ᐊᑦᑕᓇᖅᑕᐃᒪᔪᒦᓐᓂᖅ
ᓂᐅᕐᕈᓂᕆᓂᐊᖅᑕᕐᓄᑦ ᐸᕐᓇᐸᓪᓕᐊᓂᖅ
ᐅᖃᓕᒫᑦᑎᐊᕐᓂᐊᖅᑲᑎᑦ ᐱᒋᐊᓐᖓᕐᓂᖓᓂ ᐃᓱᐊᓄᑦ. ᐃᑲᔫᑎᖃᓪᓚᕆᓐᓂᐊᖅᑐᑦ ᖃᐅᔨᒪᓂᖅᓴᐅᓕᕐᓂᐊᕋᕕᑦ ᑭᓱᓂᒃ ᓂᕆᐅᒋᔭᖃᕆᐊᖃᕐᓂᐊᕐᒪᖔᖅᐱᑦ ᓄᓇᕗᑦ ᒥᕐᖑᐃᖅᓯᕐᕕᓐᓂ. ᑖᒃᑯᐊ ᑐᑭᓯᒋᐊᕈᑏᑦ ᓇᓗᓇᐃᖅᓯᒪᓪᓚᕆᓐᖏᑦᑐᑦ ᐃᓇᖐᒋᐊᖃᓐᖏᑦᑐᑦ ᐸᕐᓇᐅᑎᔅᓯᓐᓂ. ᐊᓯᖏᓐᓂᑦᑕᐅ ᑐᑭᓯᒋᐊᕈᓐᓇᕐᒥᔪᑎᑦ ᐅᑭᐅᖅᑕᖅᑐᒥ ᓂᐅᕐᕈᓯᒪᓂᕐᒥᑦ ᐊᒻᒪᓗ ᓂᕐᔪᑎᖏᓐᓂ.
ᐅᖓᓯᑦᑐᒨᖅᑐᓂ, ᐅᓗᕆᐊᓇᖅᑐᑕᖃᕐᓂᐅᓴᑐᐃᓐᓇᓲᖅ. ᓇᒻᒥᓂᖅ ᐱᓯᒪᑦᑎᐊᕆᐊᖃᕐᓂᐊᖅᑐᑎᑦ ᓇᒻᒥᓂᕐᓗ ᐊᑦᑕᓇᖅᑕᐃᓕᒪᔪᒦᓐᓇᓱᐊᕐᓗᑎᑦ. ᐊᑭᓕᕋᔭᕋᕕᒋᓪᓕ ᐸᖅᓴᖅᑕᐅᒋᐊᖃᕐᓂᕈᕕᑦ. ᐸᖅᓴᐃᔩᑦ ᐃᓛᓐᓂᒃᑯᑦ ᐊᑐᐃᓐᓇᐅᖏᓐᓇᓲᖑᓐᖏᒻᒪᑕ ᐃᓛᓐᓂᑯᓪᓗ ᐱᔪᓐᓇᖏᑦᑎᐊᒻᒪᕆᑦᑐᑎᑦ. ᓴᐳᒻᒥᓇᓱᑦᑎᐊᕋᓱᐊᕆᐊᖃᖅᑐᑎᑦ ᑐᐊᕕᕐᓇᖅᑐᒦᓕᕐᓂᕈᕕᑦ ᐸᕐᓇᓯᒪᓂᕐᓂᑦ ᒪᓕᒃᑲᔭᖅᑐᑦ ᐊᓯᔾᔨᖅᓴᕋᐃᓐᓂᖓᓐᓄᑦ ᓯᓚ, ᑰᒃᑯᓪᓗ ᐃᑳᕐᓂᐅᔪᑦ ᐊᑦᑕᓇᕈᓐᓇᕆᓪᓗᑎᑦ ᓂᕐᔪᑎᓪᓗ, ᐊᓪᓛᒃ ᓇᓄᐃᑦ.
ᓄᓇᕗᒻᒧᑦ ᑎᑭᒃᑯᕕᑦ, ᐊᑎᓕᐅᔅᓴᐃᓐᓇᕆᐊᖃᖅᑐᑎᑦ ᕿᒥᕐᕈᑎᑕᐅᓪᓗᑎᓪᓗ ᑕᐃᒫᒃ ᖃᐅᔨᒪᒐᔭᕋᕕᑦ ᓂᐅᕐᕈᕕᒋᓯᒪᔭᕐᓄᑦ. ᐊᐱᕆᓗᑎᑦ ᒥᕐᖑᐃᖅᓯᕐᕕᒻᒥ ᐃᖅᑲᓇᐃᔭᖅᑎᒥᑦ ᐸᕐᓇᐅᑎᒋᓯᒪᔭᑦᑎ ᒥᔅᓵᓄᑦ ᐊᓯᔾᔨᕈᓐᓇᕐᓗᒋᓪᓗ ᐸᕐᓇᐅᑎᒋᓯᒪᔭᑎᑦ ᐊᓯᔾᔨᕆᐊᖃᑳᓪᓚᓂᖅᑲᑕ ᑭᓱᑐᐃᓐᓇᐃᑦ ᐊᓯᔾᔨᕈᓐᓇᕐᓂᖏᓐᓂ ᑕᒫᓂ.
ᒪᕐᕈᕈᓯᕐᓂᕈᕕᑦ ᐱᔪᓐᓇᓂᕐᓂᑦ ᐊᑐᕈᓐᓇᖅᑕᓂᓪᓘᓐᓃᑦ, ᓄᓇᓕᒻᒥᑦ ᐊᐅᓪᓚᕈᔾᔨᔨᒥᑦ ᕿᒥᕐᕈᔨᒥᓪᓘᓐᓃᑦ ᐊᑐᕋᔭᖅᑯᑎᑦ.
ᒪᑯᐊ ᐃᓱᒪᒋᔭᕆᐊᖃᖅᑕᑎᑦ ᓇᒻᒥᓂᖅ ᐊᐱᕆᓐᖑᐊᕐᓗᑎᑦ:
- ᐊᑐᖅᓯᒪᕖᑦ ᐅᑭᐅᖅᑕᖅᑐᒥ ᓄᓇᖓᓐᓂ?
- ᐸᕐᓇᓯᒪᑦᑎᐊᖅᑮᑦ ᓇᓄᖅᓯᓐᓂᕈᕕᑦ ᐅᓗᕆᐊᓇᕐᓂᖏᓐᓂᓪᓗ ᖃᐅᔨᒪᑦᑎᐊᖅᑭᑦ?
- ᐋᓐᓂᕐᓂᕈᕕᑦ ᒪᑦᑐᑎᔅᓴᕈᔪᓐᓂᒃ ᐱᖃᕋᓗᐊᖅᑭᑦ ᐅᓗᕆᐊᓇᖅᑐᒦᓕᕐᓂᕈᕕᓪᓗ ᐊᓐᓇᐅᒪᔾᔪᑎᔅᓴᓂᒃ ᐱᖃᕋᓗᐊᖅᑭᑦ ᓇᒻᒥᓂᕐᓗ ᐱᓯᒪᒍᓐᓇᕐᓂᐊᖅᑭᑦ?
- ᐊᓯᖏᓐᓂ ᑕᒫᓃᔅᓯᒪᔪᓂᒃ ᐃᓚᖃᕐᓂᐊᖅᑭᑦ ᐃᓕᓐᓂᐊᖅᓯᒪᕙᓪᓗ?
- ᓱᓇᒃᑯᑖᑎᑦ ᓈᒪᒃᑲᓗᐊᖅᑲᑦ, ᓄᓇᓐᖑᐊᒃᑯᑦ, ᐊᑦᑕᓇᖅᑕᐃᓕᒪᔾᔪᑏᑦ, ᒪᑦᑐᓯᕈᔪᐃᑦ ᓴᓇᕐᕈᑎᕈᔪᐃᓪᓗ?
