᕐᓇᐅᑎᑎᒍᑦ, ᓄᓇᓕᓐᓂᑦ ᐅᕝᕙᓘᓐᓃᑦ ᐊᕕᑦᑐᖅᓯᒪᔪᓂᒃ ᓄᓇᓂᑦ ᐊᑐᖅᑕᐅᕙᑦᑐᓂᒃ ᐸᕐᓇᐅᑎᖏᑦᑎᒍᑦ ᐅᕝᕙᓘᓐᓃᑦ ᑎᑎᕋᕇᖅᓯᒪᔪᓂᒃ ᐅᓂᒃᑳᓕᐅᓕᕐᓗᑎᒃ ᐱᕙᓪᓕᐊᑎᑦᑎᓂᕐᒥᑦ ᐸᕐᓇᐅᑎᓂᒃ, ᓂᕐᔪᑎᓂᒃ ᖃᐅᔨᓴᕈᑎᒥᓂᕐᓂᑦ ᐅᓂᒃᑳᕐᓂᑦ, ᐱᖅᑯᓯᕐᓂᑦ ᐅᕝᕙᓘᓐᓃᑦ ᐃᑦᑕᕐᓂᓴᓕᕆᓂᕐᒥᑦ ᖃᐅᔨᓴᖅᑕᒥᓂᕐᓂᑦ. ᓄᓇᓖᑦ ᑐᔅᓯᕋᕈᓐᓇᕐᒥᔪᑦ ᒥᕐᖑᐃᖅᓯᕐᕕᓕᐊᖑᖁᔭᖓᓐᓂ, ᒪᓕᓪᓗᑎᒃ ᓇᒻᒥᓂᖅ ᖃᐅᔨᓴᖅᑕᒥᓂᖏᓐᓂ, ᕿᒥᕐᕈᔭᒥᓂᖏᓐᓂ ᖃᐅᔨᒪᓂᖏᓐᓂᓪᓘᓐᓃᑦ ᐱᒻᒪᕆᐅᒋᔭᖓᓐᓂ.
ᓄᓇᕗᑦ ᒥᕐᖑᐃᖅᓯᕐᕖᑦ ᓄᐊᑦᑎᓗᑎᒃ ᑐᓴᕈᑎᓂᑦ ᒥᕐᖑᐃᖅᓯᕐᕕᓕᕆᓂᕐᒨᖓᔪᓂᒃ ᐅᓂᒃᑳᓕᐊᖑᓯᒪᔪᓂᒃ, ᐊᓯᖏᓐᓂᓪᓗ ᑐᓴᕈᑎᓂᒃ ᐊᑐᐃᓐᓇᐅᒐᔭᖅᑐᓂᖅᑲᐃ ᒐᕙᒪᑐᖃᒃᑯᓐᓂ ᐅᑭᐅᖅᑕᖅᑐᒥᓪᓗ ᐊᕕᑦᑐᖅᓯᒪᔪᓂᒃ ᒐᕙᒪᒃᑯᖏᓐᓂ, ᐆᒪᔪᓕᕆᔨᒃᑯᓐᓂ, ᕼᐊᒻᒪᓚᒃᑯᓐᓂ, ᐆᒪᔪᕐᓂᐊᖅᑎᒃᑯᓐᓂ, ᐅᕝᕙᓘᓐᓃᑦ ᐃᖅᑲᓇᐃᔭᕐᕕᓐᓂᑦ ᓲᕐᓗ ᐃᓄᐃᑦ ᐃᑦᑕᕐᓂᓴᓕᕆᔨᒃᑯᑦ ᑮᓇᐅᔭᓂᒃ ᐸᐸᑦᑎᔨᖏᓐᓂ, ᐅᕝᕙᓘᓐᓃᑦ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓂ. ᑕᒪᒃᑯᐊ ᑐᓴᕈᑎᑦ ᑐᖅᑯᖅᑕᐅᒐᔭᖅᑐᑎᑦ ᓯᕗᓪᓕᖅᐹᒥ ᒥᕐᖑᐃᖅᓯᕐᕕᓐᓂ ᐊᑐᕋᔅᓴᐃᑦ ᐃᓗᓕᖃᐅᖅᑐᑎᑦ ᑐᑭᓯᒋᐊᕈᑎᓂᒃ ᐱᖅᑯᓯᖏᓐᓂ ᓄᓇᓂᓪᓗ ᐊᑐᖅᑕᐅᔪᓐᓇᖅᑐᓂᒃ ᐊᒻᒪᓗ ᒥᕐᖑᐃᖅᓯᕐᕕᐅᔪᓐᓇᖅᑐᓂᒃ ᒪᑭᒪᔾᔪᑎᔅᓴᓂᓪᓗ ᒥᕐᖑᐃᖅᓯᕐᕕᕈᕐᓂᐊᕐᓂᖅᑲᑦ ᐅᑭᐅᖅᑕᖅᑐᒥ ᐱᖃᓯᐅᔾᔨᒋᐊᖃᕐᒥᔪᑦ ᓇᓗᓇᐃᖅᓯᒪᓪᓗᑎᓪᓗ ᑎᑎᕋᖅᑕᐅᓯᒪᓗᑎᒃ ᐱᕚᓪᓕᕈᑎᐅᔪᓐᓇᖅᑐᑦ ᒥᕐᖑᐃᖅᓯᕐᕕᕈᕐᓂᐊᖅᑲᑦ. ᓄᓇᕗᑦ ᒥᕐᖑᐃᖅᓯᕐᕕᖏᑦ ᓴᖅᑮᒐᔭᖅᑐᑦ ᓯᕗᓪᓕᖅᐹᖅᓯᐅᑎᓂᒃ ᒥᕐᖑᐃᖅᓯᕐᕕᕈᖁᔭᐅᔪᒥᑦ ᓄᓇᓕᒻᒧᑦ, ᐅᖃᐅᓯᕆᓪᓗᒋᓪᓗ ᐃᓗᓕᕆᒐᔭᖅᑕᖏᑦ ᒥᕐᖑᐃᖅᓯᕐᕕᐅᑉ ᐊᑦᑐᐊᓂᖃᖅᑐᓪᓘᓐᓃᑦ ᑕᒪᑐᒧᖓ.
ᒥᕐᖑᐃᖅᓯᕐᕕᕈᕈᓐᓇᖅᑑᔮᖅᑲᑦ, ᓄᓇᓖᑦ ᐊᖏᖅᓯᖅᑳᕆᐊᖃᖅᑐᑦ ᐃᓗᓕᕆᒐᔭᖅᑕᖏᓐᓂ, ᒥᕐᖑᐃᖅᓯᕐᕕᓄᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᕐᓂᑦ ᓴᖅᑭᖅᑐᖃᕋᔭᖅᑐᓂ. ᑖᒃᑯᐊ ᑲᑎᒪᔨᕋᓛᑦ ᐃᓄᖃᕋᔭᖅᑐᑦ ᐆᒪᔪᕐᓂᐊᖅᑎᒃᑯᓐᓃᖔᖅᓯᒪᔪᒥᑦ, ᐃᓐᓇᕐᒥᑦ, ᕼᐊᒻᒪᓚᒃᑯᓐᓂ, ᓄᓇᓕᓐᓂ ᓄᓇᓕᕆᔩᑦ ᑲᑎᒪᔨᕋᓛᖏᓐᓂ, ᐃᓅᓱᑦᑐᒥᑦ, ᐊᒻᒪᓗ ᐊᓯᖏᓐᓂ ᑲᑐᔾᔨᖃᑎᒌᓐᓂᒃ ᐱᖃᑕᐅᒍᒪᒐᔭᖅᑐᓂᒃ.
ᐅᖃᐅᔾᔭᐅᒋᐊᖃᑦᑕᕐᓗᑎᒃ ᑲᑎᒪᔨᕋᓛᓂᒃ, ᓄᓇᕗᑦ ᒥᕐᖑᐃᖅᓯᕐᕕᖏᑦ ᐱᔭᕇᖅᓯᓗᑎᒃ ᖃᐅᔨᓴᐅᑎᒥᓂᖏᓐᓂ ᒪᑯᓂᖓ ᖃᐅᔨᓴᖅᑕᒥᓂᖏᓐᓂ ᕿᒥᕐᕈᓯᒪᔭᖏᓐᓂᓪᓗ ᐊᑐᖅᑕᐅᔪᓐᓇᖅᑐᓂᒃ ᐱᖃᓯᐅᔾᔨᓗᑎᒃ ᓄᓇᑐᖃᒥᓂᕐᓂᑦ ᐃᑦᑕᕐᓂᓴᖃᖅᑐᓂᓪᓗ, ᓂᕐᔪᑎᓂᑦ, ᐃᓂᖏᓐᓂ ᓄᓇᒥᓗ ᐱᕈᖅᑐᓂᑦ, ᓄᓇᐃᓪᓗ ᓇᒦᓐᓂᖏᓐᓂᓪᓗ, ᓯᕗᓪᓕᖅᐹᖅᓯᐅᑎᓂᒃ ᐅᔭᕋᕐᓂᐊᓂᕐᒧᑦ ᕿᒥᕐᕈᔭᐅᓯᒪᔪᓂᒃ, ᓄᓇᐃᑦ ᐊᑎᖏᓐᓂ ᐊᓯᖏᓂᓪᓗ ᐅᑉᐱᕆᔭᐅᔪᓂᒃ. ᖃᐅᔨᓴᐅᑎᒥᓂᖏᑦ ᑎᑎᕋᖅᓯᒪᒋᐊᖃᕐᒥᔪᑦ ᐱᕙᓪᓕᐊᔪᓕᕆᓂᕐᒥᑦ ᐱᑕᖃᕆᐊᓕᓐᓂᒃ ᒪᓂᒪᔾᔪᑎᔅᓴᐅᔪᓂᓪᓗ, ᐳᓚᕋᖅᑐᓕᕆᓂᕐᒥᑦ ᒥᕐᖑᐃᖅᓯᕐᕕᐅᔪᓐᓇᖅᑐᓂᓪᓗ, ᓇᓗᓇᐃᓯᓗᑎᓪᓗ ᐊᔾᔨᒌᓐᖏᑦᑐᓂᒃ ᒥᕐᖑᐃᖅᓯᕐᕕᐅᑉ ᐃᓗᐊᓃᑦᑐᓂᒃ ᐃᓱᒪᒋᔭᐅᒐᔭᖅᑐᓂᒃ.
ᐱᖃᑕᐅᓗᑎᓪᓗ ᓄᐊᑦᑎᓂᖏᓐᓂ ᑐᓴᕈᑎᓂᒃ ᕿᒥᕐᕈᓗᒋᓪᓗ ᖃᐅᔨᓴᐅᑎᒥᓃᑦ, ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᖏᑦ ᐱᖃᑦᑕᕐᓗᑎᒃ ᕿᒥᕐᕈᖃᑦᑕᕐᓗᒋᓪᓗ ᐅᖃᐅᓯᐅᓯᒪᔪᑦ ᐃᓱᒫᓘᑎᐅᔪᓪᓗ ᐃᓄᓐᓄᑦ ᐃᑲᔪᖃᑦᑕᕐᓗᑎᓪᓗ ᓄᓇᓕᓐᓂ ᑲᑎᒪᑎᑦᑎᓂᕐᒥᑦ. ᑲᑎᒪᔨᕋᓛᖅᑎᒍᑦ, ᓄᓇᕗᑦ ᒥᕐᖑᐃᖅᓯᕐᕖᑦ ᐊᐱᖅᓱᖃᑦᑕᕐᓗᑎᑦ ᐃᓐᓇᕐᓂᖏᑦ ᐊᓯᖏᓐᓂᓪᓗ; ᑭᒃᑯᑐᐃᓐᓇᕐᓂᑦ ᑲᑎᒪᑎᑦᑎᖃᑦᑕᕐᓗᑎᑦ ᓈᓚᐅᑎᒃᑯᓪᓗ ᐅᓂᒃᑳᖃᑦᑕᕐᓗᑎᑦ; ᐱᕙᓪᓕᐊᔪᓕᐅᖃᑦᑕᕐᓗᑎᓪᓗ ᐅᓪᓗᒥᒧᓪᓗ ᐋᖅᑭᓱᖅᑕᐅᓯᒪᔪᓂᒃ ᑐᓴᖅᑎᑦᑎᖃᑦᑕᕐᓗᑎᒃ ᑕᐃᒃᑯᓇᓐᖓᑦ ᐱᖃᑕᐅᔪᓕᒫᓂᑦ ᑐᓴᐅᒪᑎᑦᑏᓐᓇᕐᓗᑎᓪᓗ ᐱᓕᕆᐊᕆᕙᓪᓕᐊᔭᖏᓐᓂ ᐱᕕᖃᑦᑎᑕᐅᑦᑎᐊᖃᑦᑕᕐᓗᑎᓪᓗ ᑕᐃᒃᑯᐊ. ᓯᕗᓪᓕᖅᐹᖓᓐᓂ ᐅᖃᖃᑎᖃᕐᓗᑎᑦ ᓄᓇᕗᑦ ᐸᕐᓇᑦᑎᖏᑦᑕ ᑲᑎᒪᔨᖏᓐᓄᑦ ᑐᔅᓯᕋᐅᑎᖓᓐᓂ ᒥᕐᖑᐃᖅᓯᕐᕕᒻᒥ ᒪᓕᑦᑎᐊᕋᓗᐊᕐᒪᖔᑕ ᐊᕕᑦᑐᖅᓯᒪᔪᓂᒃ ᓄᓇᓂᑦ ᐊᑐᖅᑕᐅᕙᑦᑐᓂᒃ ᐸᕐᓇᐅᑎᖏᓐᓂ.
