ᓇᓄᖅᑕᖃᖅᑎᓪᓗᒍ ᐊᑦᑕᓇᖅᑕᐃᓕᒪᔪᒦᓐᓂᖅ

ᓄᓇᕗᒃᑰᖅᑐᓂ ᓇᓄᖅᑕᓕᒃᑰᖅᑯᑎᑦ. ᓇᓄᐃᑦ ᐊᖏᓂᖅᐹᖑᖃᑕᐅᔪᑦ ᓂᕿᑐᖅᑎᐅᖃᑕᐅᓪᓗᑎᒃ ᓯᓚᕐᔪᐊᒥ. ᓴᓐᖏᔪᐊᓗᐃᑦ, ᓱᒃᑲᓕᔪᐊᓗᖏᑦ ᐊᐅᓚᔾᔭᔅᓴᕋᐃᑦᑐᑎᓪᓗ ᓯᑯᒃᑯᑦ, ᓄᓇᒃᑯᑦ ᐃᒪᒃᑯᓪᓗ. ᐊᑦᑕᓇᖅᑕᐃᓕᒪᔪᒦᒍᓐᓇᖅᑐᑎᑦ ᕿᒪᕉᑎᑦᑎᐊᒻᒪᕆᓪᓗᑎᑦ.

ᓇᓄᕐᒥᑦ ᐅᖓᓯᓐᓂᕆᒋᐊᖃᖅᑕᓯ

ᓇᓄᖅᑕᖃᓲᖅ ᓯᑯᒥᑦ ᓯᔾᔭᓂᑦ ᐅᑭᐅᖅᑕᖅᑐᑉ ᐃᒪᕕᖏᓐᓂ ᕿᑭᖅᑕᖏᓐᓂᓪᓗ ᑕᐅᓄᖓ ᓂᒋᐊᓄᑦ ᑲᖏᖅᓱᐊᓘᑉ ᐃᒪᖓᓐᓄᑦ. ᐃᒪᕐᒥᐅᑕᐅᒐᔪᑦᑐᑦ ᓄᓇᒥᓪᓘᓐᓃᑦ ᓯᔾᔭᒥᑦ ᖃᓂᑦᑐᒥᑦ. ᐊᐅᔭᒃᑯᑦ, ᓇᓄᐃᑦ ᓯᔾᔭᒃᑰᖃᑦᑕᓲᑦ ᓄᓇᒥᑦ ᓇᓗᓇᐃᒃᑯᑎᖃᖅᑐᑎᑦ ᐃᓐᓇᕈᓂᓪᓗ. ᓄᓇᒃᑰᓲᖏᒻᒥᔪᑦ ᑕᑯᔪᖃᖃᑦᑕᖅᓯᒪᒻᒥᔪᖅ ᐅᖓᓯᑦᑎᒋᔪᒥᑦ 150-ᑭᓚᒦᑕᒥᑦ ᓯᔾᔭᒥᑦ.

ᓇᓄᐃᑦ ᓂᕆᕕᒋᒐᔪᓲᖏᑦ

ᐅᑭᐊᔅᓵᒃᑯᑦ, ᐅᑭᐅᒃᑯᑦ ᐅᐱᕐᖓᓵᒃᑯᓪᓗ ᓇᓄᐃᑦ ᓇᑦᑎᓯᐅᖃᑦᑕᓲᑦ ᓯᓈᓂ, ᓯᑯᓯᒪᓐᖏᑦᑐᓂᑦ ᓯᔾᔭᓂᓪᓗ. ᓇᑦᑎᓯᐅᓲᖑᒻᒥᔪᑦ ᓯᑯᒥ ᓵᖅᑐᒥ ᐋᔪᕋᕐᓂᓪᓘᓐᓃᑦ ᓲᕐᓗ ᐅᓕᓐᓂᕐᒥᑦ ᓯᔾᔭᓂᑦ ᐅᕝᕙᓘᓐᓃᑦ ᓯᕐᒥᓕᐅᑉ ᐃᓱᐊᓂ.

ᐅᐱᕐᖓᓵᒃᑯᑦ ᐊᑎᖅᑕᓖᑦ ᓇᑦᑎᓯᐅᓲᑦ ᐊᓪᓗᕐᒥ ᓯᔾᔭᐅᑉ ᖃᓂᒋᔭᖏᓐᓂ, ᐊᒻᒪᓗ ᐋᔪᕋᕐᓂᑦ, ᐱᓗᐊᖅᑐᒥᑦ ᐃᒪᕕᒻᒥ.

ᐅᐱᕐᖔᒃᑯᑦ ᓇᓄᐃᑦ ᓯᔾᔭᒦᓕᓲᑦ ᓯᑯᐃᕋᐃᒻᒪᑦ. ᓂᕆᓲᑦ ᑎᒻᒥᐊᓂᑦ, ᒪᓐᓂᓂᑦ, ᐆᒪᔪᕐᓂᑦ ᒥᑭᔪᓂᑦ ᓯᔾᔭᓱᖅᑐᑎᑦ, ᓯᔾᔭᓂᑦ ᕿᑭᖅᑕᓂᑦ ᓯᔾᔭᐅᑉ ᖃᓂᒋᔭᖏᓐᓂ. ᓂᕿᔅᓴᖅᓯᐅᓲᖑᒻᒥᔪᑦ ᐃᓄᓐᓄᑦ ᕿᒪᑦᑕᒥᓂᕐᓄᑦ ᓂᕆᔭᐅᓐᖏᓂᕐᓗᑯᓐᓂᑦ.

ᓇᓄᐃᑦ ᑎᓯᖃᕐᑯᖏᑦ

ᐅᑭᐊᔅᓵᒃᑯᑦ, ᐅᑭᐅᒃᑯᑦ ᐅᐱᕐᖓᓵᒃᑯᓪᓗ ᑎᓯᖃᕋᔪᓲᑦ ᓈᓐᖑᐊᕐᓂᑦ ᓯᕕᖓᔪᓂᑦ ᓯᔾᔭᐃᑦ ᖃᓂᒋᔭᖏᓐᓂ ᐊᒻᒪᓗ ᓇᖅᓴᓂᑦ. ᐊᑎᖅᑕᓖᑦ ᑎᓯᖏᑦ ᖁᑦᑎᓂᖅᓴᒦᑦᑐᑦ ᐊᐳᑎᓂᑦ ᓯᕐᒥᓕᓐᓂᓪᓗ. ᑎᓯᖏᑦ ᒪᓗᒋᔭᔅᓴᐅᑦᑎᐊᓐᖏᑦᑐᑦ ᑭᓯᐊᓂᓕ ᑐᒥᖃᓲᖑᓂᖏᓐᓄᑦ ᓇᓗᓇᓲᖑᓐᖏᑦᑐᑦ ᑎᓯᖓᓅᖅᓯᒪᔪᓄᑦ, ᐊᒻᒪᓗ ᐊᓂᖅᓵᖅᑐᕐᕕᖏᑦ ᑎᓯᖏᓐᓂ ᓇᓗᓇᓲᖏᑦᑐᑦ ᓇᒦᓐᓂᖏᓐᓂ.

ᐅᑭᐅᒃᑯᑦ ᑎᓯᖃᑲᐃᓐᓇᓲᑦ ᐅᓪᓗᒃᑯᑦ ᐊᑐᕐᓂᐊᖅᑕᖏᓐᓂ ᐊᐳᑎᓂᑦ ᓯᔾᔭᐅᓪᓘᓐᓃᑦ ᖃᓂᒋᔭᖏᓐᓂ. ᐊᑐᖅᑕᐅᑲᐃᓐᓇᓲᑦ ᑕᖃᐃᖅᓯᕕᐅᓪᓗᑎᑦ ᓯᓚᑲᐅᒻᒪᐅᓂᖓᓄᓪᓘᓐᓃᑦ ᐊᑐᖅᑕᐅᑲᓐᓇᓲᑦ ᐅᓪᓗᒐᓚᓐᓄᑦ ᐊᓪᓛᖃᐃ ᑕᖅᑭᒐᓚᓐᓄᑦ.

ᐊᐅᔭᒃᑯᑦ ᓯᑯᖃᕈᓐᓃᖅᑎᓪᓗᒍ ᑎᓯᖏᑦ ᐊᒻᒪᔪᖃᓕᓲᑦ ᖁᓛᒍᑦ ᖁᐊᕈᔾᔭᒥᓃᓪᓘᓐᓃᑦ ᓄᓇᒧᑦ ᑎᓯᖏᑦ. ᑎᓯᖏᑦ ᖁᑦᑎᑐᒦᓐᓂᖅᓴᐅᓕᓲᑦ ᐊᐳᒻᒥᑦ, ᓯᕐᒥᓕᒻᒥ ᓇᖅᓴᓂᓪᓘᓐᓃᑦ, ᓂᓪᓕᓇᖅᑐᒦᑦᑎᐊᖅᑐᑎᑦ ᑭᑦᑐᕆᐊᕈᔪᓐᓂᓪᓗ ᕿᒫᓯᒪᓪᓗᑎᑦ.

ᓇᓄᖅᓯᖅᑕᐃᓕᒪᓂᖅ

ᐅᔾᔨᓱᖅᑎᐊᕐᓗᑎᑦ. ᑲᑎᓐᖓᖃᑦᑕᕐᓗᓯ ᑎᓴᒪᐅᖃᑦᑕᕐᓗᓯᖃᐃ ᐊᑦᑕᓇᖅᑎᒦᖁᓇᓯ. ᓇᓄᖅᑕᓕᒃᑰᕐᓂᕈᔅᓯ ᓂᐱᖃᕋᓱᐊᖃᑦᑕᕐᓗᓯ. ᖃᐅᒪᓂᖓᓂ ᐱᓱᖃᑦᑕᕐᓗᓯ ᖃᐅᔨᒪᓇᓱᐊᑦᑎᐊᕐᓗᑎᓪᓗ ᓇᒥᑐᐃᓐᓇᖅ ᓄᓇᒥ. ᓇᓄᐃᑦ ᑖᓂᑭᑦᑐᕈᓘᒍᓐᓇᕐᖓᑕ. ᕿᒥᕐᕈᖃᑦᑕᕐᓗᓯ ᐃᒡᒐᐅᔭᕐᓄᑦ ᑕᕐᑳᖅᓯᑲᐃᓐᓇᓂᔅᓯᓐᓂ. ᑕᑯᔅᓴᐅᑦᑎᐊᖏᑦᑐᒃᑰᕋᓱᖃᑦᑕᖏᓪᓗᓯ, ᓯᔾᔭᒃᑯᑦ, ᐅᔭᕋᒃᑯᑦ, ᕿᔪᑦᑕᓕᓐᓂᓪᓘᓐᓃᑦ ᓯᔾᔭᓲᕐᔭᒥᓂᕐᓂᑦ ᐱᕈᖅᑐᓂᓪᓘᓐᓃᑦ. ᑐᒥᓯᐅᖃᑦᑕᕐᓗᓯ, ᐊᓇᖏᓐᓂ ᐸᒃᑲᑦᑕᒥᓂᖏᓐᓂᓪᓘᓐᓃᑦ.

ᓇᓄᕐᒥᑦ ᐅᐹᔭᕆᐊᖃᓐᖏᑦᑐᖅ. ᓇᓄᐃᑦ ᐃᓂᒥᓐᓂᒃ ᐅᐸᑦᑕᐅᖁᔨᓐᖏᑦᑎᐊᕐᖓᑕ ᑲᑉᐱᐊᓱᑐᐃᓐᓇᕆᐊᖃᕐᖓᑦ. ᓂᕆᑎᖃᑦᑕᖏᓪᓗᒋᑦ ᓇᓄᐃᑦ ᐊᓯᖏᓪᓘᓐᓃᑦ ᓂᕐᔪᑏᑦ. ᓇᓄᐃᑦ ᖃᐅᔨᑐᐊᕈᑎᑦ ᐃᓄᐃᑦ ᓂᕿᓖᑦ ᐊᑦᑕᓇᖅᑐᒦᓂᕈᓐᓇᖅᑐᑦ. ᐅᐸᒍᑎᖃᑦᑕᖏᓪᓗᓯᓗ ᓂᕐᔪᑎᒥᓂᕐᓂᑦ. ᓇᓄᖅᑕᖃᑐᐃᓐᓇᕆᐊᖃᕐᖓᑦ. ᕿᒪᕉᑎᑦᑕᐅᑎᒋᓗᓯ.

ᓇᓄᖅᓯᓂᖅ

ᓇᓄᖅᓯᑐᐃᓐᓇᕆᐊᖃᖅᑐᑎᑦ ᐱᔮᖅᑯᑕᐅᓐᖏᑦᑐᒥᑦ ᐅᕝᕙᓘᓐᓃᑦ ᒪᓕᑦᑐᒥᓂᕐᒥᑦ ᖃᓄᐃᓘᖅᑎᓪᓗᓯ. ᓇᓄᐃᑦ ᖃᐅᔨᒍᒪᓲᖑᒻᒪᑕ ᐅᒡᒋᐊᒋᔭᖏᓐᓂ ᑭᓱᑐᐃᓐᓇᕐᓂᑦ, ᓇᐃᒪᔭᖏᓐᓂ ᓂᐱᓕᓐᓂᓪᓘᓐᓃᑦ. ᐅᐃᒪᔮᕐᓂᐊᖏᓚᓯ ᖃᐅᔨᓴᑦᑎᐊᕐᓗᓯᓗ ᖃᓄᐃᓕᖓᓂᔅᓯᓐᓂ. ᐊᔾᔨᒌᖃᑦᑕᖏᒻᒪᑕ ᖃᖓᑐᐃᓐᓇᖅ ᓇᓄᖅᓯᓪᓗᓂ. ᖃᐅᔨᒪᓇᓱᐊᑦᑎᐊᕐᓗᓯ, ᓈᒪᒋᔭᓯᓗ ᐊᑐᕋᓱᐊᕐᓗᒋᑦ ᖃᐅᔨᒪᓂᖅᓴᕆᓪᓗᒋᑦ ᓇᓄᐃᑦ ᖃᓄᐃᒍᓐᓇᕐᓂᖏᑦ ᐱᒻᒪᕆᐅᒋᕗᖅ.

