ᐸᕐᓇᕐᓂᖅ
ᓴᓂᕐᕙᐃᑲᐃᓐᓇᖅᓯᒪᓕᕈᑎᒃ ᓄᓇᓂᑦ ᑐᔅᓯᕋᖅᑕᐅᓯᒪᔪᒥᑦ, ᒥᕐᖑᐃᖅᓯᕐᕕᓂᑦ ᓇᓗᓇᐃᒃᑯᑎᐅᓂᐊᖅᑐᓂᒃ ᓴᖅᑮᒐᔭᖅᑐᑦ, ᑕᐃᒪᓕ ᑭᖑᓂᖓᓂ ᐱᒋᐊᖅᑎᑦᑎᕙᓪᓕᐊᓕᕋᔭᖅᑐᖅ ᓄᓇᓕᓐᓂᑦ ᑲᑐᔾᔨᔪᑦ ᐸᕐᓇᑦᑎᓂᒃ ᐊᐅᓚᑦᑎᔨᓂᓪᓗ ᑲᑎᒪᔨᕋᓛᕆᓂᐊᖅᑕᖏᓐᓂ. ᒪᓖᓐᓇᕐᓗᑎᒃ ᐃᓄᐃᑦ ᐊᑦᑐᖅᑕᐅᓂᐊᕐᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑎᖏᓐᓂ, ᓄᓇᕗᑦ ᒥᕐᖑᐃᖅᓯᕐᕕᒃᑯᖏᑦ ᐊᒻᒪᓗ ᐊᕕᑦᑐᖅᓯᒪᔪᓂᒃ ᐃᓄᐃᑦ ᑲᑐᔾᔨᖃᑎᒌᖏᓐᓂ ᑎᒃᑯᐊᖅᓯᓕᕋᔭᖅᑐᑦ ᑲᑎᒪᔨᕋᓛᓐᓃᓐᓂᐊᖅᑐᓂᒃ ᐅᖃᐅᔾᔨᒋᐊᕆᔨᐅᖃᑦᑕᕋᔭᖅᑐᓂᒃ ᐊᑐᓕᖁᔭᖏᓐᓂᓪᓗ ᓴᖅᑮᓗᑎᒃ ᐸᕐᓇᐅᑎᓄᑦ, ᓴᖅᑭᖅᑕᐅᓂᖏᓐᓄᑦ, ᐊᐅᓚᑕᐅᓂᖏᓐᓄᑦ ᑲᒪᒋᔭᐅᓂᖏᓐᓄᓪᓗ ᐅᑭᐅᖅᑕᖅᑐᒥ ᒥᕐᖑᐃᖅᓯᕐᕕᒻᒥᑦ. ᓂᕆᐅᒋᔭᐅᒐᔭᕐᒥᔪᑦ ᐃᓚᖏᑦ ᑲᑎᒪᔨᕋᓛᓃᓚᐅᖅᑐᑦ ᐱᖃᑕᐅᖁᔭᐅᓪᓗᑎᒃ ᓄᓇᓕᓐᓂᑦ ᑲᑐᔾᔨᔪᑦ ᐸᕐᓇᑦᑎᓂᒃ ᐊᐅᓚᑦᑎᔨᓂᓪᓗ ᑲᑎᒪᔨᕋᓛᓃᖁᔭᐅᓪᓗᑎᑦ ᑲᔪᓯᑦᑎᐊᖁᓪᓗᒋᑦ ᑕᒪᒃᑯᐊ ᑲᒪᒋᔭᑦ.