- ᕿᒥᕐᕈᑲᓐᓂᕈᓐᓇᖅᑭᒋᑦ ᐸᕐᓇᐅᑎᑎᑦ ᐊᓯᔾᔨᕐᓗᒋᓪᓘᓐᓃᑦ ᑕᐃᒪᐃᒋᐊᖃᕐᓂᕈᕕᑦ?
- ᖃᓄᖅᑐᕋᓱᒍᓐᓇᖅᑮᑦ, ᕿᓄᐃᓵᕈᓐᓇᑮᑦ, ᐃᑉᐱᒍᓱᑦᑎᐊᖅᑭᓪᓘ ᑭᓱᑐᐃᓐᓇᕐᓂᑦ ᐊᓯᔾᔨᕆᐊᖃᖅᑐᖃᕐᓂᖅᑲᑦ?
- ᐱᕕᖃᑦᑎᐊᕐᓂᐊᕋᓗᐊᖅᑭᑦ ᑭᖑᕙᕆᐊᖅᑐᖃᕐᓂᖅᑲᑦ ᓲᕐᓗ ᓯᓚᑲᒻᒪᐅᓂᖅᑲᑦ, ᐅᓕᓐᓂᓐᓄᑦ, ᐅᒥᐊᕐᓂᓪᓗ ᐅᓕᑦᑏᔪᓂᒃ ᖃᖓᑕᓲᒃᑯᓪᓗ ᐊᐅᓪᓚᕐᓂᕆᒋᐊᖃᖅᑕᕐᓄᑦ?
- ᓇᓪᓕᐅᒃᑯᒫᕆᓂᐊᖅᑕᕐᓂᑦ ᐸᕐᓇᓯᒪᒐᓗᐊᖅᑮᑦ ᓲᕐᓗ ᓄᓇᓕᓐᓂᑦ ᖃᓄᐃᓘᕐᓂᐊᕐᓂᕐᓂᑦ ᐅᐸᒐᓱᑦᑕᕐᓅᕈᓐᓇᓂᓐᖏᒃᑯᕕᑦ?
ᓇᒻᒥᓂᖅ ᐸᕐᓇᔅᓯᒪᔭᑎᑦ ᑲᓅᕐᓂᐊᕐᓃᑦ ᖃᔭᖅᑐᕐᓂᐊᓃᓪᓗ ᑕᒪᒃᑯᐊ ᐊᑐᖅᑕᐅᒐᔪᑦᑐᑦ ᐳᓚᕋᖅᑎᓄᑦ. ᐊᔾᔨᐅᓐᖏᑦᑐᓂᒃ ᓱᓇᒃᑯᑖᖃᕆᐊᖃᖅᑐᑎᑦ, ᖃᐅᔨᒪᒋᐊᖃᖅᑐᑎᓪᓗ ᐸᕐᓇᓯᒪᑦᑎᐊᕐᓗᑎᓪᓗ.
ᑲᓅᓚᐅᓐᖏᓂᓐᓂᑦ ᖃᔭᖅᑐᓚᐅᓐᖏᓂᓐᓂᓪᓘᓐᓃᑦ ᐅᑯᐊ ᐃᓱᒪᒋᔭᕆᐊᖃᕐᓂᐊᖅᑕᑎᑦ:
- ᓂᓪᓕᓇᖅᑐᒥᑦ ᖃᓄᐃᔅᓴᖏᒃᑲᓗᐊᖅᑭᑦ, ᐅᐃᕙᕈᓐᓇᕐᓂᕐᒥᑦ, ᑐᓚᓐᓂᕐᒥᑦ, ᐃᒫᕐᓂᒥᓪᓗ ᓇᒻᒥᓂᕐᓗ ᐊᓐᓇᒐᓱᒍᓐᓇᕋᔭᖅᑭᑦ?
- ᐅᖃᓕᒫᕈᓐᓇᖅᑲᑦ ᐃᒪᕐᒧᑦ ᓇᓗᓇᐃᒃᑯᑎᐅᔪᓂᒃ ᐅᓕᓐᓂᐅᓪᓗ ᒥᔅᓵᓄᑦ ᐊᑐᕈᓐᓇᕋᔭᖅᑭᒋᓪᓘ ᐃᒫᓂ ᐅᓗᕆᐊᓇᖅᑐᖅᓯᐅᓕᕐᓂᕈᕕᑦ?
- ᑕᒻᒪᕇᒃᑯᑎᒥᒃ ᐅᖃᓕᒫᕈᓐᓇᖅᑭᑦ ᐊᑐᕈᓐᓇᕋᔭᖅᑭᒋᓪᓘ ᓇᒦᓐᓂᕐᓂᑦ ᑐᑭᓯᓇᓱᐊᖅᑎᓪᓗᑎᑦ?
- ᓴᖅᓯᑎᓪᓗᒍ ᓇᒻᒥᓂᖅ ᐃᖏᕐᕋᒍᓐᓇᕋᔭᖅᑭᑦ?
- ᒥᔅᓴᐅᓴᕈᓐᓇᕋᔭᖅᑭᒋᑦ ᐃᖏᕐᕋᓂᐅᔪᑦ ᒥᔅᓴᐅᓴᕐᓗᒋᓪᓗ ᐅᒥᐊᖅᐱᑦ ᖃᓄᐃᓕᖓᓂᖏᑦ ᖃᓄᐃᓐᓇᑎᓪᓗᒍ?
- ᑰᕌᓗᓐᓂᒃ ᐊᑐᓚᐅᖅᓯᒪᕕᑦ, ᑲᓅᕐᓄᓪᓗ ᓱᓇᒃᑯᑖᕐᓂᑦ ᐊᑦᑕᑳᕐᓂᓪᓗ ᖃᐅᔨᒪᑦᑎᐊᖅᑭᑦ?
- ᓄᓇᓐᖑᐊᖃᑦᑎᐊᕋᓗᐊᖅᑭᑦ ᐊᑐᕆᐊᓕᓐᓂᑦ ᑰᓪᓗ ᖃᓄᐃᓕᖓᓂᖏᓐᓂ ᐱᖃᕋᓗᐊᖅᑭᑦ?
- ᐃᓱᒪᒋᓯᒪᒐᓗᐊᖅᑭᒋᑦ ᓯᑯᐃᑦ ᖃᓄᐃᑦᑐᓂᖏᑦ, ᐅᓕᓐᓃᑦ ᑕᒪᒃᑯᐊ ᑭᖑᕙᔾᔪᑎᒋᑐᐃᓐᓇᕆᐊᖃᕋᕕᒋᑦ ᖃᐅᔨᒪᒐᓗᐊᖅᑭᑦ?
- ᐃᓱᒪᖅᓴᖅᓯᐅᖅᓯᒪᒐᓗᐊᖅᑭᑦ ᐃᓄᒋᐊᓐᓂᕆᔭᕆᐊᓕᖏᑦ ᓇᓪᓕᐊ ᐅᒥᐊᖅ ᓱᕋᓐᓂᖅᑲᑦ?
ᑐᐊᕕᕐᓇᖅᑐᖃᖅᑎᓪᓗᒍ
ᐊᔾᔭᖅᓯᒋᐊᖃᖅᑐᑎᑦ ᐊᑐᕆᐊᖃᕐᓂᐊᖅᑕᕐᓂᑦ ᓇᒻᒥᓂᕐᓗ ᐱᓯᒪᑦᑎᐊᕆᐊᖃᖅᑐᑎᑦ, ᑕᐃᒃᑯᐊᓗ ᐸᖅᓴᐃᒐᔭᖅᑐᑦ ᐃᓱᒪᒋᔭᕆᐊᖃᖅᑕᑎᑦ.
