ᐃᓄᐃᑦ ᓄᓇᐃᓪᓗ
4,000-ᓂᒃ ᐅᑭᐅᓂᑦ, ᐃᓄᐃᑦ ᓯᕗᓕᖏᓪᓗ ᐊᓐᓇᔅᓯᒪᔪᑦ ᓄᓇᒥᑦ ᐊᓯᖏᓐᓄᓪᓕ ᐃᓱᒪᒋᔭᐅᓪᓗᑎᑦ ᓄᓇᖓ ᓯᓚᕐᔪᐊᓕᒫᓂ ᐊᑦᑕᓇᓐᓂᖅᐹᖑᓂᕋᖅᑕᐅᓪᓗᓂ ᐃᓄᖃᓐᖏᓛᑦᑎᐊᖑᓪᓗᓂ - ᓇᐹᖅᑐᖃᓐᖏᑦᑎᐊᖅᑐᓂ ᐅᑭᐅᖅᑕᖅᑐᖅ. ᑭᓯᐊᓂᓕ, 2-ᒥᐊᓕᐊᖑᓗᐊᖅᑐᒥᑦ ᑭᓚᒦᑕᒥᑦ ᐊᖏᓂᓕᒃ, ᓄᓇᕗᑦ ᓄᓇᖏᑦ ᐊᔾᔨᒌᓐᖏᑦᑐᕈᓘᔭᐃᑦ - ᓄᓇᕐᔪᐊᕌᓘᓪᓗᓂ, ᓯᕕᑐᓪᓗᓂᑦ ᐃᒪᕕᖏᑦ, ᐊᑦᑐᖅᑕᐅᓯᒪᓐᖏᑦᑎᐊᖅᑐᓂᑦ ᑰᖃᐅᖅᑐᑎᑦ, ᑐᓐᖓᓇᑦᑎᐊᖅᑐᑎᓪᓗ ᓄᓇᓕᕋᓛᖏᑦ.
ᐃᓄᓐᓄᓪᓕ, ᑕᒪᓐᓇ ᐅᑭᐅᖅᑕᖅᑐᖅ ᐊᖏᕐᕋᕆᔭᐅᔪᖅ, ᓄᓇᖓ ᐃᒪᖏᓪᓗ ᐃᓅᔾᔪᑎᐅᕙᑦᑐᑦ ᐱᖅᑯᓯᕆᓪᓗᓂᔾᔪᓪᓗ. ᑲᑉᐱᐊᓇᖅᑐᐊᖃᕋᓴᐅᔭᒃᑯᑦ “ᑐᓐᖓᓇᓐᖏᑦᑐᐊᓘᔮᖅᑑᒐᓗᐊᖅ” ᐅᕝᕙᓘᓐᓃᑦ “ᐅᐸᑦᑕᐅᒐᔪᑦᑑᔮᓐᖏᑦᑑᒐᓗᐊᖅ”, ᑭᓯᐊᓂᓕ ᑕᒪᒃᑯᐊ ᐱᕈᖅᑐᖃᐅᑦᑎᐊᖅᑐᑦ ᓄᓇᒥ ᓂᕐᔪᑎᖃᐅᖅᑐᑎᓪᓗ ᓂᕿᒋᔭᐅᕙᑦᑐᓂᒃ, ᐃᓪᓗᒋᔭᐅᕙᑦᑐᓂᑦ, ᐱᖅᑯᓯᕆᔭᐅᓪᓗᑎᒃ ᐊᓐᓄᕌᖃᕈᑕᐅᓪᓗᑎᓪᓗ. ᑕᒪᓐᓇ ᐱᖅᑯᓯᕆᔭᐅᖏᓐᓇᖅᑐᑦ, ᐃᓄᓐᓄᑦ ᐊᕙᑎᖏᓪᓗ ᑲᑎᓐᖓᕗᑦ ᓄᓇᒦᖃᑕᐅᓪᓗᑕ, ᐃᓛᒃᑰᖓᓐᖏᑦᑐᒍᑦ. ᓄᓇᕗᒻᒥ ᓄᓇᖏᑦ ᐅᑉᐱᕆᔭᐅᑦᑎᐊᖅᑐᑦ ᑐᑭᖃᕆᔭᐅᑦᑎᐊᖅᑐᑎᓪᓗ ᐃᓄᓐᓄᑦ - ᐱᖅᑯᓯᖏᑎᒍᑦ ᐅᕝᕙᓘᓐᓃᑦ ᐃᑦᑕᕐᓂᓴᕐᓂᑦ, ᐊᖏᕐᕋᑦᑕ ᐃᓚᒋᒻᒪᒍ ᐅᕝᕙᓘᓐᓃᑦ ᐊᓯᕙᕐᕕᒋᕙᒻᒪᒍ, ᑐᐱᕐᕕᓐᓇᕆᔭᖏᓐᓂᓪᓗ ᐱᑕᖃᖅᑐᓂ, ᓄᓇᐃᓪᓗ ᑭᓱᕈᓘᔮᓗᖃᖅᑐᑎᑦ, ᐅᕝᕙᓘᓐᓃᑦ ᐅᑉᐱᕆᔭᐅᑦᑎᐊᖅᑐᑎᑦ ᐊᖏᕐᕋᕆᔭᐅᓪᓗᑎᓪᓗ ᓂᕐᔪᑎᓄᑦ.
ᓄᓇᐃᑦ ᐱᒻᒪᕆᐅᒋᒻᒥᔭᕗᑦ ᐊᑐᖅᑕᑎᓐᓂ ᓄᓇᒥᑦ. ᐊᒥᓱᑦ ᐅᑉᐱᕈᓱᑦᑐᑦ ᐃᓚᒋᔭᐅᒋᐊᖏᓐᓂ ᓄᓇᒥᑦ ᐅᑉᐱᕆᑦᑎᐊᖅᑐᒋᓪᓗ ᐃᓅᖃᑎᖃᕐᓂᑎᓐᓂ ᐃᓄᓐᓂᑦ - ᑕᒪᒃᑯᐊᓗ ᐱᒻᒪᕆᐅᒋᔭᕗᑦ ᓇᓗᓇᐃᖅᓯᕗᑦ ᑭᒃᑰᓂᑦᑎᓐᓂ. ᐅᔾᔨᕈᓱᑦᑎᑦᑎᕚᓪᓕᕐᓗᑎᑦ ᑕᒪᒃᑯᓂᖓ ᓄᓇᓂᑦ ᓇᕈᓗᑦᑕᐅᓂᐊᓐᖏᒻᒪᑕ ᓄᓇᖏᑦ ᐊᑐᖅᑕᐅᔪᓐᓇᖅᑐᓪᓗ ᓄᓇᒥᑦ; ᖃᐅᔨᒪᑎᑦᑎᑲᓐᓂᕋᓱᐊᕐᓗᑎᑦ ᑐᑭᓯᐅᒪᑎᑦᑎᓗᑎᓪᓗ ᐃᓗᓕᖏᓐᓂ; ᐃᑲᔪᖅᑐᐃᓪᓗᑎᓪᓗ ᖃᓄᓐᓂᐅᖃᑦᑕᖅᑐᓂᒃ ᑲᒪᑦᑎᐊᕈᓐᓇᕐᓗᑎᓪᓗ.
