ᑰᒑᕈᑦ
ᓄᓇᕗᑦ ᒥᕐᖑᐃᖅᓯᕐᕕᖏᑦ ᖃᐅᔨᓴᕇᓚᐅᖅᑐᑦ ᐳᓚᕋᕐᕕᔅᓴᐅᒐᔭᖅᑐᒥᑦ ᑰᒑᕈᒻᒥᑦ ᐊᐅᔭᐅᑎᓪᓗᒍ ᐅᑭᐊᔅᓵᖓᓐᓂᓪᓗ 2001-ᒥ. ᐊᐱᖅᓱᖅᑕᐅᓚᐅᖅᓯᒪᔪᑦ ᓄᐊᑕᐅᓪᓗᑎᓪᓗ ᐊᐱᖅᓲᑎᒥᓃᑦ ᐃᓐᓇᕐᓂᑦ, ᐅᓂᒃᑲᓕᐊᕆᔭᐅᓯᒪᔪᒥᓂᕐᓂᑦ, ᑲᑎᒪᑎᑦᑎᕙᑦᑐᑎᓪᓗ ᑰᒑᕈᑦ ᕼᐊᒻᒪᓚᒃᑯᑦ ᑲᑎᒪᔨᖏᓐᓂ, ᓄᓇᓖᑦ ᐆᒪᔪᕐᓂᐊᖅᑎᒃᑯᖏᓐᓂ, ᑯᐊᐸᒃᑯᓐᓂ ᓄᓇᓕᓐᓂᓪᓗ.
ᖃᐅᔨᓴᐅᑎᒥᓃᑦ ᐊᑐᓕᖁᔭᖏᓐᓂ ᐱᑕᖃᖅᑐᑦ ᒪᓂᒪᔾᔪᑎᔅᓴᓂᒃ, ᒥᕐᖑᐃᖅᓯᕐᕕᓕᐅᖁᔨᔾᔪᑎᖏᓐᓂᓪᓗ, ᓄᓇᓖᓪᓗ ᒥᕐᖑᐃᖅᓯᕐᕕᖓ ᐋᖅᑭᒋᐊᖅᑕᐅᖁᔭᐅᓪᓗ ᓴᐳᑎᖏᑦ ᒥᕐᖑᐃᖅᓯᕐᕕᒻᒥ, ᐊᕙᑎᓕᕆᓂᕐᒧᑦ ᐃᓕᓐᓂᐊᑎᑦᑎᓂᕐᒥᑦ, ᐊᒻᒪᓗ ᓄᓇᒦᓐᓂᕐᒥᑦ ᐅᐱᕐᖏᓂᕐᒥᑦ, ᐃᑲᔪᖅᑐᕐᓗᒋᓪᓗ ᐳᓚᕋᖅᑐᓕᕆᓂᕐᒧᑦ ᐃᑲᔫᑎᔅᓴᐃᑦ ᑐᑭᓯᒋᐊᕈᑏᓪᓗ.
ᑭᖑᓂᖓᓂᓪᓕ ᐱᕙᓪᓕᐊᓂᐊᓕᖅᑎᓪᓗᒋᑦ ᐱᓕᕆᖃᑎᖃᓗᑎᒃ ᕼᐊᒻᒪᓚᒃᑯᓐᓂ ᓴᖅᑮᓂᐊᕐᖓᑕ ᐳᓚᕋᖅᑐᓕᕆᓂᕐᒧᑦ ᑲᑎᒪᔨᕋᓛᓂᑦ, ᐅᓂᒃᑳᖅᑐᐊᕐᓂᑦ ᓄᐊᑦᑎᓗᑎᒃ ᖃᐅᔨᒪᔭᐅᔪᑐᖃᕐᓂᓪᓗ ᖃᐅᔨᓴᕐᓗᑎᑦ. ᑕᒪᒃᑯᐊ ᐃᑲᔫᑎᐅᒐᔭᖅᑐᑦ ᐊᑐᓕᖁᔭᐅᔪᓂᒃ ᖃᐅᔨᓵᖏᓐᓂ, ᐃᑲᔪᖅᑐᖅᑕᐅᓂᖅᓴᐅᓗᑎᓪᓗ ᐱᕙᓪᓕᐊᓇᓱᐊᖅᑕᖏᑦ, ᓇᓗᓇᐃᖅᑎᐊᕐᓗᒋᓪᓗ ᖃᓄᖅ ᑲᔪᖏᖅᓴᐅᑎᓕᐅᕐᓂᐊᕐᒪᖔᑕ.