ᐅᑯᐊ ᐃᓱᒪᒋᔭᕆᐊᖃᕐᓂᐊᖅᑕᑎᑦ:
- ᑭᓴᐃᓯᒪᔮᕋᔭᖅᑯᑎᑦ ᓄᓇᓐᖑᐊᕐᓂᑦ ᐊᑐᕆᐊᖃᕋᔭᖅᑕᕐᓂᑦ ᐊᐅᓪᓚᖅᓯᒪᓕᕈᕕᑦ. ᑐᕚᕆᑐᐃᓐᓇᕐᓂᐊᖏᓚᑎᑦ ᐅᑭᐅᖅᑕᖅᑐᒧᑦ ᑎᑭᒃᑯᕕᑦ. ᓄᓇᒥᐅᑕᓕᕆᔨᒃᑯᓐᓄᑦ ᑲᓇᑕᒥ ᓄᓇᓐᖑᐊᕐᓂᑦ ᑐᑭᓯᒋᐊᕈᓐᓇᖅᑐᑎᑦ ᓇᑭᑦ ᓄᓇᓐᖑᐊᓯᐊᕐᓂᐊᕐᒪᖔᖅᐱᑦ.
- ᐱᓯᒪᑦᑏᓐᓇᕐᓗᑎᑦ ᖃᓄᕐᓗ ᐊᑐᕆᐊᖃᕐᒪᖔᖅᐱᐅᒃ ᖃᐅᔨᒪᒋᐊᕐᓗᑎᑦ ᒪᑯᓂᖓ ᐅᕐᑳᓚᐅᑎᓂᒃ ᖃᖓᖅᑕᖅᑎᑕᐅᓯᒪᔪᒃᑯᑦ ᐊᑐᖅᑕᐅᕙᑦᑐᓂᒃ. ᐃᓚᖏᑦ ᐅᕐᑳᓚᐅᑏᑦ ᐊᑐᖅᑐᐊᕋᔅᓴᐅᒻᒥᔪᑦ ᓄᓇᕗᒻᒥ ᑭᓯᐊᓂᓕ ᐊᑐᖅᑐᐊᕐᓂᐊᕈᕕᑦ ᐊᖏᕐᕋᓐᓂ ᓇᔅᓴᖔᕈᕕᑦ ᐱᐅᓂᖅᓴᐅᒐᔭᖅᑐᖅ. ᖃᐅᔨᒪᑦᑎᐊᕋᓱᐊᕐᓂᐊᖅᑯᑎᑦ ᓄᓇᓖᑦ ᓄᓇᓐᖑᐊᖏᓐᓂ ᓯᓚᐃᓪᓗ ᖃᓄᐃᓐᓂᖏᓐᓂ ᐱᔪᓐᓇᑦᑎᐊᓲᖑᓐᖏᒻᒪᑕ ᐃᓛᓐᓂᒃᑯᑦ ᐅᖃᓚᐅᑏᑦ. ᑐᐊᕕᕐᓇᖅᓯᑳᓪᓚᓂᖅᑲᑦ ᐱᓯᒪᑦᑏᓐᓇᕆᐊᖃᖅᑐᑎᑦ ᑕᒻᒪᕇᒃᑯᑎᖃᕆᐊᖃᖅᑐᑎᑦ ᐊᑐᕐᓗᒍᓪᓗ ᓇᒦᓪᓚᕆᒻᒪᖔᖅᐱᑦ ᓇᓗᓇᐃᒃᑯᑎᒋᒐᔭᕋᕕᐅᒃ.
- ᖃᐅᔨᒪᒐᓱᐊᕋᔭᖅᑯᑎᑦ ᖃᓄᖅ ᐊᑐᖅᑕᐅᓲᖑᒻᒪᖔᑕ ᐊᐅᓪᓚᓚᐅᓐᖏᓂᓐᓂᑦ. ᐹᑕᓖᖏᑦ ᓂᓪᓚᕐᒥ ᐊᑯᓂᐅᓗᐊᕈᓐᓇᖏᑦᑐᑦ ᓂᓪᓕᓇᖅᓯᑎᑦᑕᐃᓕᒪᒐᔭᖅᑲᑦ ᐊᑐᕐᓗᒋᓪᓗ ᐊᑐᕆᐊᖃᓕᕈᕕᒋᑦ.
- ᖃᖓᑕᓲᕐᓂᑦ ᐊᑐᐃᓐᓇᖅᑕᖃᐃᓐᓇᕈᓐᓇᖏᒻᒪᑦ ᐅᑭᐅᖅᑕᖅᑐᒥ. ᖃᖓᑕᓲᑦ ᖁᓛᒎᓖᓪᓗ ᐊᑐᐃᓐᓇᐅᓐᖏᓐᓂᖅᓴᐅᒻᒥᔪᑦ ᓄᓇᓕᕋᓛᓐᓂᑦ. ᑭᖑᕙᕆᐊᖅᓯᒪᒍᓐᓇᕐᒥᔪᑦ, ᐃᓛᓐᓂᒃᑯᑦ ᐅᓪᓗᒐᓚᓐᓄᑦ, ᓂᑦᑕᑦᑎᐊᖏᑉᐸᑦ, ᓯᓚᑲᒻᒪᐅᑉᐸᓪᓗ, ᐊᓄᕆᔪᐊᓘᑉᐸᓪᓗ. ᖃᖓᑕᓲᑦ ᑭᓯᐊᓂ ᒥᓲᑦ ᐊᑦᑕᓇᓐᖏᑦᑎᐊᕐᓂᐊᖅᑲᑦ.
ᓯᓚᐃᑦ
ᐅᑭᐅᖅᑕᖅᑐᒥ ᓯᓚᖏᑦ ᐊᔾᔨᒌᖃᑦᑕᖏᑦᑐᑦ ᐊᑯᓂᐅᕙᑦᑐᑎᒃ, ᓂᓪᓚᓱᑉᐸᑦᑐᑎᑦ ᐅᑭᐅᒃᑯᑦ ᕿᓚᒥᐅᖃᑦᑕᖅᑐᓂᓗ, ᓂᓪᓚᕈᔪᒻᒥ ᐊᐅᔭᒃᑯᑦ. ᐅᓪᓗᖅᑐᓂᖅᓴᐅᓲᖑᒐᓗᐊᖅ ᐅᐱᕐᖓᓵᒃᑯᑦ ᓄᓇᕗᒻᒥ, ᐃᓚᖏᑦ ᐊᓪᓛᒃ ᓯᕿᓐᓂᖅᑕᐅᕙᓐᖏᑦᑎᐊᒻᒪᕆᑦᑐᑦ ᐅᑭᐅᒃᑯᑦ. ᐅᓪᓗᑭᓐᓂᖅᓴᐅᓲᖑᒻᒪᑦ ᐅᑭᐅᒃᑯᑦ ᓂᓪᓚᓱᑦᑐᓪᓚᕆᐅᓪᓗᓂᓗ, ᐳᓚᕋᖅᑏᑦ ᐅᑭᐅᒃᑯᑦ ᒪᐅᓐᖓᕋᔪᓐᖏᑦᑐᑦ ᓄᓇᕗᒻᒧᑦ. ᑕᐃᒃᑯᐊ ᑭᓯᐊᓂ ᖃᐅᔨᒪᔪᒻᒪᕇᑦ ᓱᓇᒃᑯᑖᒡᒋᖅᑐᑎᑦ ᐅᑭᐅᒃᑯᑦ ᒪᐅᓐᖓᕋᓱᒍᓐᓇᖅᑐᑦ.