ᑭᖑᓂᖓᓂ ᖃᐅᔨᓴᓚᐅᖅᑎᓪᓗᒋᑦ ᐊᑐᓕᖁᔭᒥᓂᒃ ᓴᖅᑮᒐᔭᖅᑐᑦ, ᓄᓇᓖᑦ, ᒥᕐᖑᐃᖅᓯᕕᐅᑉ ᐃᓗᓕᕆᒐᔭᖅᑕᖏᓐᓂ ᐃᑲᔪᖅᑐᖅᑕᐅᓗᑎᒃ ᓄᓇᓕᓐᓂᑦ ᑭᓪᓕᒋᓂᐊᖅᑕᖏᓐᓂᓪᓗ, ᓄᓇᒥᐅᑕᐃᓪᓗ, ᓄᓇᑐᖃᐃᓪᓗ, ᐳᓚᕋᖅᑐᓕᕆᓂᖅ ᒥᕐᖑᐃᖅᓯᕈᑕᐅᔪᓐᓇᖅᑐᓪᓗ, ᓄᓇᓕᓐᓂ ᐱᕙᓪᓕᐊᒋᐊᖃᕐᓂᖏᑦ, ᒥᕐᖑᐃᖅᓯᕐᕕᒻᒥ ᐊᐅᓚᑦᑎᓂᖏᓐᓂ ᐱᕙᓪᓕᐊᒋᐊᖃᕐᓂᖏᓐᓂᓪᓗ ᐱᑕᖃᕆᐊᖃᖅᑐᑎᑦ. ᒥᕐᖑᐃᖅᓯᕐᕕᒃ ᐃᓗᓕᖃᕈᓐᓇᕐᖓᑦ ᒪᑯᓂᖓ ᐃᓄᐃᑦ ᓄᓇᖁᑎᖏᓐᓂ, ᐅᕝᕙᓘᓐᓃᑦ ᒐᕙᒪᑐᖃᒃᑯᓐᓂ ᐊᐅᓚᑕᐅᔪᓂᒃ ᓄᓇᓂᒃ ᓲᕐᓗ ᐃᒪᖏᓐᓂ ᓯᔾᔭᖏᓐᓂᓪᓗ; ᑭᓯᐊᓂᓕ ᐃᓕᓴᖅᓯᓯᒪᓗᑎᒃ ᑭᓪᓕᒋᓂᐊᖅᑕᖏᓐᓂ ᐊᐅᓚᑕᐅᒋᐊᖃᕐᓂᐊᖅᑐᓂᓪᓗ ᐃᓱᒪᒋᔭᐅᒋᐊᖃᕐᓂᐊᕐᒥᒻᒪᑕ ᑕᒪᒃᑯᐊ ᑲᒪᒋᔭᐅᓂᖏᑦ ᐃᓄᐃᑦ ᓄᓇᖁᑎᖏᑦ ᒐᕙᒪᑐᖃᒃᑯᓂᓪᓗ.
