ᐅᓗᕆᐊᓇᖅᑐᑦ, ᐊᔅᓱᕈᓐᓇᖅᑐᑦ ᒪᑭᒪᔾᔪᑎᔅᓴᐃᓪᓗ
ᓄᓇᕗᑦ ᐊᔾᔨᐅᖏᑦᑑᓪᓗᓂ, ᓯᓚᕐᔪᐊᒥ ᐅᑭᐅᖅᑕᖅᑑᖃᑕᐅᔪᖅ ᓄᓇᖓ ᐊᖏᓂᖃᖅᑐᓂ 30-ᒥᓕᐊᓂᑦ ᑭᓚᒦᑕᓂᑦ, ᐱᖃᓯᐅᑎᓪᓗᒋᑦ ᐃᒪᕖᑦ, ᐃᒪᐃᑦ, ᐊᐅᓱᐃᑦᑐᑦ, ᓯᕐᒥᓖᑦ ᑰᓪᓗ. ᓄᓇᖓ ᑲᑐᔾᔭᐅᓪᓗᓂ ᑎᓴᒪᐅᓕᖅᑲᖓᔪᓄᑦ ᓄᓇᕐᔪᐊᓄᑦ ᐅᖓᑖᓂᓗ 50-ᓂᒃ ᐊᔾᔨᒌᓐᖏᑦᑐᓂᒃ ᓄᓇᖃᖅᑳᖅᑐᒥᓂᕐᓂᑦ ᓄᓇᓕᓐᓂᑦ. ᑕᒪᓐᓇ ᐅᑭᐅᖅᑕᖅᑐᖅ ᐃᓗᓕᖃᐅᖅᑐᖅ ᑭᓱᑐᐃᓐᓇᕐᓂᑦ ᒪᑯᓂᖓ ᐅᖅᓱᐊᓗᓐᓂᒃ, ᒑᓯᓂᑦ, ᐅᔭᕋᕐᓂᐊᕋᔅᓴᓂᒃ ᓇᐹᖅᑐᓂᓪᓗ. ᐃᓗᓕᓕᐊᓘᒐᓗᐊᖅᑎᓪᓗᒍ, ᒫᓐᓇᕈᓗᒃ ᑭᓯᐊᓂ ᐊᖏᔪᐊᓗᓐᓂᒃ ᐅᔭᕋᓐᓂᐊᖅᑕᐅᖃᑦᑕᖅᓯᒪᓕᖅᑐᖅ. ᑭᓯᐊᓂᓕ, ᑕᒪᓐᓇ ᐊᓯᔾᔨᐸᓪᓕᐊᓕᖅᑐᖅ ᐅᑭᐅᖅᑕᖅᑐᒥᓪᓗ ᐱᕙᓪᓕᐊᓂᖅᓴᐅᓕᖅᑐᑎᑦ.
ᓄᓇᕗᑦ ᓄᓇᖓ ᐅᓗᕆᐊᓇᖅᑐᒦᑦᑐᖅ ᐊᒥᓱᓂᒃ ᐱᔾᔪᑎᖃᖅᑐᓂ. ᒪᑯᓄᖓ ᕿᓂᖅᑐᓄᑦ ᑕᕆᐅᓪᓗ ᐊᑭᐊᓃᖔᖅᓯᒪᔪᓂᒃ ᐊᕐᕕᓂᐊᖅᑎᓂᑦ 1500-ᖏᓐᓂ ᑎᑭᖃᑦᑕᖅᓯᒪᓕᖅᑐᒃ, ᕿᓯᓕᓐᓂᓪᓗ ᐱᔪᒪᔪᓂᒃ 1800-ᖏᓐᓂ, ᐅᔭᕋᕐᓂᐊᖅᑎᓂᒃ, ᐅᖅᓱᐊᓗᓐᓂᐊᖅᑎᓂᒃ ᐊᓪᓛᒃ ᐳᓚᕋᖅᑎᓂᒃ 1900-ᖏᓐᓂ, ᑮᓇᐅᔭᓕᐅᕋᓱᑦᑎᓂᑦ ᕿᒥᕐᕈᔭᖅᑐᖅᓯᒪᔪᓂᒃ ᐅᑭᐅᖅᑕᖅᑐᒧᑦ ᐅᕝᕙᓘᓐᓃᑦ ᐊᑦᑐᖅᑕᐅᕙᑦᑐᑦ ᓂᕐᔪᑏᑦ ᐊᒥᓲᓂᖏᑦ, ᐊᖏᕐᕋᖏᑦ ᐊᑦᑐᖅᑕᐅᓪᓗᑎᒃ, ᓱᕈᓐᓇᖅᑐᖃᓕᖅᑐᓂ ᓄᓇᖓ ᓴᓗᒻᒪᓴᖅᑕᐅᖃᑦᑕᕆᐊᖃᓕᖅᑐᑎᒃ, ᐊᑐᓗᐊᖅᑕᐅᕙᑦᑐᑦ ᐱᓱᕝᕕᐅᕙᑦᑐᑦ, ᓱᕋᖅᑕᐅᓂᖏᑦ ᐃᑦᑕᕐᓂᓴᐃᑦ ᓄᓇᑐᖃᕆᔭᐅᓯᒪᔪᓪᓗ. ᐅᓪᓗᒥ, ᓄᓇᕗᒻᒥ ᐃᓄᒋᐊᔅᓯᕙᓪᓕᐊᓂᖏᑦ, ᐱᖓᓱᐊᖅᑎᓗᐊᓐᖑᐊᖅᑐᑎᑦ ᓱᒃᑲᓕᓂᖅᓴᐃᑦ ᑲᓇᑕᓕᒫᒥᑦ, ᐊᑐᖅᑕᐅᓂᖅᓴᐅᒋᐊᖃᓕᖅᑐᑎᑦ ᓄᓇᖏᑦ ᐃᓗᓕᖏᓪᓗ. ᐅᔭᕋᕐᓂᐊᕐᓂᖅ ᐱᕙᓪᓕᐊᑎᑦᑎᓂᕐᓗ ᓄᓇᖏᑦ ᐸᖅᑭᔭᐅᓐᖏᓂᖅᓴᐅᔮᓕᖅᑐᑎᑦ - ᐅᖓᑖᓂ 1000-ᓂᒃ ᐱᔪᓐᓇᐅᑎᓂᒃ ᑐᓂᓯᓯᒪᓕᖅᑐᑦ ᓄᓇᕗᑦ ᐃᓗᐊᓂ 2005-ᖑᓚᐅᖅᑐᒥ ᐊᒻᒪᓗ 1,500 ᐅᖓᑖᓂ 2004-ᖑᑎᓪᓗᒍ ᐊᑐᖅᑕᐅᑎᑦᑎᓚᐅᖅᑐᑦ ᐅᖓᑖᓄᑦ 400,000 ᑭᓚᒦᑕᓂᒃ (20%-ᒋᓗᐊᖅᑐᓂᐅᒃ ᓄᓇᕗᑦ ᐃᓗᐊᓂ) ᐱᕙᓪᓕᐊᓂᕐᒨᖓᓪᓗᑎᑦ. ᓄᓇᕗᑦ ᓄᓇᖏᑦ ᐊᓯᔾᔨᐸᓪᓕᐊᓕᕐᒥᔪᑦ ᐅᖅᑰᓯᕙᓪᓕᐊᓂᕐᒧᑦ, ᐊᐅᔅᓴᕋᐃᓐᓂᖅᓴᐅᕙᓕᖅᑐᓂ ᓯᑯ, ᓄᓇᐅᓪᓗ ᐃᑭᐊᖓ ᐊᐅᑉᐸᓪᓕᐊᓪᓗᓂ - ᐊᓪᓛᒃ ᑕᒪᒃᑯᐊ ᐃᓱᒪᒋᔭᐅᓚᐅᖅᓯᒪᓐᖏᒻᒪᕆᑦᑐᑦ ᐅᑭᐅᓂᑦ ᖁᓕᐅᓚᐅᖅᑐᓂᒃ.
ᐃᓄᐃᑦ ᐊᑯᓂᐊᓗᒃ ᑲᒪᖃᑦᑕᐃᓐᓇᖅᓯᒪᔪᑦ ᐅᑭᐅᖅᑕᖅᑑᑉ ᓄᓇᖓᓐᓂ, ᐱᕙᓪᓕᐊᓂᖏᓐᓂ ᑕᐃᒪᐃᓪᓗᐊᖅᑎᑕᐅᕗᑦ ᐊᕙᑎᕗᑦ ᐸᖅᑭᔭᐅᓂᖓᓐᓂ ᓄᑖᕐᒧᑦ ᒐᕙᒪᐅᔪᒧᑦ ᐊᒻᒪᓗ ᓄᓇᑖᕈᑎᐅᑉ ᐊᖏᕈᑎᖓᓐᓄᑦ. ᑕᒪᒃᑯᐊ ᐱᒻᒪᕆᐅᓂᖏᓐᓄᑦ ᓈᒻᒪᒋᔭᐅᓪᓗᑎᒃ, ᐊᔅᓱᕉᑎᒋᓪᓗᓂᐅᓪᓕ ᖃᓄᖅ ᑕᒪᒃᑯᐊ ᑲᔪᓯᒍᓐᓇᖅᑲᑦ ᐊᑦᑐᐃᓗᐊᓐᖏᓪᓗᑎᒃ ᓄᓇᓂᑦ, ᐱᒻᒪᕆᐅᒋᓪᓗᓂᓗ, ᐸᖅᑭᔭᐅᒋᐊᖃᕐᓂᖏᑦ ᓄᓇᐃᑦ ᐃᓗᓕᖏᓪᓗ, ᑭᖑᓂᖓᓐᓂᓪᓗ ᐊᑐᕈᒫᕐᓂᐊᕐᓂᖏᓐᓂ.