ᐊᓄᕆᖃᓲᖑᓪᓗᓂ ᓴᓐᖏᓂᓕᒻᒥᑦ 15-ᒥᑦ 20-ᒧᑦ ᐊᕐᕌᒎᑉ ᐃᓗᐊᓂ ᑕᐃᒪᐃᒐᔪᑦᑐᑦ ᓄᓇᕗᒻᒥ. ᐊᓄᕆᒃᑲᐅᓂᖅᓴᐅᓲᖅ ᐊᐅᔭᒃᑯᑦ ᓄᓐᖑᕈᔪᐊᓂ ᐅᑭᐊᔅᓵᒧᑦ ᑕᒫᓂ ᓴᓐᖏᓂᖃᕈᓐᓇᖅᑐᓂ 100-ᑭᓚᒦᑕᒥᑦ. ᐊᐅᔭᒃᑯᑦ ᐱᖅᓯᕈᓐᓇᕐᒥᔪᖅ ᓯᐅᕋᕐᓂᑦ ᐊᐳᑎᖃᖅᑎᓪᓗᒍᓗ ᓂᑦᑕᖏᑦᑎᐊᓕᓲᖑᓪᓗᓂ.
ᖃᐅᔨᒪᒋᐊᖃᖅᑐᑎᑦ ᕿᐅᓕᕐᓂᐊᕐᓂᕈᕕᑦ ᖃᓄᕐᓗ ᕿᐅᑦᑕᐃᓕᒪᓇᓱᐊᕐᓂᕐᒥᑦ. ᕿᐅᑦᑕᐃᓕᒪᓇᓱᐊᕆᐊᖃᖅᑐᑎᑦ ᐅᖅᑰᓇᓱᐊᕐᓗᑎᑦ, ᐸᓂᖅᑐᒦᓪᓗᑎᑦ, ᓂᕆᓯᒪᑦᑎᐊᕐᓗᑎᑦ ᑎᒦᑦ ᐃᒪᐃᕈᑎᑦᑕᐃᓕᒐᓱᐊᕐᓗᒍᓗ. ᐃᒥᒡᒌᓐᓇᖃᑦᑕᕐᓗᑎᒃ ᖃᖓᑐᐃᓐᓇᑦᑎᐊᖅ ᑎᒦᑦ ᐃᒪᐃᕈᑎᖁᓇᒍ. ᖁᐊᕐᓇᑎᓪᓗᒍ ᐊᐳᑎᖃᖅᑎᓪᓗᒍᓗ ᖃᖓᑐᐃᓐᓇᑦᑎᐊᖅ ᕿᐅᓕᕈᓐᓇᖅᑐᑦ ᐊᕐᕌᒎᑉ ᐃᓗᐊᓂ.
ᐃᓱᒪᖅᓴᖅᓯᐅᑦᑎᐊᕐᓂᐊᖅᑯᑎᑦ ᖃᓄᐃᑦᑐᓂᒃ ᐊᓐᓄᕌᒡᒋᕆᐊᖃᕐᓂᐊᕐᒪᖔᖅᐱᑦ ᐊᐅᓪᓚᓚᐅᓐᖏᓐᓂᓐᓂᑦ.
- ᓱᕕᓐᖏᑦᑐᓂᑦ ᐊᒡᒑᕐᓂᑦ, ᐳᐊᓘᓐᓂᒃ, ᓇᓴᑦᑎᐊᕙᒻᒥᑦ, ᖁᖓᓯᕈᕐᒥᑦ, ᖁᖓᓯᓕᒻᒥᑦ ᖃᓕᐹᕐᒥᑦ ᓄᕕᖅᓵᖅᓴᓂᑦ ᐊᓕᖅᓯᓂᒃ ᐊᕐᕌᒎᑉ ᐃᓗᐊᓂ ᖃᖓᑐᐃᓐᓇᑦᑎᐊᖅ ᐊᑐᖅᑕᐅᔪᓐᓇᖅᑐᑦ.
- ᓂᓪᓚᓱᓐᓂᖏᑦ ᐊᔾᔨᒌᖃᑦᑕᖏᒻᒪᑕ ᐊᓃᕐᓂᐊᕐᓗᓂ ᐊᓐᓄᕌᖅᓯᒪᑦᑎᐊᕆᐊᓕᒃ. ᐃᓗᐊᖅᓯᒪᓗᑎᑦ ᐅᕕᓂᕈᕐᓂᓪᓗ ᐊᑕᐅᓯᐅᓐᖏᑦᑐᒥᑦ.
- ᓯᓚ ᒪᓕᑦᑐᒍ, ᐊᓐᓄᕌᖅᓯᒪᒋᐊᖃᕐᒥᔪᑎᑦ ᓱᕕᓐᖏᑦᑐᓂᑦ ᖃᐅᓯᓕᕐᓇᖏᑦᑐᓂᓪᓗ ᐃᕐᕋᓂᓪᓘᓐᓃᑦ ᔭᐃᑲᓂᑦ ᖃᓪᓕᓂᓪᓗ.
- ᖃᓪᓗᓈᖅᑕᑐᐃᓐᓇᕐᓂᑦ ᐊᑐᕋᔭᓐᖏᓚᑎᑦ. ᖃᐅᓯᓕᖅᑲᑦ ᓯᓚᓗᒻᒥᑦ, ᐊᐳᒻᒥᑦ ᑭᐊᒃᑭᓂᕐᓄᓪᓘᓐᓃᑦ ᑎᒥᓐᓂ ᓂᓪᓕᑎᑦᑎᕙᓪᓕᐊᒻᒪᑦ, ᕿᐅᓕᔾᔪᑎᒋᔪᓐᓇᖅᑐᒍᓪᓗ.
- ᖁᓕᑦᑕᐅᔭᒡᒋᕐᓗᑎᑦ ᓇᓴᓕᒻᒥᑦ.
- ᐴᑦᑎᑦᑎᐊᕙᓐᓂᒃ ᐱᓱᔾᔪᑎᒋᕙᓐᓂᐊᖅᑕᕐᓂᑦ ᓇᔅᓴᕐᓗᑎᑦ, ᐃᓯᒐᐅᔭᑐᐃᓐᓇᕐᓂᑦ ᑐᐱᕐᕕᓐᓂ ᐊᑐᖃᑦᑕᕐᓂᐊᖅᑕᕐᓂᑦ, ᐃᒪᖅᓯᔾᔪᑎᔅᓴᓂᓪᓗ ᐴᑦᑎᓐᓂᒃ, ᑰᒃᑯᓪᓗ ᑰᒐᓛᒃᑯᓪᓗ ᐃᑳᖃᑦᑕᕐᓂᐊᕈᕕᑦ ᐊᑐᕋᔭᖅᑕᕐᓂᑦ.
- ᐅᒥᐊᒃᑰᕐᓂᕈᕕᑦ, ᐴᑦᑎᑦᑎᐊᕙᓐᓂᒃ ᐊᑐᕋᔭᖅᑯᑎᑦ ᐅᒥᐊᑉ ᐊᑦᑎᓐᓂᖓ ᓂᓪᓕᓇᖅᑐᕈᓘᒻᒪᑦ ᐊᖏᒋᔭᓂᓪᓘᓐᓃᑦ ᐴᑦᑎᓯᒪᓗᑎᑦ ᐊᓕᖅᓯᑲᓐᓂᖅᓯᒪᓂᐊᕋᕕᑦ ᓄᕕᖅᓵᖅᓵᓐᓂᒃ ᒥᖅᑯᓖᓐᓂᓪᓘᓐᓃᑦ.
- ᓇᓴᖅᓯᒪᓗᑎᑦ ᒥᖑᐊᖅᓯᒪᓗᑎᓪᓗ ᓯᕿᓐᓂᑐᖅᓯᐅᑎᒥᒃ ᐅᕕᓃᑦ ᖃᓄᐃᖁᓇᒍ.
- ᓯᕿᓐᓂᑐᖅᓯᐅᑎᓂᓪᓗ ᐃᒡᒑᖅᓯᒪᓗᑎᑦ ᐱᐅᔫᓐᓂᒃ.
