ᓴᓂᕋᔭᒃ
ᐊᕙᑎᓕᕆᔨᒃᑯᑦ ᒥᕐᖑᐃᖅᓯᕐᕕᖏᑦ ᐸᖅᑭᑎᔨᖏᓪᓗ ᐃᓕᓴᖅᓯᓯᒪᓕᕆᕗᑦ ᑲᔪᖏᖅᓴᐃᔾᔪᑎᔅᓴᓂᒃ ᐱᑕᖃᕈᓐᓇᕐᓂᐊᕐᒪᖔᑕ ᖃᐅᔨᓴᓕᕐᒥᔪᑦ ᓴᓂᕋᔭᕐᒧᑦ ᓇᓗᓇᐃᖅᑕᐅᖁᔭᐅᓪᓗᑎᒃ ᑲᔪᖏᖅᓴᐃᔾᔪᑎᔅᓴᓂᒃ ᐳᓚᕋᖅᑐᓕᕆᓂᕐᒨᖓᒐᔭᖅᑐᓄᑦ ᐋᖅᑮᓗᑎᓪᓗ ᐊᑐᖅᑕᐅᔪᓐᓇᖁᓪᓗᒋᑦ ᓄᓇᖏᑦ (ᓂᕐᔪᑏᑦ, ᓄᓇᐃᓪᓗ ᕿᒥᕐᕈᔭᐅᖃᑦᑕᕐᓗᑎᑦ), ᐊᑐᕈᓐᓇᕐᓗᑎᓗ ᐃᓄᓐᓂᑦ (ᐅᓂᒃᑳᖅᑐᐊᕐᓂᒃᑯᑦ, ᐃᓅᓯᖏᑦᑎᒍᑦ, ᐱᖅᑯᓯᖏᑦᑎᒍᓪᓗ). ᖃᐅᔨᓴᐅᑎᖏᓐᓂ ᓇᓗᓇᕈᓐᓃᕋᔭᖅᑐᖅ ᓇᒦᒃᑲᔭᕐᓂᖏᓐᓂ, ᖃᓄᐃᑦᑐᓂᓪᓗ ᑲᔪᖏᖅᓴᐃᔾᔪᑎᖃᕐᓂᐊᕐᒪᖔᑕ, ᐃᓪᓗᑦᑕᖃᕆᐊᖃᕐᒪᖔᓪᓗ ᑲᔪᖏᖅᓴᐃᔾᔪᑎᔅᓴᓂᒃ ᑲᒪᑎᓪᓗᒋᑦ, ᐊᒻᒪᓗ ᓇᓗᓇᐃᖅᓯᒐᔭᕐᒥᔪᑦ ᖃᓄᖅ ᐱᕚᓪᓕᕈᑕᐅᓂᐊᕐᒪᖔᑕ ᐳᓚᕋᖅᑐᓕᕆᓂᕐᒧᑦ ᑲᔪᓯᖅᓴᐃᓗᑎᑦ ᓴᓂᕋᔭᕐᒥ.
ᕼᐊᒻᒪᓚᖓ ᓴᓂᕋᔭᐅᑉ ᑲᓇᓐᓇᖓᓃᑦᑐᖅ ᐅᖅᓱᕆᐊᕐᒥ, ᐅᐊᓐᓇᖅᐸᓯᖓᓐᓂ ᓴᓂᕋᔭᐅᑉ ᑕᕆᐅᖓᓂ, ᐅᖓᓯᓐᓂᖃᖅᑐᓂ 80-ᑭᓚᒦᑕᒥᑦ ᓂᒋᐊᓂ ᐃᒡᓗᓕᐅᑉ. ᒪᓂᕋᐅᓪᓗᓂ ᓄᓇᖓ ᐅᖅᓱᕆᐊᕐᒥ ᐃᓐᓈᕈᓕᐊᓘᒐᓗᐊᖅᓪᓗᒋᑦ ᐊᓯᐊᖏᓐᓂ ᕿᑭᖅᑖᓗᒻᒥ, ᐳᕈᖅᑐᖃᐅᑦᑎᐊᖅᑐᓂ ᓄᓇᖓ ᓂᕐᔪᑎᓂᓪᓗ. ᐃᖃᓪᓕᐊᕕᔅᓴᑦᑎᐊᕚᓗᒃ ᓂᕐᔪᑎᓂᓪᓗ ᑕᑯᕋᓐᓈᕈᒪᔪᓄᑦ, ᒪᑯᓂᖓ ᐊᐃᕕᕐᓂᑦ, ᓇᑦᑎᕐᓂᑦ ᑎᒻᒥᐊᓂᓪᓗ. ᓯᕗᓂᖓᓐᓂ ᓴᓂᕋᔭᐅᑉ ᑕᕆᐅᖓᓂ ᑕᕐᕋᖅᑑᑎᖃᕐᕕᒥᓂᖅᑕᓕ ᓴᓇᔭᐅᓚᐅᖅᓯᒪᔪᖅ ᓄᓐᖑᒐᓗᖏᓐᓂ 1950 (ᐊᑐᖅᑕᐅᒍᓐᓃᖅᑐᕐᓕ, ᑭᓯᐊᓂ ᒪᒃᑲᐅᔭᓐᖑᐊᖅᑕᓕᒃ 70-ᐃᓯᒐᕐᓂᑦ ᐳᖅᑐᓂᓕ ᑖᓐᓇ ᓇᓗᓇᐃᒃᑯᑕᒋᔭᐅᕙᒻᒥᔪᖅ) ᐊᓯᖏᓐᓂ ᕼᐊᒻᒪᓚᓕᑦᑕᖃᓐᖏᑦᑐᖅ ᒫᓐᓇ. ᑕᒪᒃᑯᐊ ᓇᓗᓇᓐᖏᒻᒥᔪᑦ ᓄᓇᑐᖃᒥᓂᐅᒋᐊᖏᑕ ᐃᓄᓐᓄᑦ ᐊᓯᕙᕐᕕᐅᕙᑦᑐᒥᓂᕐᓂᑦ ᑐᐱᕐᕕᓂᓪᓗ. ᓯᕗᓪᓕᖅᐸᒥ ᑕᕆᐅᑉ ᐊᑭᐊᓃᓐᖓᖅᓯᒪᔪᖃᓚᐅᖅᓯᒪᔪᖅ, ᑳᐱᑕ ᐱᐅᕆ ᓚᐃᐊᓐᓗ, ᑕᒪᐅᓐᖓᓚᐅᖅᓯᒪᔪᑦ 1822-ᒥ 23-ᒥᓪᓗ, ᐊᒻᒪᓗ ᒥᐊᓕᒃᑲᒥᐅᖅ ᓵᓕ ᕼᐊ ᐃᓄᓐᓄᑦ ᐃᖏᕐᕋᖃᑕᐅᖃᑦᑕᓂᕐᒥᔪᖅ 1860-ᖏᓐᓂ.