ᓄᓇᕗᑦ ᒥᕐᖑᐃᖅᓯᕐᕕᒃᑯᑦ ᐱᓕᕆᖃᑎᖃᕐᓗᑎᒃ ᓄᓇᓕᓐᓂᑦ ᑲᑐᔾᔨᔪᓂᒃ ᐸᕐᓇᑦᑎᓂᒃ ᐊᐅᓚᑦᑎᔨᓂᓪᓗ, ᐃᓄᓐᓂᒃ, ᐊᓯᖏᓐᓂᓪᓗ ᐱᖃᑕᐅᒍᒪᔪᓂᒃ (ᒪᑯᓂᖓ ᐃᓄᐃᑦ ᐃᑦᑕᕐᓂᓴᓕᕆᔨᒃᑯᑦ ᑮᓇᐅᔭᓂᒃ ᐸᐸᑦᑎᔨᖏᓐᓂ, ᓄᓇᓂᑦ ᖃᐅᔨᓴᖅᑏᑦ ᐊᓪᓚᕕᖓᓐᓂ, ᐊᕕᑦᑐᖅᓯᒪᔪᓂᒃ ᐃᓄᐃᑦ ᑲᑐᔾᔨᖃᑎᒌᖏᓐᓂ, ᐊᕕᑦᑐᖅᓯᒪᔪᓂᒃ ᐆᒪᔪᕐᓂᐊᖅᑎᒃᑯᑦ ᑲᑐᔾᔨᖃᑎᒌᖏᓐᓂ, ᐊᓯᖏᓐᓂᓪᓗ), ᐃᓄᐃᓐᓂᑦ ᐃᑲᔪᕈᓐᓇᖅᑐᓂᒃ ᖃᐅᔨᓴᕐᓂᕐᒥᑦ ᒥᕐᖑᐃᖅᓯᕐᕕᐅᑉ ᐃᓗᐊᓃᑦᑐᓂᒃ ᒪᑯᓂᖓ ᐱᖃᓯᐅᔾᔨᓪᓗᑎᒃ:
- ᐃᑦᑕᕐᓂᓴᓕᕆᓂᖅ ᓄᓇᑐᖃᒥᓃᓪᓗ;
- ᐱᖅᑯᓯᑐᖃᖏᑦ, ᐱᖃᓯᐅᑎᓪᓗᒋᑦ ᐅᓂᒃᑳᖅᑐᐊᕐᓂᖅ ᐊᓯᖏᓐᓂᓪᓗ ᐱᑐᖃᕐᓂᖅ;
- ᐃᓄᑦᑎᑐᑦ ᐊᑎᓖᑦ ᓄᓇᐃᑦ ᐊᒻᒪᓗ ᓇᒦᓐᓂᖏᑦ ᒥᕐᖑᐃᖅᓯᕐᕕᐅᑉ ᐃᓗᐊᓃᑉᐸᑕ;
- ᓂᕐᔪᑏᑦ ᐊᒥᓲᓂᖏᑦ, ᓄᓇᒥ ᐱᕈᖅᑐᐃᑦ ᓂᕐᔪᑎᖃᕐᕖᓪᓗ ᐱᒻᒪᕆᐅᒋᔭᐅᔪᑦ ᐸᖅᑭᔭᐅᒋᐊᖃᖅᑐᑦ ᐊᐅᓚᑕᐅᒋᐊᖃᖅᑐᓪᓘᓐᓃᑦ; ᐊᒻᒪᓗ
- ᓄᓇᒦᑦᑐᑦ ᐅᔭᕋᕐᓂᐊᕋᔅᓴᐃᓪᓗ.
ᖃᐅᔨᓴᖅᑕᐅᒋᐊᖃᖅᑐᑦ, ᒥᑭᓂᖅᐸᑎᒎᕐᓗᒋᑦ, ᑐᕌᒐᓐᓂ ᒪᓕᒋᐊᖃᖅᑐᑦ ᐊᑐᖅᑕᐅᒋᐊᖃᖅᑐᓂᓪᓗ ᐃᓄᐃᑦ ᐊᑦᑐᖅᑕᐅᓂᐊᕐᓂᖏᓐᓄ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑎᖓᓐᓂ ᐊᒻᒪᓗ ᐅᑭᐅᖅᑕᖅᑐᒥ ᒥᕐᖑᐃᖅᓯᕐᕖᑦ ᐱᖁᔭᖏᓐᓂ. ᑕᒪᒃᑯᓂᖓ ᖃᐅᔨᓴᖅᐸᓪᓕᐊᓕᖅᑎᓪᓗᒋᑦ, ᓄᓇᕗᑦ ᒥᕐᖑᐃᖅᓯᕐᕕᒃᑯᑦ ᐊᒻᒪᓗ ᓄᓇᓕᓐᓂ ᑲᑐᔾᔨᔪᑦ ᐊᐅᓚᑦᑎᓂᕐᒥᑦ ᑲᒪᒋᐊᖃᕐᓂᒥᓪᓗ ᑲᑎᒪᕋᓛᖏᑦ ᐃᓱᒪᖅᓴᖅᓯᐅᖅᑳᕆᐊᖃᕋᔭᖅᑐᑦ ᓄᐊᑕᒥᓂᕐᓂᑦ ᑲᔪᓯᓂᐊᕋᓗᐊᕐᒪᖓᖅ, ᓇᓗᓇᐃᕐᓗᒋᓪᓗ ᖃᐅᔨᓴᖅᑕᐅᒋᐊᖃᖅᑐᑦ ᐊᓯᖏᑦ ᑕᐃᒪᐃᒋᐊᖃᕐᓂᕈᑎᑦ.