ᑰᒃᑯᑦ ᐃᑳᕐᓃᑦ
ᑰᒐᓛᑦ ᑰᓪᓗ ᐃᑎᓂᖏᑦ ᐊᓯᔾᔨᖃᑦᑕᕐᖓᑕ ᐅᓪᓘᑉ ᐃᓗᐊᓂ ᖃᐅᑎᓪᓗᒍᓪᓘᓐᓃᑦ. ᖃᐅᔨᒪᐃᓐᓇᕕᔅᓴᐅᓐᖏᑦᑐᖅ ᐃᑎᓂᖓᓂ ᐃᑳᕐᓂᐊᓕᕈᕕᑦ. ᑰᑦ ᓄᓇᕗᒻᒥ ᓂᓪᓕᓇᖅᑐᒻᒪᕆᐊᓗᐃᑦ ᖃᐅᔨᒪᑦᑎᐊᕆᐊᖃᕐᓂᐊᖅᑐᑎᑦ ᐃᑳᓕᕋᐃᒍᕕᑦ ᑰᒃᑯᑦ.
ᐅᑯᐊ ᐃᓱᒪᒋᔭᕆᐊᖃᕐᓂᐊᖅᑕᑎᑦ:
- ᐃᑳᕆᐊᖃᕐᓂᕈᕕᑦ ᑰᕌᓗᓐᓂᒃ ᐅᓪᓛᒃᑯᑦ ᐃᑳᕈᕕᑦ ᐱᐅᓂᖅᓴᖅ, ᐱᓗᐊᖅᑐᒥᑦ ᓯᕐᒥᓕᑦᑕᖃᖅᑎᓪᓗᒍ. ᐃᒃᑲᓂᖅᓴᐅᒐᔪᒻᒪᑕ ᐅᓪᓛᖑᓂᖅᓴᒃᑯᑦ ᓯᕿᓐᓂᓕᕋᑖᖅᑎᓪᓗᒍ.
- ᓯᓚᓗᑦᑎᓪᓗᒍ ᑰᑦ ᐃᑎᓂᖅᓴᐅᓲᑦ ᑰᓐᓂᖅᓴᐅᓲᖑᓪᓗᑎᓪᓗ. ᐃᒪᐃᑦ ᐃᑎᓂᖏᑦ ᑰᓐᓂᖏᓪᓗ ᐊᓯᔾᔨᖅᑕᐅᑎᒋᓲᑦ, ᐃᑲᕐᕋᒐᓚᓐᓄᓪᓘᓐᓃᑦ ᑭᖑᕙᕐᔪᑎᒋᔪᓐᓇᕐᒥᔭᑎᑦ.
- ᓇᖏᐊᕈᔪᓐᓂᕈᕕᑦ ᐃᑳᕆᐊᔅᓴᖅ ᑰᒐᓛᒥᑦ ᑰᒻᒥᓪᓘᓐᓃᑦ, ᐅᑕᖅᑭᑎᐊᒻᒪᕆᑲᐃᓐᓇᕐᓗᑎᑦ ᐃᒃᑲᓂᖅᓴᐅᓕᖅᑲᑦ ᐃᑳᕐᓂᐊᕋᕕᑦ. ᐃᑲᕐᕋᒐᓚᓐᓂᒃ ᐅᓪᓗᒐᓚᓐᓂᓪᓘᓐᓃᑦ ᐅᑕᖅᑭᑐᐃᓐᓇᕆᐊᖃᖅᑐᑎᑦ ᑰᓐᖏᓂᖅᓴᐅᓕᖅᓯᐊᕆᓗᒍ.
- ᑰᑦ ᑰᓐᓂᖏᑦ ᑰᒐᓛᓪᓗ ᖃᐅᔨᒪᑦᑎᐊᕆᐊᓖᑦ ᐃᑳᕐᓂᐊᖅᑐᓂ ᐊᓯᐊᒎᕆᐊᖃᑐᐃᓐᓇᕆᐊᖃᕋᕕᑦ. ᖃᐅᔨᓴᑦᑎᐊᕐᓗᑎᑦ ᓇᒻᒥᓂᖅ ᐃᑳᓕᕈᕕᑦ, ᐸᐅᖓ ᐅᓄᖓᓗ ᖃᐅᔨᓴᖃᑦᑕᕐᓗᑎᑦ ᐊᑦᑕᓇᖅᑐᒦᖁᓇᑎᑦ.
- ᑰᑦ ᑰᒐᓛᓪᓗ ᐱᓚᒋᐊᕐᓂᖏᑦ ᒪᓂᕋᐅᓂᖅᓴᒥᑦ ᐱᕈᖅᑐᖃᐅᕐᓂᖅᓴᐃᑦ ᐃᒃᑲᓂᖅᓴᐅᒐᔪᓲᑦ ᑕᐃᒃᑯᓇᓐᖓᑦ, ᐊᑕᐅᓯᕐᒥᑦ ᑰᑦᑐᒥᑦ.
- ᐊᑦᑐᖏᖅᓯᒪᒍᓐᓃᕐᓗᒍ ᓇᒻᒪᐅᑏᑦ ᐃᑳᓕᕈᕕᑦ ᐲᕋᓐᓂᕋᔭᕐᖓᑦ ᐲᕆᐊᖃᓕᕐᓂᖅᑲᑦ ᓇᒻᒪᐃᑦ.
- ᐊᑕᐅᑦᑎᒃᑯᑦ ᓯᐊᑯᑖᓪᓗᓯ ᐃᑳᕋᔭᖅᑯᓯ ᓇᔪᒻᒥᖃᑦᑕᐅᑎᓗᓯ. ᓴᓂᒧᑦ ᐱᓱᓪᓗᓯ ᑰᓐᓂᖓ ᐊᑐᕋᕐᓂᕐᔫᒥᓂᐊᕐᖓᑦ, ᐃᓄᒃ ᓴᓐᖏᓂᖅᐹᖑᔮᖅᑐᖅ ᓯᕗᓪᓕᐅᓗᓂ.
- ᐊᑐᕈᓐᓇᕐᒥᔪᑎᑦ ᕿᔪᓐᓂᒃ ᐊᔭᐅᑉᐱᐊᓂᑦ ᓯᑮᖅᑐᔅᓯᐅᑎᓂᒃ ᐃᑎᓂᖓᓐᓂ ᖃᐅᔨᓴᐅᑎᒋᓂᐊᖅᑕᕐᓂᑦ ᐃᑲᔫᑎᒋᓂᐊᖅᑕᓂᓪᓗ ᐃᑳᓕᖁᕕᑦ.
- ᐴᑦᑎᓯᒪᓗᑎᑦ ᐊᓗᖏᑎᒍᑦ ᐲᑦᑐᓐᓂᒃ ᓂᓪᓕᓇᖅᑐᐊᓗᒻᒥᑦ ᐃᑉᐱᓐᓂᐊᓗᐊᕐᓂᐊᖏᓐᓇᕕᑦ, ᐅᔭᕋᕐᓄᓪᓗ ᖁᐊᔭᕿᓐᓂᐊᖏᓐᓇᕕᑦ ᐊᓕᖅᓰᑭᓪᓗ ᐸᓂᖁᓪᓗᒋᑦ ᐴᑦᑎᓯᒪᒐᔭᖅᑐᑎᑦ.
ᓂᕐᔪᑎᑕᖃᖅᑎᓪᓗᒍ ᐊᑦᑕᓇᖅᑕᐃᓕᒪᔪᒦᒐᓱᐊᕐᓂᖅ.