ᕿᒥᕐᕈᔭᐅᓚᐅᖅᑎᓪᓗᒋᑦ ᑐᓴᕈᑎᓕᒫᑦ ᓴᖅᑭᖅᑕᐅᔪᑦ ᖃᔨᓴᐅᑎᒥᓃᑦ, ᐅᖃᐅᓯᒥᓃᑦ ᑲᑎᒪᑎᑦᑎᓚᐅᖅᑎᓪᓗᒋᑦ ᐃᓄᓕᒫᓂᑦ, ᓄᓇᓕᒃ ᐊᖏᖅᓯᖁᔭᐅᓕᕋᔭᓕᕐᒥᔪᖅ ᒥᕐᖑᐃᖅᓯᕐᕕᒻᒧᑦ ᐱᓕᕆᐊᖑᒐᔭᖅᑐᓂᒃ, ᐊᑐᓕᖁᔨᓗᑎᓪᓗ ᒥᕐᖑᐃᖅᓯᕐᕕᒻᒥ ᖃᐅᔨᓴᖅᑕᐅᓗᑎᒃ ᑖᒃᑯᓄᖓᖅᑕᐅᓗᑎᒃ ᒥᓂᔅᑕᖓᓐᓄᑦ, ᐊᕙᑎᓕᕆᔨᒃᑯᓐᓄᑦ. ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᖏᑦ ᐱᔪᒪᒐᔭᕐᒥᔪᑦ ᑎᑎᖅᑲᓂᑦ ᐃᑲᔪᖅᑐᐃᔾᔪᑎᐅᔪᓂᒃ, ᓄᓇᓖᑦ ᑲᑐᔾᔨᔨᖏᓐᓂ, ᑲᑎᒪᔨᖃᑎᒌᓐᓂᒃ, ᕼᐊᒻᒪᓚᒃᑯᓐᓂ ᐊᓯᖏᓐᓂᓪᓗ ᐱᑕᖃᐅᒍᒪᓯᒪᔪᓂᒃ. ᓄᓇᕗᑦ ᒥᕐᖑᐃᖅᓯᕐᕕᒃᑯᑦ ᐊᒻᒪᓗ ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᖏᑦ ᐊᑐᓕᖁᔭᖏᓐᓂ ᓴᖅᑮᒐᔭᖅᑐᑎᑦ ᐊᕕᑦᑐᖅᓯᒪᔪᓄᑦ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᑐᓴᕈᑎᐅᓗᑎᒃ ᐃᑲᔪᖅᑐᖅᑕᐅᔪᒪᓗᑎᓪᓗ ᐱᓕᕆᐊᖏᓐᓂ.
ᒥᓂᔅᑕ ᕿᒥᕐᕈᑦᑕᓕᖅᑯᖅ ᖃᐅᔨᓴᐅᑎᒥᓂᕐᓂᑦ, ᓄᓇᓕᓐᓂᑦ ᐊᑐᓕᖁᔭᐅᓯᒪᔪᑦ, ᐃᑲᔪᖅᑐᐃᔾᔪᑎᒥᓃᓪᓗ ᐱᓕᕆᐊᒧᑦ. ᐃᑲᔪᖅᑐᐃᓐᓂᖅᑲᑦ, ᒥᓂᔅᑕ ᑎᓕᓯᑦᑕᓕᖅᑯᖅ ᓄᓇᕗᑦ ᒥᕐᖑᐃᖅᓯᕐᕕᒃᑯᓐᓂ ᑲᔪᓯᖁᓪᓗᒋᑦ ᒥᕐᖑᐃᖅᓯᕐᕕᓐᓂᑦ ᐸᕐᓇᐅᑎᖏᓐᓂ ᐱᕙᓪᓕᐊᓂᖏᓐᓂᓪᓗ ᑖᒃᑯᐊᓗ ᐃᓚᒋᔭᐅᖃᑦᑕᕐᓗᑎᒃ ᐃᓄᐃᑦ ᐊᑦᑐᖅᑕᐅᓂᐊᕐᓂᖏᓐᓄᑦ ᐱᕚᓪᓕᕈᑎᔅᓴᓄᓪᓗ ᐊᖏᕈᑎᖏᓐᓂ ᐅᑭᐅᖅᑕᖅᑐᒥ ᒥᕐᖑᐃᖅᓯᕐᕕᖏᓐᓂ. ᐃᓄᐃᑦ ᐊᑦᑐᖅᑕᐅᓂᐊᕐᓂᖏᓐᓄᑦ ᐱᕚᓪᓕᕈᑎᔅᓴᓄᓪᓗ ᐊᖏᕈᑎᖏᑦ ᐊᖏᕆᐊᖃᕐᖓᑕ ᑕᒪᒃᑯᓄᖓᓕᒫᖅ ᐱᑕᓕᓐᓄᑦ, ᑐᔅᓯᕋᐅᑎᓐᓄᑦ, ᓯᕗᓂᑦᑎᓂᓪᓗ ᐅᑭᐅᖅᑕᖅᑐᒥ ᒥᕐᖑᐃᖅᓯᕐᕕᐅᒐᔭᖅᑐᓂᒃ, ᐃᓱᒪᖅᓴᖅᓯᐅᕆᐊᖃᖅᑐᑎᓪᓗ ᒥᕐᖑᐃᖅᓯᕐᕕᓅᖓᔪᓂᒃ ᓲᕐᓗ ᐃᓕᓐᓂᐊᑎᑦᑎᓂᕐᒥᑦ ᐃᖅᑲᓇᐃᔮᔅᓴᐅᒐᔭᖅᑐᓂᓪᓗ; ᒥᕐᖑᐃᖅᓯᕐᕕᓂᑦ ᑐᓴᕈᑎᓂᒃ; ᐳᓚᕋᖅᑐᓄᑦ ᐊᑐᖅᑕᐅᓂᐊᕐᓂᖏᓐᓄᑦ; ᐊᒻᒪᓗ ᒥᕐᖑᐃᖅᓯᕐᕕᐅᑉ ᓄᓇᖓᓐᓂ, ᐱᖅᑯᓯᖏᓐᓂ ᐅᔭᕋᕐᓂᐊᕋᔅᓴᓂᓪᓗ.