ᓄᓇᕗᑦ ᒥᕐᖑᐃᖅᓯᕐᕕᒃᑯᑦ ᐊᒻᒪᓗ ᓄᓇᓕᓐᓂᑦ ᑲᑐᔾᔨᔪᑦ ᐊᐅᓚᑦᑎᓂᕐᒥᑦ ᑲᒪᒋᐊᖃᕐᓂᒥᓪᓗ ᑲᑎᒪᔨᕋᓛᖏᑦ ᐊᑐᕐᓗᑎᒃ ᑕᒪᒃᑯᓇᓐᖓᑦ ᑐᑭᓯᒋᐊᕈᑎᓂᒃ ᒥᕐᖑᐃᖅᓯᕐᕕᒻᒥ ᑭᓪᓕᓕᐅᕋᔭᖅᑐᑦ, ᐃᓄᑦᑎᑑᖓᑦᑎᐊᕐᓗᑎᓪᓗ ᐊᑎᖏᑦ ᓄᓇᐃᑦ, ᐊᒻᒪᓗ ᒥᕐᖑᐃᖅᓯᕐᕕᐅᑉ ᐃᓗᐊᓂ ᑐᑭᓯᒋᐊᕈᑎᓂᑦ. ᑕᒪᒃᑯᐊ ᐸᕐᓇᐅᑏᑦ ᒪᓕᒃᑲᔭᖅᑐᑦ ᐱᓕᕆᐊᖑᒋᐊᓕᓐᓄᑦ ᒪᓕᑦᑎᐊᖁᓪᓗᒋᑦ ᒥᕐᖑᐃᖅᓯᕐᕖᑦ ᐸᕐᓇᐅᑎᖏᓐᓂ ᐊᐅᓚᑕᐅᓂᐊᕐᓂᖏᓐᓂᓪᓗ ᓄᓇᕗᓕᒫᒥ. ᑕᒪᒃᑯᐊ ᐱᓕᕆᐊᔅᓴᐅᓂᐊᖅᑐᑦ ᐱᔭᕇᖅᓯᒪᖁᔨᓪᓗᑎᑦ ᐸᕐᓇᐅᑎᓂᒃ ᒪᑯᓂᖓ ᐱᔾᔪᑎᖏᓐᓂ ᑎᑎᕋᖅᓯᒪᑦᑎᐊᕐᓗᑎᑦ ᐊᒻᒪᓗ ᐊᑦᑐᐊᓂᖃᖅᑐᓄᑦ ᐊᐅᓚᑦᑎᓂᕐᒧᑦ ᑐᕌᒐᖏᓐᓂ; ᓇᓗᓇᐃᕐᓗᒋᑦ ᒥᕐᖑᐃᖅᓯᕐᕖᑦ ᑭᓪᓕᖏᑦ; ᓇᓗᓇᐃᕐᓗᒋᑦ ᐊᒻᒪᓗ ᐸᖅᑭᔭᐅᒋᐊᖃᖅᑐᑦ ᓄᓇᑐᖃᐃᑦ, ᓂᕐᔪᑎᖃᕐᕖᑦ, ᒥᕐᖑᐃᖅᓯᕐᕕᔅᓴᐃᑦ ᓇᓗᓇᐃᖅᑐᕐᓗᒋᑦ ᐅᕝᕙᓘᓐᓃᑦ ᐊᓯᖏᑦ ᐋᖅᑭᔅᓱᐃᔾᔪᑕᐅᓂᐊᖅᑐᑦ; ᓇᓗᓇᐃᕐᒥᓗᒋᑦ ᖃᓄᑦᑐᓂᒃ ᐃᓪᓗᖁᑎᖃᕆᐊᖃᕐᓂᐊᕐᒪᖔᑕ ᒥᕐᖑᐃᖅᓯᕐᕕᒻᒥ; ᓇᓗᓇᕐᒥᓗᒋᑦ ᐸᕐᓇᐅᑎᓕᐊᖑᓯᒪᔪᑦ ᑕᒪᒃᑯᐊ ᒥᕐᖑᐃᖅᓯᕐᕕᒻᒥ ᐊᑐᖅᑕᐅᔪᓐᓇᖅᑐᑦ ᐊᒻᒪᓗ ᒪᑭᒪᔾᔪᑕᐅᔪᓐᓇᕋᔭᖅᑐᑦ ᑲᒪᒋᔭᐅᑦᑎᐊᖁᓪᓗᒋᑦ.