ᒪᓕᒐᕆᓗᒍ ᐅᓇ, ᐅᖓᓯᑦᑐᒦᖃᑦᑕᕐᓗᑎᑦ ᓂᕐᔪᑎᓕᒫᓐᓂᑦ. ᒪᓕᒐᕐᒥᑦ ᓯᖁᒥᑦᑎᒐᔭᖅᑐᑎᑦ ᐊᑦᑐᖅᓯᒐᓱᐊᕈᕕᑦ, ᕿᒥᕆᓗᒍᓪᓘᓐᓃᑦ ᖃᐃᑎᑦᑎᒐᓱᐊᕈᕕᓪᓘᓐᓃᑦ ᓂᕐᔪᑎᓂᑦ ᓄᓇᕗᒻᒥ. ᑐᑭᓯᒋᐊᕈᓐᓇᖅᑐᑎᑦ ᓄᓇᕗᑦ ᒐᕙᒪᒃᑯᖏᓐᓂ, ᐊᕙᑎᓕᕆᔨᒃᑯᑦ ᐃᖃᓪᓕᐊᕐᓂᐅᑉ ᒥᔅᓵᓄᑦ ᐊᓯᕙᕐᓂᐅᓪᓗ ᓄᓇᕗᒻᒥ.
ᐊᒃᖤᐃᑦ ᓄᓇᒦᓲᑦ ᓄᓇᕗᒻᒥ ᑲᓇᓐᓇᖓᓐᓂ ᓯᔾᔭᖅᐸᓯᖏᓐᓂ ᑲᖏᖅᓱᐊᓘᑉ ᐃᒪᖓᓐᓂ ᑕᐅᓄᖓ ᓄᓇᒃᑯᓪᓗ. ᑕᐃᒫᔅᓴᐃᓐᓇᖅ ᖃᐅᔨᒪᑦᑎᐊᕆᐊᖃᕋᔭᖅᑐᑎᑦ ᓄᓇᕗᒻᒥ ᓇᓄᖅᑕᖃᓲᖑᓂᖏᓐᓄᑦ. ᐊᒃᖤᓂᑦ ᐊᑦᑕᓇᖅᑐᒦᑦᑕᐃᓕᒪᓇᓱᐊᕐᓂᕐᒥᑦ ᑐᑭᓯᒋᐊᕈᓐᓇᖅᑐᑎᑦ ᓄᓇᕗᑦ ᒐᕙᒪᒃᑯᖏᓐᓄᑦ, ᓄᓇᒥᐅᑕᓕᕆᔨᒃᑯᓐᓂ, ᓂᕐᔪᑎᓂᒃ ᐱᕙᓪᓕᐊᔪᓕᕆᔨᒃᑯᓂᓪᓗ. ᓄᓇᕗᑦ ᒥᕐᖑᐃᖅᓯᕐᕕᖏᓐᓂ ᐊᒃᖤᐃᑦ ᒥᔅᓵᓄᑦ ᑐᑭᓯᒋᐊᕈᓐᓇᕆᓪᓗᑎᑦ ᓄᓇᕗᑦ ᐊᕙᑎᓕᕆᔨᒃᑯᖏᓐᓄᑦ, ᒥᕐᖑᐃᖅᓯᕐᕖᑦ ᓂᕐᔪᑎᖃᕐᕕᓂᓪᓗ ᑲᒪᖃᑦᑕᖅᑐᓂᒃ.
ᐅᒥᒻᒪᐃᑦ, ᐱᓗᐊᖅᑐᖅ ᐊᖑᓴᓪᓗᐃᑦ, ᖃᐅᔨᒪᔭᐅᔪᑦ ᐅᐹᔭᓲᖑᓂᖏᓐᓄᑦ ᐃᓄᓐᓂᑦ ᑲᑉᐱᐊᓱᑐᐊᕋᒥ. ᐊᐃᕖᑦ ᓴᖅᐱᓖᓪᓗ ᐅᓗᕆᐊᓇᕈᓐᓇᕐᒥᔪᑦ ᐅᒦᔭᐃᑦᑕᐅᑎᒋᔪᓐᓇᖅᑐᑎᓪᓗ. ᓯᖏᖅᓯᔪᖃᐃᓐᓇᓲᖅ ᓄᓇᒥᐅᑕᕐᓂᑦ ᓄᓇᕗᒻᒥ, ᐱᓗᐊᖅᑐᒥᑦ ᑎᕆᒐᓂᐊᕐᓂᑦ ᐊᓪᓛᒃ ᐊᒪᕈᕐᓂᑦ. ᑎᒻᒥᐊᑦ ᓂᕐᔪᑎᓪᓗ ᓂᕿᔅᓴᖅᓯᐅᖃᑦᑕᕐᖓᑕ, ᓴᓂᕐᓂᑦ ᕿᓐᓂᓯᒪᔪᓂᓪᓗ ᐊᑦᑕᓇᐃᖅᓯᒪᓐᖏᑐᐊᕐᖓᑕ ᐱᔭᐅᓂᐅᓴᑐᐃᓐᓇᖅᑐᑦ.
ᐅᑭᐅᖅᑕᖅᑐᒥ ᖁᐱᕐᕈᐃᑦ
ᓄᓇᕗᒻᒥ, ᑲᓇᑕᐅᓪᓗ ᐅᑭᐅᖅᑕᖅᑐᓂᖏᓐᓂ ᑕᐃᒪᐃᒻᒪᑕ, ᖁᐱᕐᕈᐃᑦ ᐸᕝᕕᓇᓲᖑᒻᒪᑕ ᐊᐅᔭᒃᑯᑦ. ᐱᑕᖃᓕᕇᒻᒥᔪᑦ ᓇᒥᑐᐃᓐᓇᖅ, ᑭᑦᑐᕆᐊᖃᕐᓇᖏᑦᑐᒋᖅᓯᒪᒍᕕᑦ ᐱᐅᓂᖅᓴᐅᒐᔭᖅᑐᖅ.
ᐅᕝᕙ ᐊᑐᕈᓐᓇᕐᒥᔭᑎᑦ ᐸᕝᕕᓴᑦᑕᐅᓂᐊᓐᖏᓐᓇᕕᑦ ᕿᑦᑐᕆᐊᕐᓄᑦ:
- ᑭᑦᑐᕆᐊᓕᐊᓘᑎᓪᓗᒍ, ᐅᖅᑯᐊᓕᓂᖃᓐᖏᑦᑐᒧᑦ ᐊᓄᕆᓂᖅᐹᒨᕐᓗᑎᑦ ᒪᓕᓐᓂᐊᖏᒻᒪᑕ.
- ᑖᓂᑭᑦᑐᓂᒃ ᐊᓐᓄᕌᕐᓂᑦ ᐊᑐᕐᓗᑎᑦ. ᕿᑦᑐᕆᐊᕈᔪᑦ ᐅᐸᒐᔪᓐᖏᓂᖅᓴᐅᒻᒪᑕ ᑖᓂᑭᓐᓂᖅᓴᓄᑦ ᐊᓐᓄᕌᕐᓄᑦ ᕿᕐᓂᓂᖅᓴᓅᕋᔪᒻᒪᑕᓕ.
- ᐊᐃᓕᓐᓂᑦ ᐅᕕᓂᕈᖅᓯᒪᓗᑎᑦ, ᖃᓪᓕᔅᓯᒪᓗᑎᑦ, ᐳᑐᕐᓛᓕᒻᒥᑦ ᓴᓇᖅᓯᒪᓗᑎᑦ ᔭᐅᑲᒥᓪᓘᓐᓃᑦ ᐊᒻᒪᓗ ᑭᑦᑐᕆᐊᖃᕐᓇᖏᖅᑐᓕᓯᒪᓗᑎᑦ.
- ᐃᒍᑦᑕᕐᓂᑦ ᓈᒻᒪᓴᕐᓂᖏᑉᐸᑦ ᑎᒦᑦ, ᐃᔭᒐᒡᒋᕐᓗᑎᑦ. ᐃᔭᒐᖅᑖᕐᕕᑕᖃᓗᐊᓐᖏᒻᒪᑕ ᓄᓇᕗᒻᒥ ᐱᓗᐊᖅᑐᒥᑦ ᓄᓇᓕᕋᓛᖑᓂᖅᓴᐅᔪᓂᒃ.