ᐃᓄᐃᑦ ᐊᑦᑐᖅᑕᐅᓂᐊᕐᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑏᑦ ᓇᓗᓇᐃᖅᓯᒐᔭᕐᒥᔪᑦ ᑲᑐᔾᔨᓂᐊᖅᑐᓂᒃ ᐊᐅᓚᑦᑎᔨᓂᒃ ᓄᓇᓕᓐᓂᑦ ᐅᑭᐅᖅᑕᖅᑐᒥᓪᓗ ᐊᕕᑦᑐᖅᓯᒪᔪᓃᖔᖅᑐᓂᒃ, ᓴᖅᑭᖅᑕᐅᓗᑎᒃ ᒥᕐᖑᐃᖅᓯᕐᕕᓕᕆᑐᐃᓐᓇᕐᓂᐊᖅᑐᓂᒃ ᐊᖅᑯᑎᖃᕐᓗᑎᒃ ᒥᕐᖑᐃᖅᓯᕐᕕᒻᒨᖓᔪᓂᒃ ᓇᓗᓇᐃᒃᑯᑎᖃᕐᓗᑎᒃ ᐃᓚᓯᒐᔭᖅᑐᑦ ᒥᕐᖑᐃᖅᓯᕐᕕᒻᒥ ᐃᓄᐃᑦ ᐊᑦᑐᖅᑕᐅᓂᐊᕐᓂᖏᓐᓄᑦ ᐱᕚᓪᓕᖁᑎᔅᓇᖏᓐᓄᓪᓗ ᐊᖏᕈᑎᖓᓐᓄᑦ.
ᐱᓕᕆᖃᑎᖃᐃᓐᓇᕐᓗᑎᒃ ᐃᓄᐃᑦ ᐊᑦᑐᖅᑕᐅᓂᐊᕐᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑎᖏᓐᓂ, ᒥᕐᖑᐃᖅᓯᕐᕕᓅᖓᔪᓂᒃ ᓇᓗᓇᐃᒃᑯᑎᖏᓐᓂ ᐊᐃᕙᐅᑎᖃᓕᕋᔭᖅᑐᑦ ᓄᓇᕗᑦ ᒐᕙᒪᒃᑯᑦ, ᓄᓇᕗᑦ ᑐᓐᖓᕕᒃᑯᑦ ᑕᐃᑯᐊᓗ ᐊᕕᑦᑐᖅᓯᒪᔪᓂᒃ ᐃᓄᐃᑦ ᑲᑐᔾᔨᖃᑎᒌᖏᓐᓂ ᐊᒻᒪᓗ ᐃᓕᓴᖅᓯᒐᔭᖅᑐᑎᒃ ᐸᕐᓇᐅᑎᐅᒋᐊᓕᓐᓂᒃ ᐊᐅᓚᑕᐅᒋᐊᓕᓐᓂᓪᓗ ᐊᑦᑐᐊᓂᖃᖅᑐᓄᓪᓗ ᐃᓱᒪᓕᐅᕐᓂᐊᕐᓂᕐᒥᑦ ᒪᑯᓂᖓ ᐃᓱᒪᖃᕆᐊᖃᖅᑐᑎᑦ ᐅᒃᑯᓯᔅᓴᓂᒃ, ᓄᓇᓕᕋᓛᕐᓂᑦ, ᐃᓪᓗᕋᓛᓂᒃ ᐅᔭᕋᕐᓂᐊᕋᔅᓴᓂᓪᓗ. ᐃᓱᒪᓕᐅᕈᓐᓇᑐᐃᓐᓇᕆᐊᓖᑦ ᐊᑐᔅᓴᐃᓐᓇᕆᐊᖃᕆᐊᖃᖅᑐᒋᓇᒋᑦ ᒥᕐᖑᐃᖅᓯᕐᕕᒻᒨᖓᔪᓂᒃ ᓇᓗᓇᐃᒃᑯᑎᓂᒃ, ᐅᕝᕙᓘᓐᓃᑦ ᐃᓚᓕᐅᔾᔭᐅᒍᓐᓇᕆᓪᓗᑎᑦ ᓴᖅᑭᕇᖅᓯᒪᔪᓂᖅᑲᐃ ᐊᔾᔨᐸᓗᖏᓐᓂ ᑲᑐᔾᔨᔨᓂᒃ ᐅᕝᕙᓘᓐᓃᑦ ᐊᕕᑦᑐᖅᓯᒪᔪᓂᒃ ᒥᕐᖑᐃᖅᓯᕐᕕᒻᒥ.