ᓇᓄᐃᑦ ᒪᓗᒍᓱᑦᑐᑦ - ᓇᓄᐃᑦ ᖃᐅᔨᒪᒍᑎᑦ ᑕᒫᓃᒃᑲᕕᑦ ᒪᓗᒍᓱᑉᐸᑕ ᓲᕐᓗ ᓱᒃᑲᐃᑦᑐᐊᓘᓪᓗᑎᒃ ᓄᖅᑲᖃᑦᑕᖅᑐᑎᑦ, ᓇᖏᖃᑦᑕᖅᑐᑦ ᓇᐃᒪᓇᓱᐊᖅᑐᑎᑦ, ᓈᓚᒐᓱᑦᑐᑎᑦ ᓯᐅᑎᖏᑦ ᓇᐸᓪᓗᑎᑦ ᓴᓂᕌᓃᑦᑐᑎᓪᓘᓐᓃᑦ, ᓂᐊᖁᖏᑦ ᓴᓂᒨᖃᑦᑕᖅᑐᑦ, ᐅᖅᑯᓕᓂᔅᓯᓐᓄᓪᓘᓐᓃᑦ ᓇᐃᒪᓇᓱᐊᕈᑎᒃ ᐅᐹᔭᕐᓂᖅᑲᑕᓘᓐᓃᑦ ᑐᓄᔅᓯᓐᓂ, ᐅᓪᓚᒃᑲᔭᓐᖏᓚᓯ. ᓱᒃᑲᐃᕋᔮᕐᓗᓯ ᐱᓱᒃᑲᔭᖅᑐᓯ. ᖃᐅᔨᒪᑎᓪᓗᒋᑦ ᐃᓅᓂᔅᓯᓐᓂ ᓂᐱᒃᑭᐅᓗᐊᓐᖏᓪᓗᑎᑦ ᓂᓪᓕᐊᓗᑎᒃ. ᐅᖅᑯᐊᓕᓂᔅᓯᓐᓄᑦ ᓇᓛᒍᑦ ᐱᓱᓪᓗᓯ ᓇᐃᒪᓂᐊᕐᖓ ᐃᓕᔅᓯᓐᓂ. ᓇᐅᒃᑰᕐᓂᐊᕐᓂᓯᓐᓂ ᖃᐅᔨᒪᑦᑎᐊᕋᓱᐊᕐᓗᓯ. ᐅᓪᓚᔅᓯᒐᔭᓐᖏᓚᓯ.
ᓇᓄᐃᑦ ᓇᒻᒥᓂᖅ ᓯᕐᓈᖅᑐᑦ - ᖁᐊᖅᓵᕐᓂᖅᑲᑦ ᐹᑲᓪᓚᓪᓗᒍ ᐊᑲᖅᓴᖅᐸᓗᓐᖏᑉᐸᓪᓘᓐᓃᑦ ᐃᓕᒪᓱᓕᕐᓂᖅᑲᑦ ᓲᕐᓗ ᐊᓂᖅᓵᖅᑐᖅᑐᐊᓘᓪᓗᓂ, ᐊᓂᖅᑎᕆᔪᐊᓘᓐᓂᖅᑲᓪᓘᓐᓃᑦ, ᖃᓂᓐᖑᓛᖅᑲᑦ, ᑮᒋᐊᖅᐸᓪᓗᓂ, ᐃᓯᒐᖏᑦ ᓇᓗᓇᓐᖏᑦᑐᑦ ᐅᐹᔭᕐᓂᐊᖅᑐᖅ, ᑕᑯᓐᓇᕐᓗᓂ ᐃᓄᒻᒥᑦ, ᐅᑯᖓᑉᐸᓪᓘᓐᓃᑦ ᓯᐅᑎᖏᑦ ᑐᓄᐊᓃᑦᑎᒋᐊᖅᑐᓂᒋᑦ, ᐅᓪᓚᓯᒃᑲᔭᓐᖏᓚᓯ. ᓱᒃᑲᐃᓪᓗᑎᑦ ᕿᒫᒐᔭᖅᑯᓯ. ᖃᐃᒐᓛᓐᖏᓪᓗᓯ ᐊᐅᓪᓚᔾᔭᑲᓪᓚᖃᑦᑕᖏᓪᓗᓯᓗ. ᐃᔨᖏᒃ ᑕᑯᓐᓇᖅᑕᐃᓕᒪᓗᒋᒃ. ᑲᑉᐱᐊᓇᖅᑐᒐᓱᓐᖏᓪᓗᑎᑦ. ᓄᖅᑲᖓᔾᔪᑎᔅᓴᓂᑦ ᖃᓄᖅᑐᕐᓗᑎᑦ. ᐅᓪᓚᔅᓯᒐᔭᓐᖏᓚᓯ.
ᓇᓄᐃᑦ ᓂᕿᔅᓴᖅᓯᐅᖅᑐᑦ - ᓇᓄᖅ ᒪᓕᓐᓂᖅᑲᑦ ᓂᕿᔅᓴᖅᓯᐅᕋᓱᓪᓗᓂᓘᓐᓃᑦ ᐃᓕᓐᓂᑦ ᐅᐃᔾᔭᓪᓚᐃᖃᑦᑕᕐᓗᓂᓘᓐᓃᑦ, ᐅᐹᔭᖃᑦᑕᕐᓗᓂ, ᑲᑉᐱᐊᓱᓐᖏᓪᓗᓂ, ᐅᑎᕐᓂᖅᑲᓪᓘᓐᓃᑦ ᑲᑉᐱᐊᓱᓚᐅᕐᓗᓂ, ᐃᑭᖃᑦᑐᔮᖅᑲᑦ, ᐃᓐᓈᓘᑉᐸᑦ ᓴᓪᓗᐊᓘᓗᓂᓘᓐᓃᑦ, ᐅᓪᓚᓯᒐᔭᓐᖏᓚᑎᑦ. ᑲᑎᒋᐊᕐᓗᓯ ᓂᐱᒃᑭᐅᓗᓯᓗ. ᖃᓄᖅᑐᕋᔭᖅᑯᓯ ᓇᐅᒃᑰᕐᓂᕆᓂᐊᖅᑕᓯᓐᓂ. ᐊᑭᒋᐊᕈᓐᓇᕐᓗᓯᓗ. ᐅᓪᓚᔅᓯᒐᔭᓐᖏᓚᓯ.
ᐊᑎᖅᑕᓖᑦ - ᐊᑯᓐᓂᖓᓅᕋᔭᓐᖏᑦᑎᐊᖅᑯᑎᑦ ᐊᑎᖅᑕᖏᓐᓂ ᐊᕐᓇᓗᓪᓗ. ᐊᑎᖅᑕᓕᖅᓯᒍᕕᑦ, ᐅᓪᓚᔅᓯᒐᔭᓐᖏᓚᓯ. ᑲᑎᒋᐊᕐᓗᓯ ᕿᒪᕉᑎᑦᑕᐅᑎᒋᒐᔭᖅᑯᓯ. ᐊᑭᓂᐊᕋᔭᖅᑯᓯ ᐅᐹᓴᕐᓂᖅᑲᑦ.

ᓇᓄᖅᑕᐅᓐᓂᕈᕕᑦ ᑭᓱᑐᐃᓐᓇᑦᑎᐊᕐᓂ ᐊᑐᕋᓱᒃᑲᔭᖅᑯᑎᑦ ᐱᒋᐊᕐᓗᒍ ᓲᕐᓗ ᐅᔭᕋᕐᓂᑦ, ᓂᓚᓐᓂᑦ, ᓴᕕᓐᓂᑦ, ᐊᔭᐅᑉᐱᐊᓐᓂᑦ ᐊᓯᖏᓐᓂᓪᓘᓐᓃᑦ ᕿᔪᑯᑖᕐᓂᑦ.

ᑐᐱᕐᕕᖃᑦᑎᐊᕐᓂᖅ ᐊᑦᑕᓇᓐᖏᑦᑐᒥᑦ

ᓯᔾᔭᒥ ᑐᐱᖅᓯᒪᒐᔭᓐᖏᓚᓯ. ᓇᓄᐃᑦ ᓯᔾᔭᒃᑰᕋᔪᒻᒪᑕ ᓄᓇᒥᑦ ᒪᓕᑦᑐᑎᑦ ᕿᒡᒍᓂᓪᓗ ᓯᔾᔭᒃᑰᓲᖑᒻᒪᑕ. ᓇᖅᓴᑯᑖᕈᓗᒻᒥᓪᓗ ᑐᐱᖅᓯᒪᖃᑦᑕᖏᓪᓗᓯ ᐊᖅᑯᑎᓂᓪᓗ. ᓇᓄᕐᓄᑦ ᑕᒪᒃᑯᐊ ᐊᖅᑯᑕᐅᑐᐃᓐᓇᕆᐊᖃᕐᖓᑕ ᑲᖏᖅᑐᓅᕋᓱᑦᑐᑎᒃ ᓇᖅᓴᑰᖅᑐᑎᓪᓘᓐᓃᑦ. ᓄᓇᖅᐸᓯᒻᒥ ᑐᐱᖅᓯᒪᒐᔭᖅᑯᓯ ᖁᑦᑎᑦᑐᒥ, ᖃᖅᑲᒥ ᓇᒧᑐᐃᓐᓇᖅ ᑕᑯᕕᔅᓴᒥᑦ. ᓇᓄᕐᓄᑦ ᑐᒥᓯᐅᖃᑦᑕᕋᔭᖅᑯᓯ ᑐᐱᓚᐅᓐᖏᓐᓂᔅᓯᓐᓂ. ᑐᐱᕐᕕᓯ ᐊᐅᓪᓛᕋᔭᖅᑲᓯ ᓇᓄᖅᑕᖃᕐᓂᖅᑲᑦ ᑐᐱᕐᕕᒋᒐᓱᐊᖅᑕᓯᓐᓂ.

ᑐᐱᕐᕕᓯ ᓴᓗᒪᑎᖃᑦᑕᕐᓗᒋᑦ. ᓂᖅᑎᐅᕐᕕᓯ, ᓴᓗᒪᑎᖃᑦᑕᕐᓗᒋᑦ, ᓂᖀᑦ ᑐᖅᑯᖅᑕᓯ, ᓱᐴᔫᑦ, ᐅᒃᑯᓰᑦ ᓂᖅᑎᐅᕈᑎᓕᒫᓯᓗ ᐊᓐᓄᕌᓪᓗ ᓂᖅᑎᐅᖅᑐᑎᑦ ᐊᑐᖅᑲᐅᔭᑎᑦ ᓴᓂᓯᓗ, ᓂᕿᒥᓃᓪᓗ, ᐊᓪᓛᒃ ᑭᓱᑐᐃᓐᓇᐃᑦ ᓂᕿᓱᓐᓂᑦᑐᑦ 100-ᒦᑕᒥᑦ ᓯᓂᕝᕕᒋᓂᐊᖅᑕᓯᓐᓂ ᑐᖅᑯᖅᓯᒪᓗᒋᑦ. ᐊᑐᖃᑦᑕᕐᓗᓯ ᐴᔅᓴᓂᒃ ᑎᐱᖃᖅᑎᑦᑎᓐᖏᑦᑐᓂᑦ ᓂᕿᓂᑦ. ᑭᓈᓗᐃᑦ ᐴᖅᑲᖅᑕᐅᓯᒪᖃᑦᑕᕐᓗᑎᒃ ᓴᐅᔭᐅᓗᑎᓪᓘᓐᓃᑦ ᐅᔭᕋᕐᓄᑦ ᐱᓱᕝᕕᒻᒥ ᐅᖓᓯᒋᐊᕐᓗᒋᑦ, 100-ᒦᑕᒥᑦ ᑐᐱᕐᕕᒻᒥ ᐅᖓᓯᓐᓂᓕᒻᒥᑦ ᐃᒪᖅᑕᓕᒻᒥᓪᓘᓐᓃᑦ. ᐃᖂᑎᔅᓴᓕᒫᑦ ᐃᓗᐊᖁᑎᔅᓴᓪᓗ ᐴᖅᓯᒪᑦᑎᐊᕐᓗᒋᑦ ᓴᓂᒃᑯᕕᓐᓄᑦ. ᓴᓂᓕᒫᓯ ᐴᖅᑲᖃᑦᑕᕐᓗᒋᑦ ᓂᕿᒥᓃᓪᓗ ᐴᒥᓂᖏᑦ. ᐃᑭᖃᑦᑕᖏᓪᓗᒋᑦ ᐴᒥᓃᑦ ᓇᓄᕐᓄᑦ ᓇᐃᒪᔭᐅᓕᖅᑲᑕ ᐅᐹᔭᑐᐃᓐᓇᕆᐊᖃᕐᖓᑕ. ᓄᐊᖃᑦᑕᕐᓗᒋᓪᓗ ᑯᕕᔭᒥᓂᖅᑎᑦ ᓂᖅᑎᐅᖅᑎᓪᓗᑎᑦ ᓂᕆᑎᓪᓗᑎᓪᓗ. ᑐᐱᕐᕖᑦ, ᐃᒐᕖᑦ, ᑐᖅᑯᐃᕖᑦ ᐃᓄᐃᓪᓗ ᑭᓈᓗᖏᑦ ᐅᖓᓯᒋᐊᕐᓗᒋᑦ ᕿᒪᔅᓯᓵᕋᔭᕋᔅᓯ ᓇᓄᖅ ᑕᒫᓂ ᓇᐃᒻᒪᓐᓂᖅᑲᑦ.