ᑲᓇᑕᒥ, ᒥᕐᖑᐃᖅᓯᕐᕖᑦ ᓄᓇᑦᑎᐊᕙᐃᓪᓗ ᓄᑖᖑᓐᖏᑦᑐᑦ. ᐱᑕᖃᐃᓐᓇᖅᓯᒪᔪᑦ ᑕᐃᒪᓐᖓᓂ ᐹᓐᑉ ᑲᓇᑕᒥ ᒥᕐᖑᐃᓯᖅᕕᖓ ᓴᖅᑭᖅᑕᐅᒻᒪᑦ ᓄᓐᖑᐸᓗᖏᓐᓂ 1800, ᓄᓇᕗᒻᒥᓗ, ᑕᐃᒪᓐᖓᓂ ᑕᓚᓐ ᓂᕐᔪᖃᕐᕕᖓᓐᓂ ᓯᕗᓪᓕᖅᐹᒥ ᐸᖅᑭᔭᐅᒍᒪᓕᓚᐅᖅᓯᒪᓪᓗᓂ 1920-ᖏᓐᓂ. ᐃᓚᖏᓐᓂ ᓄᓇᕐᔪᐊᒥ ᐱᕙᓪᓕᐊᔪᖃᐃᓐᓇᕐᖓᑦ ᐊᖏᓗᐊᓐᖏᑦᑐᑦ ᐊᑦᑐᖅᑕᐅᓯᒪᓐᖏᑦᑐᑦ ᓄᓇᐃᑦ, ᓇᓗᓇᓐᖏᑦᑎᐊᖅᑐᖅ ᐱᒻᒪᕆᐅᓂᖏᓐᓂ ᑕᒪᒃᑯᐊ ᐸᖅᑭᔭᕆᐊᖃᕋᑦᑎᒍ ᐊᕙᑎᕗᑦ ᐃᓗᓕᖏᓪᓗ. ᑭᓯᐊᓂᓕ, ᑲᓇᑕᐅᑉ ᐅᑭᐅᖅᑕᖅᑐᖓᓐᓂ, ᐱᖃᓯᐅᑎᓪᓗᒍ ᓄᓇᕗᑦ, ᓄᓇᖓ ᓱᕐᕋᑦᑕᐅᓗᐊᖅᓯᒪᓐᖏᑦᑐᖅ, ᑕᐃᒪᐃᓐᓂᖓᓐᓄᑦ ᐃᓱᒪᒋᔭᕆᐊᖃᖅᑲᕗ ᒥᕐᖑᐃᖅᓯᕐᕕᓕᕆᓂᖅ ᓄᓇᑦᑎᐊᕙᐃᓪᓗ.
ᐅᐊᑦᑎᐊᕈᓕ, ᑕᐃᒪᐃᑦᑐᖃᓐᖏᑦᑎᐊᖅᑐᓂᓗ ᑲᓇᑕᒥ ᒥᐊᓕᒐᕐᓂᓪᓗ, ᐱᕈᕐᓂᖏᑦ ᓄᓇᕗᑦ ᒥᕐᖑᐃᖅᓯᕐᕖᑦ, ᐱᐅᖅᓱᐊᖅᑕᐅᔪᓪᓗ, ᐊᓯᖏᓪᓗ ᐸᖅᑭᔭᐅᔪᑦ ᐱᒋᐊᓚᐅᖅᓯᒪᔪᑦ ᒪᑭᒪᔾᔪᑎᔅᓴᐅᓪᓗᑎᒃ ᐋᖅᑭᓯᒪᓂᑐᐃᓐᓇᕆᓐᖏᑕᖏᑦ, ᑕᑯᒥᓇᕐᓂᖏᑦ ᖃᐅᔨᓴᕐᓂᒃᑯᖏᑦᑐᖅ, ᒪᑭᒪᔾᔪᑎᔅᓴᖅᑎᒍᓪᓗ ᐊᕙᑎᑦᑎᓐᓂ ᖃᐅᔨᓴᕐᓂᐅᖏᑦᑐᒥᑦ. ᑭᓯᐊᓂᓕ, ᖃᐅᒪᓂᖅᓴᐅᓕᖅᑐᒍᑦ ᖃᐅᔨᒪᓂᖅᓴᐅᓕᖅᑐᒍᑦ ᑐᑭᓯᐅᒪᓂᖅᓴᐅᓕᖅᑐᑕᓗ ᐸᖅᑭᔭᕆᐊᓕᑦᑎᓐᓂ ᓂᕐᔪᑎᓂᑦ, ᓄᓇᑐᖃᐅᓯᒪᔪᓂᒃ, ᐳᓚᕋᖅᑐᓕᕆᓂᕐᒥᑦ ᒥᕐᖑᐃᖅᓯᓂᕐᒥᓪᓗ; ᐃᓕᓴᕆᖃᓯᐅᑎᒻᒥᓗᒋᑦ ᐊᓯᖏᑦ ᓄᓇᐃᑦ ᐊᑑᑎᖃᕈᓐᓇᖅᑐᑦ ᓄᑖᖅᑎᒍᑦ ᑲᒪᒋᓕᕐᓗᑎᒍ ᒥᕐᖑᐃᖅᓯᕐᕖᑦ ᓄᓇᑦᑎᐊᕙᐃᓪᓗ.