ᐱᖃᓯᐅᔾᔨᑐᐃᓐᓇᕆᐊᖃᕐᒥᒻᒪᑦ ᒥᕐᖑᐃᖅᓯᕐᕕᓐᓂ ᐊᐅᓚᑕᐅᒋᐊᖃᖅᑐᓂᒃ ᐃᓱᒪᓕᐅᕆᐊᖃᕐᓂᖏᓐᓂ, ᒥᕐᖑᐃᖅᓯᕐᕕᓅᖓᔪᓂᑦ ᓇᓗᓇᐃᒃᑯᑏᑦ ᐱᔭᕇᕋᔭᓐᖏᑦᑐᑦ ᑭᓯᐊᓂᓕ ᑭᖑᓂᖓᓐᓂ ᐸᕐᓇᑦᑕᐅᓚᐅᖅᓪᓗᒋᑦ. ᐊᖏᖅᑕᐅᓚᐅᖅᑎᓪᓗᒋᑦ ᖃᐅᔨᓴᐅᑎᒥᓃᑦ, ᒥᓂᔅᑕ ᑎᓕᓯᒐᔭᖅᑐᖅ ᓄᓇᕗᑦ ᒥᕐᖑᐃᖅᓯᕐᕕᖏᓐᓂ ᐊᐃᕙᖃᑎᖃᖁᓪᓗᓂᒋᑦ ᒥᕐᖑᐃᖅᓯᕐᕕᓐᓅᖓᔪᓂᒃ ᓇᓗᓇᐃᒃᑯᑎᓂᒃ ᑐᓐᖓᕕᒃᑯᓐᓂ ᐊᒻᒪᓗ ᐊᕕᑦᑐᖅᓯᒪᔪᓂᒃ ᐃᓄᐃᑦ ᑲᑐᔾᔨᖃᑎᒌᖏᓐᓂ ᐋᖅᑮᖁᓪᓗᒋᑦ ᐊᐅᓚᑦᑎᔾᔪᑎᒋᖃᓯᐅᑎᓂᐊᖅᑕᖏᓐᓂ ᐅᖃᐅᔾᔨᒋᐊᕆᖃᑦᑕᕋᔭᖅᑐᑎᒃ ᐊᑐᓕᖁᔭᐅᔪᓂᓪᓗ ᐃᓚᖃᕐᓗᑎᒃ ᒥᕐᖑᐃᖅᓯᕐᕕᓐᓂ ᐸᕐᓇᐅᑎᖏᓐᓂ, ᑲᒪᓂᖏᓐᓂ ᐊᐅᓚᑦᑎᓂᖏᓐᓂᓪᓗ, ᐊᑖᓂ ᑕᒪᓐᓇ ᓇᓗᓇᐃᖅᓯᒪᓪᓗᓂ.