ᓯᓚᑐᐃᓐᓇᕐᒥᑦ ᓯᓂᒋᐊᖃᖏᓐᑦᑐᖅ ᑐᐱᕐᒥᑦ ᑭᓯᐊᓂ. ᓂᕿᒡᒋᖃᑦᑕᖏᓪᓗᓯ ᑎᐱᓕᐊᓗᓐᓂᑦ ᑎᐱᑎᕈᑎᓂᓪᓘᓐᓃᑦ ᖃᓄᐃᑦᑐᑐᐃᓐᓇᕐᓂᑦ. ᑐᐱᖅᓯᓐᓃᑎᑦᑎᖃᑦᑕᖏᓪᓗᑎᑦ ᓂᕿᓂᑦ ᑎᐱᓕᓐᓂᓪᓘᓐᓃᑦ ᑐᐱᕐᒥᓪᓗ ᓂᖅᑎᐅᖃᑦᑕᖏᓪᓗᓯ.

ᖃᐅᔨᒃᑲᐃᔾᔪᑏᑦ - ᐃᓚᓕᒫᑦᑎᐊᑎᑦ ᖃᐅᔨᒪᒋᐊᖃᖅᑐᑦ ᖃᓄᖅ ᐊᑐᖅᑕᐅᒋᐊᖃᕐᒪᖔᑕ ᓇᓄᖅᓯᔪᖃᕐᓂᖅᑲᑦ ᖃᖓᑐᐃᓐᓇᑦᑎᐊᖅ. ᖃᐅᔨᒪᖃᑦᑕᐅᑎᓗᓯ ᖃᐅᔨᒃᑲᐃᔾᔪᑎᓂᒃ ᐃᒫᔾᔪᑎᓂᓪᓗ. ᖃᐅᔨᒪᓗᓯᓗ ᖃᓄᖅ ᖃᖓᓗ ᐊᑐᕆᐊᖃᕐᒪᖔᖅᐱᐅᒃ ᐊᐅᓪᓚᓚᐅᓐᖏᓂᔅᓯᓐᓂ. ᓇᔅᓴᖃᑦᑕᕐᓗᒋᑦ ᐋᖅᑭᔅᓱᖃᑦᑕᕐᓗᒋᓪᓗ ᐅᐊᔭᐃᑦ ᖃᐅᔨᐅᒃᑲᐃᔾᔪᑏᓪᓘᓐᓃᑦ ᓇᓄᕐᒧᑦ ᐅᐹᔭᖅᑕᐅᓐᓂᕈᔅᓯ ᑐᐱᕐᕕᓯᓐᓄᑦ.
ᕿᒫᑎᑦᑎᔾᔪᑏᑦ - ᒪᑯᐊ ᓂᐅᕕᐊᔅᓴᐅᔪᑦ ᓇᓄᕐᓄᑦ ᕿᒫᑎᑦᑎᔾᔪᑏᑦ ᓲᕐᓗ ᓂᐱᓕᐊᓗᐃᑦ, ᖁᖁᐊᕈᑏᑦ ᖁᑭᐅᑏᓪᓗ ᓇᓄᕐᓄᓪᓗ ᐳᔅᓴᐃᑦ ᐊᑐᖅᑐᐃᓐᓇᐅᒋᐊᖃᓐᖏᑦᑐᑦ ᐅᑭᐅᖅᑕᖅᑐᒥ. ᕿᒫᑎᑦᑎᔾᔪᑏᑦ ᐊᓯᐊᓂ ᓂᐅᕕᐊᕆᔭᐅᔪᓐᓇᖅᑐᑦ ᓴᓇᑕᐅᓗᑎᓪᓗ ᐅᓗᕆᐊᓇᖅᑐᖅᓯᐅᑎᐅᓗᑎᑦ. ᐸᐸᓕᒻᒧᑦ ᑎᒻᒥᑳᖅᑎᔾᔪᑏᑦ ᓇᓄᕐᓄᑦ ᐊᑐᕈᓐᓇᑐᔅᓴᐅᒻᒥᔪᑦ ᑭᓯᐊᓂᓕ ᖃᐅᔨᓴᖅᑕᐅᓗᐊᖅᓯᒪᓐᖏᑦᑐᑦ ᐊᑐᑎᖃᑦᑎᐊᕋᓗᐊᕐᒪᖔᑖ. ᖃᐅᔨᒪᓂᐊᖅᑯᓯ ᑎᒻᒥᑳᖅᑎᔾᔪᑏᑦ ᐱᔪᓐᓇᑐᐃᓐᓇᐅᓐᖏᑐᐃᓐᓇᕆᐊᖃᕐᖓᑕ ᓂᓪᓚᕐᒥᑦ ᖃᐅᓯᖅᑎᓪᓗᒋᓪᓘᓐᓃᑦ.
ᖁᑭᐅᑏᑦ - ᖃᐅᔨᒋᐊᕋᔭᖅᑯᑎᑦ ᓄᓇᕗᑦ ᒥᕐᖑᐃᖅᓯᕐᕕᖓᑕ ᐃᖅᑲᓇᐃᔭᖅᑎᖏᓐᓂ ᒪᓕᒐᐃᑦ ᒥᔅᓵᓄᑦ ᖁᑭᐅᓯᔭᕐᓂᕐᒥᑦ ᐊᑐᕐᓂᒥᓪᓗ.
ᕿᒻᒦᑦ - ᕿᒻᒥᓕᔭᖅᑐᓂ ᖃᐅᔨᕕᔅᓴᑦᑎᐊᕙᖅ ᓇᓄᕐᒥᑦ ᐅᐹᔭᖅᑐᖃᓕᕐᓂᖅᑲᑦ. ᕿᒻᒦᑦ ᐊᐅᓚᑕᐅᑦᑎᐊᖏᓐᓇᕆᐊᓖᑦ ᖃᖓᓕᒫᖅ. ᐱᑐᔅᓯᒪᖃᑦᑕᕐᓗᒋᑦ ᐅᓇᓂᖔᖅ ᐹᓐᖓᔮᖅᑲᑦ. ᓴᓗᒻᒪᖅᓴᖃᑦᑕᕆᐊᖃᕐᒥᔪᑦ ᓂᕆᕕᒥᓂᖏᑦ ᕿᒻᒦᑦ.