ᓯᕗᓂᖓᓐᓂ ᑲᒪᒋᔭᐅᕙᓪᓕᐊᓕᖅᑎᓪᓗᒋᑦ, ᓄᓇᓕᓐᓂᑦ ᑲᑎᒪᑎᑦᑎᒋᐊᖃᕋᔭᕐᒥᔪᑦ ᐱᖃᑕᐅᓗᑎᓪᓗ ᐱᕙᓪᓕᐊᓕᕐᓂᖓᓐᓂ ᒥᕐᖑᐃᖅᓯᕐᕕᒃ ᐊᒻᒪᓗ ᐊᐅᓚᑕᐅᓂᔅᓴᖏᓐᓄᑦ ᐸᕐᓇᐅᑏᑦ. ᓄᓇᓕᓐᓂᑦ ᑲᑐᔾᔨᔪᑦ ᐊᐅᓚᑦᑎᓂᕐᒥᑦ ᑲᒪᓂᕐᒥᓪᓗ ᑲᑎᒪᔨᕋᓛᖏᑦ, ᓄᓇᕗᑦ ᒥᕐᖑᐃᖅᓯᕐᕖᑦ ᒪᑐᐃᖓᖃᑦᑕᕐᓗᑎᑦ ᑭᒃᑯᑐᐃᓐᓇᕐᓄᑦ, ᓈᓚᐅᑎᒃᑯᓪᓗ ᐅᓂᒃᑳᖃᑦᑕᕐᓗᑎᑦ, ᐃᓐᓇᕐᓂᑦ ᐊᐱᖅᓱᖃᑦᑕᕐᓗᑎᑦ, ᐃᓅᓱᑦᑐᓂᒃ ᐊᓯᖏᓐᓂᓪᓗ ᓄᓇᓕᓐᓂᑦ; ᐊᐱᖅᓱᖃᑦᑕᕐᓗᑎᑦ ᐃᓐᓇᕐᓂᖏᑦ ᐊᓯᖏᓐᓂᓪᓗ; ᐱᕙᓪᓕᐊᔪᓕᐅᖃᑦᑕᕐᓗᑎᓪᓗ ᑐᓴᖅᑎᑦᑎᖃᑦᑕᕐᓗᑎᒃ ᑕᐃᒃᑯᓇᓐᖓᑦ ᐱᖃᑕᐅᔪᓕᒫᓂᑦ ᑐᓴᐅᒪᑎᑦᑏᓐᓇᕐᓗᑎᓪᓗ ᐊᑐᖅᑕᐅᖁᓪᓗᒋᑦ ᐃᓱᒪᓕᐅᖅᑐᖃᕐᓂᐊᖅᑎᓪᓗᒍ ᒥᕐᖑᐃᖅᓯᕐᕖᑦ ᐸᕐᓇᐅᑎᖏᓐᓂ ᐊᐅᓚᑦᑎᓂᔅᓴᖏᓐᓂᓪᓗ.
ᐃᓚᖏᑦ ᐊᐅᓚᑦᑎᔾᔪᑎᔅᓴᓄᑦ ᐸᕐᓇᐅᑏᑦ ᐱᖃᓯᐅᔾᔨᒋᐊᖃᕋᔭᕐᒥᔪᑦ ᐊᑦᑐᐊᓂᖃᖅᑐᓄᑦ ᓂᕐᔪᑎᓄᑦ, ᕿᒥᕐᕈᔭᐅᒋᐊᖃᕋᔭᖅᑐᑎᑦ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ ᒪᓕᑦᑎᐊᓕᕋᓗᐊᕐᒪᖔᑕ ᓂᕐᔪᑎᓂᑦ ᐊᐅᓚᑦᑎᓂᕐᒧᑦ ᐊᓯᕙᖅᑕᐅᕙᑦᑐᓂᑦ ᐅᕝᕙᓘᓐᓃᑦ ᐊᓯᖏᓐᓂ ᓂᕐᔪᑎᓕᕆᓂᕐᒥᑦ ᐃᑲᔫᑎᔅᓴᓄᑦ; ᐊᒻᒪᓗ ᐆᒪᔪᓕᕆᔨᕐᔪᐊᒃᑯᑦ ᖃᐅᔨᒪᓂᐊᕐᖓᑕ ᒥᕐᖑᐃᖅᓯᕐᕖᑦ ᐊᐅᓚᑕᐅᓂᔅᓴᖏᓐᓄᑦ ᓄᓇᓕᓐᓄᑦ ᐃᓱᒪᓕᐊᖑᔪᓂᑦ.
