ᓇᐸᕐᑐᓕᒃ
ᓄᓇᕗᒻᒥ ᒥᕐᖑᐃᖅᓯᕐᕕᖕᓄᑦ ᐱᓕᕆᐊᖅ ᐱᕙᓪᓕᐊᑎᑕᐅᓂᖓᓄᑦ, ᐊᕙᑎᓕᕆᔨᒃᑯᑦ, ᒥᕐᒍᐃᖅᓯᕕᓕᕆᔨᒃᑯᖏᑦ ᓴᐳᒻᒥᔭᖅᑕᐅᕕᓕᕆᔨᖏᓪᓗ ᖃᐅᔨᓴᖅᑐᑦ ᓴᓇᔭᐅᓪᓗᐊᕐᒪᖔᑦ ᐅᐸᒡᕕᐅᔪᒥᓇᖅᑐᖅ ᖁᑦᑎᒃᑐᒥ ᐅᔭᕋᒍᖅᓯᒪᔪᓂ ᓇᐹᖅᑐᓂ ᖃᓂᒋᔮᓂᓗ ᑕᐅᑐᒃᑕᑐᐊᕆᔭᐅᓗᓂ ᓴᐳᒻᒥᓂᕐᒧᑦ ᐱᐅᖅᓱᐊᕐᓂᕐᒧᓪᓗ ᐊᕙᑎᐊᑕ ᐃᓕᖅᑲᓯᒃᑯᑦ ᐱᖅᑯᓯᕆᖃᑦᑕᖅᓯᒪᓂᕆᔭᖓ, ᐱᕕᒃᓴᖃᖅᐹᓪᓕᖅᑎᑦᑎᓂᕐᒧᓪᓗ ᐱᙳᐊᖅᑐᓕᕆᓂᕐᒥᒃ, ᐳᓚᕋᖅᑐᓕᕆᓂᕐᒥᒃ, ᑮᓇᐅᔭᓕᐅᕈᑎᒃᓴᒃᑲᓐᓃᑦ ᐱᕚᓪᓕᖅᐸᓪᓕᐊᑎᑕᐅᓂᖏᓐᓂᒡᓗ.
ᓇᐹᖅᑐᓕᒃ ᕿᑭᖅᑕᕐᒦᑦᑐᖅ ᓄᓇᖃᕐᕕᐅᔭᐅᙱᑦᑐᒃ, ᑲᓇᑕᒥ 7ᒋᔭᐅᓪᓗᓂ ᕿᑭᖅᑕᕐᓂᑦ ᐊᖏᓛᖑᔪᓂᑦ ᑐᖏᓕᕆᔭᐅᓪᓗᓂᓗ ᕿᑭᖅᑕᓂ ᑲᓇᑕᐅᑉ ᐅᐊᖕᓇᖅᐸᓯᐅᓛᕆᔭᖓᓂᑦ. ᕿᑭᖅᑖᓗᖕᒦᑉᐳᖅ ᖃᓂᒋᔮᓂ 385 ᑭᓛᒥᑕᑦ ᖁᖅᓱᖅᑑᑉ ᐅᐊᖕᓇᖅᐸᓯᐊᓂᑦ, ᓄᓇᓕᒃ ᑲᓇᑕᐅᑉ ᐅᐊᖕᓇᖅᐸᓯᐅᓛᕆᔭᖓᓂᑦ, ᖃᓂᕆᔮᓂ 1895 ᑭᓛᒥᑕᑦ ᐃᖃᓗᖕᓂᑦ ᐊᒻᒪ 3860 ᑭᓛᒥᒻᒪᕇᑦ ᐋᑐᕚᑉ ᐅᐊᖕᓇᖅᐸᓯᐊᓂᑦ, ᓇᐹᖅᑐᓕᒃ ᖃᓂᓐᓂᖅᓴᐅᓪᓗᓂᓗ ᓄᐊᕖᑉ ᐊᖓᔪᖅᑳᖃᕐᕕᖏᓐᓄᑦ ᑲᓇᑕᐅᑉ ᐊᖓᔪᖅᑳᖃᕐᕕᖓᓂᑦ. ᓇᐹᖅᑐᓕᒃ ᖃᓂᒋᔭᖃᖅᐳᖅ ᔪᕇᑲ ᐅᓇᓕᒃᓴᔭᖃᕐᕕᖕᒥᒃ ᐊᐅᓱᐃᑦᑐᒥᒡᓗ. ᖃᓂᐸᓗᒃᐳᖅ ᖁᑦᑎᖕᓂᖅᐹᖅ ᑲᓇᑕᒥ ᒥᕐᖑᐃᖅᓯᕐᕕᖕᒧᑦ. ᓇᐹᖅᑐᓕᐅᑉ ᕿᑭᖅᑕᖓ ᐊᐅᔪᐃᑦᑐᖃᐅᖅᑑᒐᓗᐊᖅ, ᑭᓯᐊᓂ ᓱᓕ ᓇᔪᒐᕆᔭᐅᖏᓐᓇᖅᑐᖅ ᐅᒥᖕᒪᖕᓄᑦ ᐱᐊᕆᓄᓪᓗ ᑐᒃᑐᓄᑦ. ᐅᔭᕋᒍᖅᓯᒪᔪᑦ ᓇᐹᖅᑐᐃᑦ ᓇᐹᖅᑐᓕᖕᒥ ᐱᑕᖃᕐᓂᑰᓕᖅᑐᑦ ᖃᓂᒋᔮᓂ 45 ᒥᓕᐊᓐᓂᒃ ᐊᕐᕌᒍᓂᒃ, ᑭᓯᐊᓂ ᓱᓕ ᐱᑕᓖᑦ: ᓇᐹᖅᑐᕕᓃᑦ ᓇᑉᐸᑯᐃᑦ, ᐅᖃᐅᔭᐃᑦ, ᐃᓴᕈᐃᑦ, ᑲᖐᑦ ᐱᕈᖅᑐᒃᓴᐃᓪᓗ ᓱᓕ ᑕᑯᒃᓴᐅᕗᑦᓄᓇᐅᑉ ᖄᖓᓂ. ᐅᐱᓐᓇᕈᑎᒋᔭᐅᒻᒪᕆᖕᒥᕗᖅ ᐅᓄᖅᑐᑲᓪᓚᑦ ᐱᕈᖅᑐᕕᓃᑦ ᐅᔭᕋᒍᖅᓯᒪᙱᓐᓂᕆᔭᖏᑦ ᑭᓯᐊᓂ ᓱᕐᕋᒃᓯᒪᙱᑦᑎᐊᖅᖢᑎᒃ ᐸᓂᖅᑑᓕᖅᓯᒪᕗᑦ. ᕿᔪᐊᕐᔪᕕᓃᑦ ᑕᒫᙵᑦ ᑲᑎᑕᐅᔭᕌᖓᒥ ᕿᔪᑐᐃᓐᓇᖅᑎᑐᑦ ᓱᓕ ᐃᑯᐊᓚᔪᓐᓇᖅᑎᒋᕗᖅ. ᓇᐹᖅᑐᓕᒃ ᐊᔾᔨᒋᔭᐅᙱᑦᑐᒻᒪᕆᐅᕗᖅ. ᓄᓇᕐᔪᐊᓕᒫᒥ ᒪᕐᕈᑐᐃᓐᓇᑯᓘᕗᑦ ᐱᖓᓱᐃᓐᓇᐅᓪᓗᑎᒡᓘᓐᓃᑦ ᖃᐅᔨᒪᔭᐅᔪᑦ ᑕᐃᒪᐃᓕᖓᔪᑦ, ᑭᓯᐊᓂ ᓇᓕᐊᖕᓂᑐᐃᓐᓇᖅ ᐱᖃᕐᓂᕋᐃᔪᓐᓇᙱᑦᑐᖅ ᐱᑐᖃᒻᒪᕆᖕᓂᒃ ᓱᕈᖅᓯᒪᙱᑦᑐᓂᒡᓘᓐᓃᑦ ᐱᑐᖃᕐᓂᒃ ᐱᕈᖅᑐᕕᓂᕐᓂᒃ. ᐱᕈᖅᑐᕕᓃᑦ ᐸᓂᖅᑑᓕᖅᓯᒪᔪᑦ ᑕᒪᔾᔭᐅᒐᓗᐊᖅᑎᓪᓗᒋᑦ, ᓇᐹᖅᑐᓕᒃ ᖃᐅᔨᒪᔮᕆᔭᐅᒋᕗᖅ ᐅᔭᕋᒍᖅᓯᒪᔪᓂᒃ ᐆᒪᔪᕕᓂᖅᑕᖃᐅᕐᓂᖓᓂᒃ ᓲᕐᓗ ᐅᓕᑲᐹᓕᕐᔪᐊᕕᓂᕐᓂᒃ. ᖃᐅᔨᔭᐅᕚᓪᓕᕈᑎᒋᔭᒃᓴᐅᔪᓐᓇᖅᑐᒃᓴᐅᒋᓪᓗᓂᓗ ᐃᑦᑕᕐᓂᓴᐅᓂᖅᐹᖑᖃᑕᐅᔪᓂᒃ ᓄᓇᕐᔪᐊᕐᒥ ᖃᓄᐃᓐᓂᐅᕙᒃᓯᒪᔪᓂ ᓱᑕᖃᕈᓐᓃᕈᑕᐅᓂᑰᓯᒪᔪᒥᒃ.