ᑐᐊᕕᕐᓇᖅᑐᖃᖅᑎᓪᓗᒍ

ᐸᖅᓴᐃᔩᑦ ᐱᔪᓐᓇᓐᖏᑐᐃᓐᓇᕆᐊᓖᒃ ᐱᔾᔪᑎᖃᖅᑐᑎᑦ ᓄᓇᓂᑦ, ᓯᓚᒥᑦ ᐊᑐᐃᓐᓇᐅᓂᖏᓐᓂᓪᓗ ᖃᖓᑕᓲᑦ. ᖃᖓᑕᓲᕐᓂᑦ ᐊᑐᐃᓐᓇᖅᑕᖃᐃᓐᓇᕈᓐᓇᖏᒻᒪᑦ ᐅᑭᐅᖅᑕᖅᑐᒥ. ᖃᖓᑕᓲᑦ ᖁᓛᒎᓖᓪᓗ ᐊᑐᐃᓐᓇᐅᓐᖏᓐᓂᖅᓴᐅᒻᒥᔪᑦ ᓄᓇᓕᕋᓛᓐᓂᑦ. ᑭᖑᕙᕆᐊᖅᓯᒪᒍᓐᓇᕐᒥᔪᑦ, ᐃᓛᓐᓂᒃᑯᑦ ᐅᓪᓗᒐᓚᓐᓄᑦ, ᓂᑦᑕᑦᑎᐊᖏᑉᐸᑦ, ᓯᓚᑲᒻᒪᐅᑉᐸᓪᓗ, ᐊᓄᕆᔪᐊᓘᑉᐸᓪᓗ. ᖃᖓᑕᓲᑦ ᑭᓯᐊᓂ ᒥᓲᑦ ᐊᑦᑕᓇᓐᖏᑦᑎᐊᕐᓂᐊᖅᑲᑦ.

ᐱᓯᒪᑦᑏᓐᓇᕐᓗᑎᑦ ᖃᓄᕐᓗ ᐊᑐᕆᐊᖃᕐᒪᖔᖅᐱᐅᒃ ᖃᐅᔨᒪᒋᐊᕐᓗᑎᑦ ᒪᑯᓂᖓ ᐅᕐᑳᓚᐅᑎᓂᒃ ᖃᖓᖅᑕᖅᑎᑕᐅᓯᒪᔪᒃᑯᑦ ᐊᑐᖅᑕᐅᕙᑦᑐᓂᒃ. ᐃᓚᖏᑦ ᐅᕐᑳᓚᐅᑏᑦ ᐊᑐᖅᑐᐊᕋᔅᓴᐅᒻᒥᔪᑦ ᓄᓇᕗᒻᒥ ᑭᓯᐊᓂᓕ ᐊᑐᖅᑐᐊᕐᓂᐊᕈᕕᑦ ᐊᖏᕐᕋᓐᓂ ᓇᔅᓴᖔᕈᕕᑦ ᐱᐅᓂᖅᓴᐅᒐᔭᖅᑐᖅ. ᖃᐅᔨᒪᑦᑎᐊᕋᓱᐊᕐᓂᐊᖅᑯᑎᑦ ᓄᓇᓖᑦ ᓄᓇᓐᖑᐊᖏᓐᓂ ᓯᓚᐃᓪᓗ ᖃᓄᐃᓐᓂᖏᓐᓂ ᐱᔪᓐᓇᑦᑎᐊᓲᖑᓐᖏᒻᒪᑕ ᐃᓛᓐᓂᒃᑯᑦ ᐅᖃᓚᐅᑏᑦ. ᑐᐊᕕᕐᓇᖅᓯᑳᓪᓚᓂᖅᑲᑦ ᐱᓯᒪᑦᑏᓐᓇᕆᐊᖃᖅᑐᑎᑦ ᑕᒻᒪᕇᒃᑯᑎᖃᕆᐊᖃᖅᑐᑎᑦ ᐊᑐᕐᓗᒍᓪᓗ ᓇᒦᓪᓚᕆᒻᒪᖔᖅᐱᑦ ᓇᓗᓇᐃᒃᑯᑎᒋᒐᔭᕋᕕᐅᒃ. ᖃᐅᔨᒪᒐᓱᐊᕋᔭᖅᑯᑎᑦ ᖃᓄᖅ ᐊᑐᖅᑕᐅᓲᖑᒻᒪᖔᑕ ᐊᐅᓪᓚᓚᐅᓐᖏᓂᓐᓂᑦ. ᐹᑕᓖᖏᑦ ᓂᓪᓚᕐᒥ ᐊᑯᓂᐅᓗᐊᕈᓐᓇᖏᑦᑐᑦ ᓂᓪᓕᓇᖅᓯᑎᑦᑕᐃᓕᒪᒐᔭᖅᑲᑦ ᐊᑐᕐᓗᒋᓪᓗ ᐊᑐᕆᐊᖃᓕᕈᕕᒋᑦ.