ᒥᕐᖑᐃᖅᓯᕐᕕᓂ ᐸᕐᓇᐅᑏᑦ ᐊᐅᓚᑕᐅᓂᔅᓴᖏᓐᓂᓪᓗ ᓂᕆᐅᒋᔭᐅᒐᔭᖅᑐᑦ ᐅᑭᐅᒐᓚᓐᓂᒃ ᐃᖏᕐᕋᓂᖃᕋᔭᖅᑐᑎᑦ. ᐱᕕᖃᖁᓪᓗᒋᑦ ᓄᓇᕗᑦ ᒥᕐᖑᐃᖅᓯᕐᕕᒃᑯᖏᑦ ᓄᓇᓕᓐᓂᓪᓗ ᓇᓗᓇᐃᖅᓯᒪᑦᑎᐊᖅᑐᓂᒃ ᕿᒥᕐᕈᓂᖏᓐᓂ ᖃᐅᔨᓴᕐᓂᖏᓐᓂᓪᓗ ᐃᓗᓕᖏᓐᓂ ᒥᕐᖑᐃᖅᓯᕐᕕᐅᑉ ᓇᓗᓇᐃᖅᓯᒪᓪᓗᑎᒃ ᐃᓄᐃᑦ ᐊᑦᑐᖅᑕᐅᓂᐊᕐᓂᖏᓐᓄᑦ ᐱᕚᓪᓕᕈᑎᔅᓴᓄᓪᓗ ᐊᖏᕈᑎᖓᓐᓂ, ᐊᒻᒪᓗ ᐱᔭᕇᔭᕆᐊᖃᖅᑐᑎᑦ ᒥᕐᖑᐃᖅᓯᕐᕕᐅᑉ ᑭᓪᓕᔅᓴᖏᓐᓂ, ᐱᔭᕇᕐᓗᒋᓪᓗ ᒥᕐᖑᐃᖅᓯᕐᕕᓐᓂ ᐊᐅᓚᑦᑎᔾᔪᑎᔅᓴᓄᑦ ᐸᕐᓇᐅᑎᓂᒃ ᐊᒻᒪᓗ ᒥᓂᔅᑕ ᐊᐱᕆᔭᕆᐊᖃᕆᓪᓗᓂ ᑲᓇᑕᒥ ᓴᓂᕐᕙᐃᖁᔨᓪᓗᑎᒃ ᓄᓇᓂᑦ ᒥᕐᖑᐃᖅᓯᕐᕕᕈᖁᔭᐅᔪᓂᒃ ᖃᐅᔨᓴᐅᑎᒥᓂᖏᓐᓂ ᐃᓕᓯᒪᑲᐃᓐᓇᖅᑐᓄᑦ ᓄᓇᓂᑦ ᓴᓂᕐᕙᐃᓂᕐᒧᑦ ᑐᔅᓯᕋᐅᑎᓂᒃ. ᐊᖏᖅᑕᐅᑉᐸᑕ ᑲᓇᑕᒧᑦ, ᓄᓇᒥᑦ ᓴᓂᕐᕙᐃᑲᐃᓐᓇᓂᕐᒧᑦ ᖃᐅᔨᓴᖅᑕᐅᓯᒪᔪᖅ ᐊᓯᖏᓐᓄᑦ ᐊᑐᖅᑕᐅᖁᔭᖏᑦ ᐊᑦᑐᐃᓂᖃᕈᓐᓇᖅᑐᓂᒃ ᒥᕐᖑᐃᖅᓯᕐᕕᒻᒥ ᓯᕗᓂᑦᑎᓐᓂ, ᐊᖏᖅᑕᐅᓯᒪᒋᐊᖃᕋᔭᖅᑐᖅ ᖃᓄᑎᒋᑦ ᐊᑯᓂ ᑕᐃᒪᐃᓕᖓᓂᐊᕐᒪᖔᕐᓗ.
ᒥᓂᔅᑕ ᐊᖏᖅᑐᑑᒋᐊᖃᓐᖏᒻᒥᔪᖅ ᑭᖑᓪᓕᖅᐹᒥᓕ ᐊᖏᖅᑕᐅᒋᐊᖃᖅᑐᖅ ᒥᓂᔅᑕᒧ ᐅᕝᕙᓘᓐᓃᑦ ᒥᓂᔅᑕᐃᑦ ᑲᑎᒪᔨᖏᓐᓄᑦ ᓴᓂᕐᕙᖅᑕᐅᖁᓪᓗᒍ ᐅᑭᐅᖅᑕᖅᑐᒥ ᒥᕐᖑᐃᖅᓯᕐᕕᐅᓂᐊᖅᑐᖅ. ᒥᓂᔅᑕ ᐃᓕᓴᖅᓯᓯᒪᒋᐊᖃᖅᑐᖅ ᒥᕐᖑᐃᖅᓯᕈᖅᑎᑕᐅᓂᐊᖅᑐᒥᑦ, ᐊᖏᓂᖏᑦ, ᑭᓪᓕᖏᑦ, ᐊᐅᓚᑕᐅᓂᖏᓪᓗ ᐊᓯᖏᓐᓂᓪᓗ ᐃᓱᒪᓕᐅᖅᑕᐅᒋᐊᖃᕐᓂᖏᓐᓂ ᒥᕐᖑᐃᖅᓯᕐᕖᑦ ᐸᕐᓇᐅᑎᖏᑎᒍ ᐊᒻᒪᓗ ᒥᕐᖑᐃᖅᓯᕐᕕᕈᖅᑎᑕᐅᕙᓪᓕᐊᓂᐊᖅᑐᒥᑦ.