ᐸᕐᓇᐅᑎᓂᒃ ᐱᔭᕇᖅᓯᒪᔪᓂᒃ ᐊᖏᖅᓯᓯᒪᓕᕈᑎᑦ ᓄᓇᓕᓐᓂ ᑲᑐᔾᔨᔪᑦ ᐊᐅᓚᑦᑎᓂᕐᒥᑦ ᑲᒪᓂᕐᒥᓪᓗ ᑲᑎᒪᔨᕋᓛᖏᑦ, ᐊᖏᖅᑕᐅᒋᐊᖃᕋᔭᕐᒥᔪᑦ ᓄᓇᕗᑦ ᑲᑐᔾᔨᔪᑦ ᐊᐅᓚᑦᑎᓂᕐᒥᑦ ᑲᒪᓂᕐᒥᓪᓗ ᑲᑎᒪᔨᕋᓛᖏᓐᓂ ᐸᕐᓇᐅᑏᑦ ᒪᓕᑦᑎᐊᕋᓗᐊᕐᒪᖔᑕ ᐃᓄᐃᑦ ᐊᑦᑐᖅᑕᐅᓂᐊᕐᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑎᖓᓐᓂ, ᓱᒻᒪᓪᓗ ᒥᕐᖑᐃᖅᓯᕐᕕᕈᓂᐊᕐᒪᖔᖅ ᖃᐅᔨᓴᕐᓗᑎᑦ. ᕿᒥᕐᕈᔭᐅᑎᓪᓗᒋᑦ ᓄᓇᕗᑦ ᑲᑐᔾᔨᔪᑦ ᐊᐅᓚᑦᑎᓂᕐᒥᑦ ᑲᒪᓂᕐᒥᓪᓗ ᑲᑎᒪᔨᕋᓛᖏᓐᓂ ᐊᐱᕆᒐᔭᖅᑐᑦ ᓄᓇᓕᓐᓂ ᑲᑐᔾᔨᔪᑦ ᐊᐅᓚᑦᑎᓂᕐᒥᑦ ᑲᒪᓂᕐᒥᓪᓗ ᑲᑎᒪᔨᕋᓛᖏᓐᓂ ᐊᒻᒪᓗ ᓄᓇᕗᑦ ᒥᕐᖑᐃᖅᓯᕐᕕᖏᓐᓂ ᐱᓕᕆᒃᑲᓐᓂᖁᔭᐅᓗᑎᑦ, ᐋᖅᑭᒋᐊᖅᑕᐅᓗᑎᑦ ᐊᐅᓚᑦᑎᔾᔪᑎᔅᓴᐃᑦ, ᐅᕝᕙᓘᓐᓃᑦ ᐋᖅᑭᒋᐊᖅᑕᐅᓗᑎᒃ ᐸᕐᓇᐅᑏᑦ ᓄᑖᕐᓄᑦ ᑐᓴᕈᑎᓄᑦ ᒪᓕᓪᓗᑎᑦ ᒥᕐᖑᐃᖅᓯᕐᕕᓕᕆᔨᔪᑦ ᑐᓂᔭᐅᒃᑲᓂᑦᑕᓕᖅᑯᑦ ᐸᕐᓇᐅᑏᑦ ᓄᓇᕗᑦ ᑲᑐᔾᔨᔪᑦ ᐊᐅᓚᑦᑎᓂᕐᒥᑦ ᑲᒪᓂᕐᒥᓪᓗ ᑲᑎᒪᔨᕋᓛᖏᓐᓄᑦ. ᓈᒻᒪᒋᔭᐅᓕᕈᑎᑦ ᐸᕐᓇᐅᑏᑦ ᐱᔭᕇᖅᓯᒪᓂᖏᓐᓂ, ᐊᖏᖅᑕᐅᒋᐊᖃᓕᕋᔭᕐᒥᔪᑦ ᒥᓂᔅᑕᒧᑦ, ᐊᕙᑎᓕᕆᔨᒃᑯᓐᓄᑦ. ᑕᐃᒫᔅᓴᐃᓐᓇᐸᓗᒃ, ᒥᓂᔅᑕ ᐊᐱᕆᒐᔭᕐᒥᔪᖅ ᓄᓇᕗᑦ ᑲᑐᔾᔨᔪᑦ ᐊᐅᓚᑦᑎᓂᕐᒥᑦ ᑲᒪᓂᕐᒥᓪᓗ ᑲᑎᒪᔨᕋᓛᖏᓐᓐᓂ ᕿᒥᕐᕈᔭᐅᖁᓗᒋᑦ ᐋᖅᑭᒋᐊᖅᑕᐅᖁᓗᒋᓪᓘᓐᓃᑦ ᒪᓕᑦᑎᐊᖁᓪᓗᒋᑦ ᓄᑖᕐᓂ ᑐᑭᓯᒋᐊᕈᑎᓂᒃ.