- ᖃᐅᔨᒋᐊᑦᑎᐊᕐᓗᒋᓪᓗ ᑐᐱᓯ ᓯᖀᖏᓪᓕᐊᓯᒪᓐᖏᒃᑲᓗᐊᕐᒪᖔᖅ ᐊᒻᒪᔪᖃᓐᖏᒃᑲᓗᐊᕐᒪᖔᓪᓗ. ᑐᐲᑦ ᓱᕈᓐᓂᖅᑲᑦ ᓇᔅᓴᖅᓯᒪᒐᔭᖅᑯᑎᑦ ᐊᒡᒍᐊᕈᑎᔅᓴᓐᓂᑦ.
ᓂᐅᕐᕈᓯᒪᓂᕐᓂᑦ ᐊᑦᑐᐃᑦᑕᐃᓕᒪᓇᓱᐊᕐᓂᖅ
ᐱᕈᖅᑐᐃᑦ ᓂᕐᔪᑏᓪᓗ ᐅᑭᐅᖅᑕᖅᑐᒥ ᐊᑦᑐᖅᑕᐅᓴᕋᐃᒻᒪᑕ ᐃᓄᓐᓄᑦ ᓂᓪᓚᒥᐅᑕᐅᓂᖏᓐᓄᑦ ᕿᓚᒥᑯᓗᓪᓗ ᐱᕈᕐᕕᖃᓲᖑᓪᓗᑎᑦ. ᐊᑦᑐᐃᓇᓱᐊᓗᐊᕐᓂᐊᖏᓪᓚᑎᑦ ᓄᓇᒥᑦ.
ᐅᑯᐊ ᐊᑐᖃᑦᑕᕐᓂᐊᖅᑲᑎᑦ:
- ᐅᑉᐱᕆᑦᑎᐊᕐᓗᒋᑦ ᓂᕐᔪᑏᑦ ᐃᓂᖏᓪᓗ. ᓂᕐᔪᑎᓂᑦ ᐅᐹᔭᖃᑦᑕᕐᓂᐊᓐᖏᓚᑎᑦ, ᐊᔾᔨᓕᐅᕆᔭᖅᑯᖃᑦᑕᖏᓪᓗᑎᓪᓗ ᖃᓂᑦᑐᒧᑦ. ᐱᑭᐅᕐᓂᑦ ᐊᑦᑐᖅᓯᒪᖃᑦᑕᖏᓪᓗᑎᑦ, ᓄᕐᕋᓂᓪᓗ ᑎᓯᓂᓪᓗ. ᐊᒥᓱᑦ ᑎᒻᒥᐊᑦ ᐅᑭᐅᖅᑕᖅᑐᒥ ᐱᑭᐅᖃᖃᑦᑕᕐᖓᑕ, ᑎᒻᒥᐊᓄᑦ ᐱᑭᐅᓕᑦᑕᐃᓕᕋᓱᐊᖃᑦᑕᕆᑦ ᑎᒻᒥᐊᕋᓛᕈᓗᖏᓪᓗ ᑲᒪᒋᓐᖏᓪᓗᒋᑦ.
- ᐊᐅᓪᓚᔾᔭᖃᑦᑕᖏᓪᓗᒋᑦ ᐅᔭᕋᐃᑦ, ᐱᕈᖅᑐᐃᑦ ᐊᓯᖏᓪᓗ ᓲᕐᓗ ᓂᐊᖁᒥᓃᑦ ᓇᔾᔪᐃᓪᓗ, ᓇᓂᓯᓐᓂᕋᐃᒍᕕᑦ. ᑎᒍᓯᓐᓂᕋᓗᐊᕈᕕᑦ ᐊᓯᓐᓄᑦ ᑕᑯᔭᐅᒐᔭᓐᖏᒻᒪᑕ ᑭᓯᐊᓂᑦᑕᐅ ᒪᓕᒐᕐᓂᑦ ᓯᖁᒥᑦᑎᑐᐃᓐᓇᕆᐊᖃᕐᒥᔪᑎᑦ ᐊᐅᓪᓚᔾᔭᐃᒍᕕᑦ.
- ᓴᓇᖃᑦᑕᖏᓪᓗᑎᑦ ᓇᓗᓇᐃᒃᑯᑎᓂᒃ ᐅᕝᕙᓘᓐᓃᑦ ᓇᓗᓇᒃᑯᓯᓕᖅᓱᖅᓯᒪᔪᓂᒃ ᓄᓇᒥᑦ ᐊᐅᓪᓚᔾᔭᐃᖃᑦᑕᖏᓪᓗᑎᑦ. ᑕᒻᒪᖅᓴᐃᒍᓐᓇᕐᖓᑕ ᐳᓚᕋᖅᑐᓄᓪᓗ ᐅᓗᕆᐊᓇᖅᓯᒍᓐᓇᖅᑐᑎᑦ. ᐊᑦᑐᐃᒐᔭᓐᖏᓚᑎᑦ ᓱᕋᐃᔭᐃᓐᖏᓪᓗᑎᓪᓗ ᓇᓗᓇᐃᒃᑯᑎᓂᑦ ᓇᓂᔭᕐᓂᑦ, ᐃᓚᖏᑦ ᐱᑐᕐᑳᓘᒻᒪᑕ.
- ᑐᐱᖅᓯᒪᒋᐊᖃᓐᖏᑦᑐᓯ, ᐅᔭᕋᕐᓂᓪᓘᓐᓃᑦ ᐊᐅᓚᔾᔭᐃᓗᓯ ᐃᑦᑕᕐᓂᓴᖃᕐᕕᐅᔮᖅᑐᓂᑦ. ᐃᑦᑕᕐᓂᓴᖃᕐᕖᑦ ᐱᒻᒪᕆᐅᒻᒪᑕ ᐅᓂᒃᑳᖑᒻᒪᑕ ᐅᐊᑦᑎᐊᕈᐊᓗᒃ ᐊᑐᖅᑕᐅᓚᐅᖅᓯᒪᔪᒥᓂᕐᓄᑦ ᐃᓄᓐᓄᑦ ᓄᓇᕗᒻᒥ 1000-ᖏᓐᓃᑦᑐᓂᑦ ᐅᑭᐅᓂᑦ ᐊᓂᒍᖅᓯᒪᓕᖅᑐᓂᑦ.
- ᐃᖏᕐᕋᖃᑦᑕᕐᓗᓯ ᑐᐱᖅᓯᒪᓗᓯᓪᓗ ᑎᓯᔪᔫᒥᔪᒥᑦ ᐊᑦᑐᐃᓗᐊᕐᓂᐊᖏᓐᓇᔅᓯ ᓄᓇᒥᑦ, ᐱᓗᐊᖅᑐᒥᑦ ᐃᓄᒋᐊᕐᓄᑦ ᑐᐱᖅᓯᒪᓂᐊᖅᑐᓄᑦ ᐃᓄᒋᐊᑲᓪᓚᐅᓂᕈᔅᓯᓘᓐᓃᑦ.
- ᐃᓯᒐᐅᔭᔅᓯᒪᖃᑦᑕᕐᓗᓯ ᐊᕿᑦᑐᓂᑦ ᑐᐱᕐᕕᓯᓐᓂ. ᑎᓯᔪᓂᑦ ᐱᓱᑦᑐᖅᓯᐅᑎᓂᑦ ᐊᑐᓚᐅᖅᑐᓂ ᐊᑲᐅᑐᐃᓐᓇᖏᒻᒪᑦ ᑭᓯᐊᓂᑦᑕᐅ ᐊᑦᑐᐃᓐᖏᓂᖅᓴᐅᒐᔭᖅᑐᓯ ᑐᐱᕐᕕᓯᓐᓂ.
