ᓴᓂᑭᓗᐊᖅ
ᓄᓇᕗᒻᒥ ᒥᕐᖑᐃᖅᓯᕐᕕᖕᓄᑦ ᐱᓕᕆᐊᖅ ᐱᕙᓪᓕᐊᑎᑕᐅᓂᖓᓄᑦ, ᐊᕙᑎᓕᕆᔨᒃᑯᑦ, ᒥᕐᒍᐃᖅᓯᕝᕕᓕᕆᔨᒃᑯᖏᑦ ᓴᐳᒻᒥᔭᖅᑕᐅᕝᕕᓕᕆᔨᖏᓪᓗ ᖃᐅᔨᓴᖅᑐᑦ ᓴᓇᔭᐅᓪᓗᐊᕐᒪᖔᑦ ᒥᕐᖑᐃᖅᓯᕐᕕᒃ ᐅᕝᕙᓘᓐᓃᑦ ᓴᐳᒻᒥᔭᐅᕝᕕᒃ ᓴᓂᑭᓗᐊᕐᒥ ᐊᕙᑎᐊᓂᓗ ᓴᐳᒻᒥᓂᕐᒧᑦ ᐊᕙᑎᐊᑕ ᐃᓕᖅᑯᓯᒃᑯᑦ ᐱᖅᑯᓯᕆᖃᑦᑕᖅᓯᒪᓂᕆᔭᖓ, ᐱᕕᒃᓴᖃᖅᐹᓪᓕᖅᑎᑦᑎᓂᕐᒧᓪᓗ ᐱᙳᐊᖅᑐᓕᕆᓂᕐᒥᒃ, ᐳᓚᕋᖅᑐᓕᕆᓂᕐᒥᒃ, ᑮᓇᐅᔭᓕᐅᕈᑎᒃᓴᒃᑲᓐᓃᑦ ᐱᕚᓪᓕᖅᐸᓪᓕᐊᑎᑕᐅᓂᖏᓐᓂᒡᓗ.
ᓴᓂᑭᓗᐊᖅ ᕿᑭᖅᑕᐃᓪᓗ ᓯᓚᑖᓂ, ᐅᖓᓯᖕᓂᖃᖅᑐᑦ 150ᓂᒃ ᑭᓛᒥᑕᓂᒃ ᑯᐸᐃᒃᒥᑦ ᕼᐊᑦᓴᓐ ᐸᐃᑉ ᓂᒋᐊᑕ ᑲᓇᖕᓇᖅᐸᓯᐊᓂ, ᓇᓗᓇᐃᖅᓯᕗᖅ ᐊᔾᔨᒋᔭᐅᙱᑦᑐᒥ ᐃᒪᖃᖅᑐᒥᒃ/ᓯᒡᔭᒥᒃ ᒫᓐᓇᐅᔪᖅ ᓇᓗᓇᐃᖅᑕᐅᓯᒪᙱᑦᑐᒥᒃ ᓄᓇᕗᒻᒥ ᒥᕐᖑᐃᖅᓯᕐᕕᖕᓄᑦ ᐱᓕᕆᐊᕐᒥ. ᑕᒪᒃᑭᖅᖢᒋᑦ ᕿᑭᖅᑕᐃᑦ 1500ᖑᔪᑦ ᐅᖓᑖᓂ ᑲᑎᖦᖢᒋᑦ ᐊᖏᑎᒋᓂᖃᖅᖢᓂ 1,300 ᑭᓛᒥᑕᓂᒃ ᑭᑉᐹᕆᒃᑐᓂᒃ, ᑖᓐᓇ ᐅᐸᒃᑕᐅᔪᓐᓇᖅᑐᖅ ᐅᑭᐅᖅᑕᖅᑑᑉ ᓂᒋᖅᐸᓯᐊᓂ ᑭᒡᓕᒋᔭᐅᔪᖅ ᐊᒥᓱᓄᑦ ᐅᑭᐅᖅᑕᖅᑐᕐᒥ ᐆᒪᔪᓄᑦ ᑕᒪᑐᒪ ᒥᒃᓵᓄᑦ ᐱᒻᒪᕆᐅᓪᓗᓂ ᖃᐅᔨᓴᖅᑕᐅᒃᑲᓐᓂᓪᓗᐊᕐᓂᖓ ᓯᕗᓂᒃᓴᒥᓗ ᓴᐳᒻᒥᔭᐅᓪᓗᐊᕐᓂᖓ. ᐃᒪᕐᒥᐅᑕᐃᑦ ᑎᖕᒥᐊᑦ ᐃᕙᕙᒃᑐᑦ ᐊᒻᒪᓗ ᐊᕿᒡᒋᑦ ᒥᑏᓪᓗ ᐆᒪᔪᐃᓪᓗ ᐊᕐᕌᒎᑉ ᐃᓚᐃᓐᓇᖓᓂ ᓴᖅᑭᑉᐸᒃᑐᑦ ᓲᕐᓗ ᖃᓯᒋᐊᑦ, ᕿᓚᓗᒐᐃᓪᓗ ᐅᓄᖅᐸᒃᖢᑎᒃ ᕿᑭᖅᑕᓂ. ᑲᔾᔮᕐᓇᖅᑐᖅᑕᖃᐅᕐᓂᖓᓄᑦ ᐃᓚᐅᓪᓗᑎᒃ ᖁᕐᓗᖅᑐᑦ, ᓄᓇᐅᑉ ᐋᖅᑭᒃᓯᒪᓂᖓᒍᑦ ᐊᔾᔨᐅᙱᑦᑐᑦ, ᓯᐅᕋᓪᓗᑎᒃ ᓯᒡᔭᐃᑦ, ᑲᖏᖅᖢᐃᓪᓗ ᓴᖑᕈᓘᔭᖅᐸᒃᑐᑦ ᑲᖏᖅᖢᐊᓗᐃᓪᓗ ᕿᑭᖅᑕᐃᑦ ᐅᐸᒡᕕᐅᔪᒥᓇᑦᑎᐊᖅᐳᑦ ᐃᒪᕐᒥ ᐱᙳᐊᖅᑐᓕᕆᓂᕐᒧᑦ ᑐᙵᕕᖃᖅᑐᓂᒃ ᑐᙵᕕᒋᔭᐅᓗᓂᓗ ᐳᓚᕋᖅᑐᓕᕆᓂᖅ ᐱᕙᓪᓕᐊᑎᑕᐅᓂᖓᓄᑦ. ᑭᖑᓪᓕᕐᒥ, ᕿᑭᖅᑕᐃᑦ ᐊᑑᑎᒃᓴᖃᐅᖅᐳᑦ ᐱᔾᔪᑎᒋᓪᓗᒋᑦ ᖃᓄᐃᓕᐅᖅᑕᐅᓂᑯᑦ ᐃᓕᖅᑯᓯᓕᕆᓂᕐᓗ. ᐅᖓᑖᓂ 67ᖑᔪᑦ ᑎᑎᕋᐅᓯᕆᔭᐅᓯᒪᔪᑦ ᐃᑦᑕᕐᓂᓴᖃᕐᕖᑦ ᐱᒋᐊᕐᓂᖃᖅᖢᑎᒃ ᑐᓃᑦ ᐱᑕᖃᖅᑎᓪᓗᒋᑦ (500ᓂᑦ ᐊᕐᕌᒍᓂᑦ) ᓇᓗᓇᐃᖅᑕᐅᓯᒪᔪᑦ ᐱᑕᖃᖅᑎᑕᐅᓂᖓᓗ ᒥᕐᖑᐃᖅᓯᕐᕕᒡᓘᓐᓃᑦ ᓴᐳᒻᒥᔭᐅᕝᕕᒡᓘᓐᓃᑦ ᑖᒃᑯᓂᖓ ᐃᓕᖅᑯᓯᓕᕆᓂᕐᒧᑦ ᐊᑑᑎᒃᓴᓂᒃ ᐱᑕᖃᐃᓐᓇᖅᑎᑦᑎᔾᔪᑕᐅᔪᓐᓇᖅᖢᓂ ᑐᑭᓕᐅᕐᕕᖃᖅᑎᑦᑎᓗᓂ ᐱᖅᑯᓯᓕᕆᓂᒃᑯᓪᓗ ᖁᕕᐊᓲᑎᖃᖅᑎᑦᑎᓗᓂ ᓄᓇᓕᖕᒥᐅᑕᓄᑦ ᐳᓚᕋᖅᑎᓄᓪᓗ.
ᓄᓇᕗᒻᒥ ᒥᕐᖑᐃᖅᓯᕝᕕᓕᕆᔩᑦ ᒫᓐᓇᐅᔪᖅ ᓴᓇᖃᑎᒋᕚᑦ ᓄᓇᓖᑦ ᑲᑎᖅᓱᐃᓂᕐᒥᒃ ᖃᐅᔨᒃᑲᐃᔾᔪᑎᓂᒃ ᖃᓄᖅᑑᕐᓂᕐᒥᒡᓗ ᓄᓇᕗᒻᒥ ᒥᕐᖑᐃᖅᓯᕐᕕᒃ ᐅᕝᕙᓘᓐᓃᑦ ᓴᐳᒻᒥᔭᖅᑕᐅᕝᕕᒃ ᓴᓇᔭᐅᓂᖓᓄᑦ ᐊᕙᑖᓂ.