ᒫᓐᓇᐅᔪᖅ ᓄᓇᕗᒻᒥ ᒥᕐᖑᐃᖅᓯᕝᕕᓕᕆᔨᒃᑯᑦ ᑲᑎᖅᓱᐃᔪᑦ ᖃᐅᔨᒃᑲᐃᔾᔪᑎᓂᒃ ᐃᑲᔪᖅᓱᖅᑕᐅᓂᖓᓄᑦ ᐱᑕᖃᓪᓗᐊᕐᒪᖔᑦ ᓄᓇᕗᒻᒥ ᒥᕐᖑᐃᖅᓯᕐᕕᖕᒥᒃ ᓇᐹᖅᑐᓕᖕᒥ ᐱᑕᖃᐃᓐᓇᕋᓱᒃᑎᑕᐅᓂᖓᓄᑦ ᐅᐱᓐᓇᖅᑐᐃᑦ ᓄᓇᕐᔪᐊᕐᒥᓗ ᐱᒻᒪᕆᐅᔪᑦ ᐅᔭᕋᒍᖅᓯᒪᔪᑦ ᐊᒻᒪᓗ ᒫᓐᓇᐅᔪᖅ ᐃᒃᐱᒍᓱᒃᓴᕋᐃᑦᑐᑦ ᐅᒥᖕᒪᐃᑦ ᐱᐊᕆᓪᓗ ᑐᒃᑐᐃᑦ. ᓄᓇᕗᒻᒥ ᒥᕐᖑᐃᖅᓯᕐᕕᒃᑕᖃᓕᕋᔭᖅᐸᑦ ᓇᐹᖅᑐᓕᖕᒥ ᐃᓚᖏᖃᓯᐅᔾᔭᐅᓂᖃᕐᔪᐊᕋᔭᕐᒥᕗᖅᑕᐅᖅ ᑕᒪᒃᑯᐊ ᐱᑕᖃᖅᐸᓚᐅᖅᓯᒪᔪᕕᓃᑦ ᐸᐸᑐᒃᑕᐅᑎᑕᐅᑦᑎᐊᕐᓂᕆᔭᖏᑦ ᑕᒪᓐᓇᓗ ᐃᓕᓐᓂᐊᖅᐸᓪᓕᐊᓂᕐᒧᑦ ᐃᓚᒋᓕᖅᑎᑕᐅᓯᒪᔪᓐᓇᖅᖢᓂ ᖃᐅᔨᕚᓪᓕᕈᑎᖃᕈᑎᒋᔭᐅᓇᕋᔭᖅᑐᒥᒃ ᑭᒃᑯᑐᐃᓐᓇᕐᓄᑦ ᑖᔅᓱᒥᖓ ᐊᔾᔨᒋᔭᐅᙱᓐᓂᖃᖅᑑᒻᒪᕆᒃᑐᒥᒃ ᓄᓇᕗᒻᒦᑦᑐᒥᒃ.