- ᑐᐱᖅᓯᒪᒐᓱᐊᖃᑦᑕᖏᓪᓗᓯ ᐱᕈᖅᑐᓕᓐᓂᑦ. ᐃᓯᖅᓴᓕᐅᖃᑦᑕᖏᓪᓗᑎ ᑐᐱᔅᓯ ᖃᓂᒋᔭᖓᓂ ᑕᓗᓕᐅᓐᖏᓪᓗᑎᓪᓘᓐᓃᑦ ᐅᔭᕋᕐᓂᑦ. ᐅᔭᕋᕐᓂᑦ ᐱᕈᖃᕐᓂᐊᕐᓂᕈᔅᓯ ᑐᐱᖅᓯᓐᓄᑦ, ᐅᑎᖅᑎᓪᓗᒋᑦ ᐊᑐᕇᕈᔅᓯᐅ ᐃᓂᒋᓚᐅᖅᑕᖓᓐᓄ ᐊᐅᓪᓚᓚᐅᓐᖏᓂᔅᓯᓐᓂ.
- ᓱᐴᔫᕐᒧᑦ ᓂᕿᓕᐅᖃᑦᑕᕐᓗᓯ. ᐱᕈᖅᑐᕈᔪᓐᓂᑦ ᓄᓇᒥᑦ ᐃᑯᐊᓪᓚᖁᑎᖃᕆᐊᖃᓐᖏᑦᑐᑦ. ᓱᐴᔫᖅᓯᐅᑎᓂᒃ ᓇᔅᓴᕆᐊᖃᖅᑐᑦ ᓄᓇᓕᓐᓂᑦ ᖃᖓᑕᓲᒃᑰᖅᑎᒋᐊᖃᓐᖏᑦᑐᑦ ᐊᐅᓪᓚᕈᔾᔨᓂᕐᒥᑦ ᒪᓕᒐᕐᓂᑦ ᒪᓕᑦᑐᒋᑦ.
- ᓂᕿᒡᒋᑦᑎᐊᖃᑦᑕᕐᓗᓯ, ᐱᓗᐊᖅᑐᒥᑦ ᐸᓂᖅᑐᓂᑦ. ᖃᑦᑖᕐᔪᓛᓐᓃᖏᑦᑐᓂᑦ ᓂᕿᒡᒋᕐᓗᓯ, ᐊᓕᒍᕐᓂᑦ ᓴᕕᕋᔭᐅᔭᓂᓪᓘᓐᓃᑦ ᐊᑐᓐᖏᓪᓗᓯ. ᐊᒥᐊᒃᑯᓗᐊᖃᑦᑕᖁᓐᖏᓪᓗᑎᓪᓗ ᓈᒻᒪᑎᖅᓯᒪᖃᑦᑕᕐᓂᐊᖅᑲᓯ ᓂᕐᔪᑎᓄᑦ ᓇᐃᒪᔭᐅᖃᑦᑕᕐᓂᐊᖏᒻᒪᑕ. ᑎᐱᓕᐊᓗᓐᓂ ᓂᕿᒡᒋᕋᓱᐊᕐᓂᐊᓐᖏᓚᑎᑦ.
- ᓴᓂᓕᒫᓯ ᐴᖅᑲᖃᑦᑕᕐᓗᒋᑦ ᓂᕿᒥᓃᓪᓗ ᐴᒥᓂᖏᑦ. ᐃᑭᖃᑦᑕᖏᓪᓗᒋᑦ ᐴᒥᓃᑦ ᓇᓄᕐᓄᑦ ᓇᐃᒪᔭᐅᓕᖅᑲᑕ ᐅᐹᔭᑐᐃᓐᓇᕆᐊᖃᕐᖓᑕ. ᓄᐊᖃᑦᑕᕐᓗᒋᓪᓗ ᑯᕕᔭᒥᓂᖅᑎᑦ ᓂᖅᑎᐅᖅᑎᓪᓗᑎᑦ ᓂᕆᑎᓪᓗᑎᓪᓗ. ᓴᓂᑦᑕᖃᑦᑕᕐᓗᓯ ᕿᒪᑦᑕᒥᓂᐅᒐᓗᐊᕐᓂᑦ ᖃᐅᔨᒃᑲᐃᓗᑎᓪᓗ ᒥᕐᖑᐃᖅᓯᕐᕕᐅᑉ ᐃᖅᑲᓇᐃᔭᖅᑎᖓᓐᓂ ᖃᓄᑎᒋᑦ ᕿᒪᐃᔪᖃᕐᓂᕐᒪᖔᖅ.
- ᐅᐊᓴᐅᑎᓂᑦ ᐊᑐᖅᑕᐃᓕᒪᔫᒥᖃᑦᑕᕐᓗᓯ. ᐅᐊᓴᐅᑎᓂᒃ ᐊᑐᕐᓂᐊᕐᓂᕈᕕᑦ, ᐊᐅᓴᕋᐃᑦᑐᓂᑦ ᓯᕿᓐᓂᕐᒧᑦ ᐊᑐᕈᓐᓇᖅᑐᓯ. ᐅᐊᓴᕐᕕᒥᓃᑦ ᑯᕕᔭᐅᒋᐊᖃᖅᑐᑦ 100-ᒦᑕᒥᑦ ᐅᖓᓯᓐᓂᓕᒻᒥᑦ ᑐᐱᕐᕕᒻᒥᑦ ᐃᒪᖅᑕᓕᓐᓂᓪᓗ.
- ᑭᓈᓗᐃᑦ ᐴᖅᑲᖅᑕᐅᓯᒪᖃᑦᑕᕐᓗᑎᒃ ᓴᐅᔭᐅᓗᑎᓪᓘᓐᓃᑦ ᐅᔭᕋᕐᓄᑦ ᐱᓱᕝᕕᒻᒥ ᐅᖓᓯᒋᐊᕐᓗᒋᑦ, 100-ᒦᑕᒥᑦ ᑐᐱᕐᕕᒻᒥ ᐅᖓᓯᓐᓂᓕᒻᒥᑦ ᐃᒪᖅᑕᓕᒻᒥᓪᓘᓐᓃᑦ. ᐃᓄᒋᐊᓐᓂᕈᔅᓯ ᑐᐱᕐᕕᖃᕐᓂᕈᔅᓯᓘᓐᓃᑦ, ᐃᓯᖅᓴᓕᐅᕈᓐᓇᖅᑐᑎᑦ ᑭᓈᓗᖃᕐᕕᒻᒥ 15 ᓴᓐᑎᒦᑕᒥᑦ ᐃᑎᓂᓕᒻᒥᑦ 100-ᒦᑕᒥᑦ ᐅᖓᓯᓐᓂᓕᒻᒥᑦ ᐱᓱᕝᕕᐅᕙᑦᑐᒥᑦ, ᑐᐱᕐᕕᒻᒥ, ᐃᒪᓕᓐᓂᓪᓘᓐᓃᑦ. ᐃᑎᔫᒋᐊᕐᓗᒍ ᐃᓯᖅᓴᖓ ᓴᐅᑦᑎᐊᕐᓗᒍᓗ ᐱᑕᖃᓐᖏᑦᑐᒥᓂᐅᔮᓕᕐᓗᓂ ᓂᕐᔪᑎᓄᓪᓗ ᐸᒃᑲᖅᑕᐅᖁᓇᒋᑦ. ᓯᔾᔭᒃᑰᕐᓂᕈᕕᑦ ᑕᕆᐅᓕᒃᑯᑦ, ᐃᒃᑲᑦᑐᒥ ᐃᓯᖅᓴᓕᐅᕈᓐᓇᖅᑐᑎᑦ ᐅᓕᕝᕕᐅᕙᑦᑐᒥ. ᐃᖂᑎᔅᓴᓕᒫᑦ ᐃᓗᐊᖁᑎᔅᓴᓪᓗ ᐴᖅᓯᒪᑦᑎᐊᕐᓗᒋᑦ ᓴᓂᒃᑯᕕᓐᓄᑦ.