ᐸᖅᓴᐃᔪᖃᕐᓂᖅᑲᑦ ᐊᑭᖏᑦ ᐊᑭᓕᖅᑕᐅᒐᔭᖅᑐᑦ ᐳᓚᕋᖅᑎᓄᑦ ᐊᐃᔭᓄᑦ.

ᑐᑭᓯᒋᐊᕐᓂᖅ

ᐃᓱᒪᖅᓴᖅᓯᐅᕋᔭᖅᑯᑎᑦ ᐊᐅᓪᓚᕈᔾᔨᔨᒥᑦ ᐊᑐᕐᓂᐊᕐᒪᖔᖅᐱ ᒪᕐᕈᕈᓯᕈᕕᑦ ᓇᒻᒥᓂᖅ ᓇᓄᓕᕆᔪᓐᓇᔾᔮᓂᕐᓂᑦ. ᐃᒻᒥᓂᒃ ᓄᓇᒥᑦ ᖃᐅᔨᒪᒋᐊᕐᓗᑎᑦ ᐅᐸᓚᐅᖏᓂᕐᓂᑦ. ᖃᐅᔨᒋᐊᕐᓗᑎᑦ ᓄᓇᕗᑦ ᐊᕙᑎᓕᕆᔨᒃᑯᖏᓐᓂ ᒥᕐᖑᐃᖅᓯᕐᕕᓕᕆᔨᒃᑯᖏᑦ ᐸᖅᑭᔭᐅᔪᓂᓪᓗ ᐅᕝᕙᓘᓐᓃᑦ ᓂᕐᔪᑎᓕᕆᔨᒃᑯᓐᓂ. ᖃᐅᔨᒪᒋᐊᕐᓗᑎᑦ ᓇᒦᖃᑦᑕᕐᓂᖏᓐᓂ ᓇᓄᐃᑦ ᐅᐸᖃᑦᑕᖏᓪᓗ ᓇᓄᖅᑕᖃᖅᑐᒋᔭᐅᔪᑦ. ᓄᓇᐃᓪᓗ ᖃᐅᔨᒪᒋᐊᕐᓗᒋᑦ ᓇᓄᕐᓄᑦ ᐅᐸᑦᑕᐅᖃᑦᑕᖅᑐᑦ ᐊᕐᕌᒎᑉ ᐃᓗᐊᓂ. ᑐᑭᓯᒋᐊᕐᓗᑎᓪᓗ ᓇᓄᐃᑦ ᓂᕆᕕᒋᖃᑦᑕᖅᑕᖏᓐᓂ ᑎᓯᖏᓪᓗ ᓇᒦᓐᓂᖏᓐᓂ ᐅᐸᑦᑕᐃᓕᒪᓗᒋᓪᓗ. ᓯᕗᓂᖓᓂ ᐸᕐᓇᓯᒪᓗᑎᑦ, ᐊᑐᓐᖑᐊᖃᑦᑕᕐᓗᒋᓪᓗ ᓄᓇᖅᓯᓐᓂᕈᔅᓯᓗ ᖃᓄᐃᓘᕋᔭᕐᓂᓯᓐᓂ ᐆᑦᑐᕋᖃᑦᑕᕐᓗᓯ. ᓇᓄᖅᓯᓐᓂᕈᕕᑦ, ᑕᑯᓐᓂᕈᕕᑦ, ᑐᒥᓯᓐᓂᕈᕕᑦ ᓇᓄᖅᑕᖃᖅᑐᔮᕐᓂᖅᑲᓪᓘᓐᓃᑦ ᖃᐅᔨᒃᑲᐃᑦᑕᐅᑎᒋᓗᑎᑦ ᓄᓇᕗᑦ ᒥᕐᖑᐃᖅᓯᕐᕕᖓᑕ ᐃᖅᑲᓇᔭᐃᖅᑎᖓᓐᓂ ᐅᕝᕙᓘᓐᓃᑦ ᐆᒪᔪᓕᕆᔨᒃᑯᓐᓄᑦ.

ᑐᓯᒋᐊᒃᑲᓐᓂᕈᒪᓐᓂᕈᕕᑦ ᓇᓄᐃᑦ ᒥᔅᓵᓄᑦ, ᑕᑯᓗᒍ ᕿᒥᕐᕈᔭᐅᓂᖏᑦ ᐅᖃᓕᒫᕐᓂᖏᓪᓗ.